ବ୍ରହ୍ମପୁର ଅଫିସ,୨୦ା୩ – କରୋନା ମହାମାରୀର ମୁକାବିଲା ପାଇଁ ପ୍ରସ୍ତୁତି ଆରମ୍ଭ କରିଛନ୍ତି ଘରୋଇ, ସରକାରୀ, ସିଟି ବସ୍ କର୍ତ୍ତୃପକ୍ଷ । କରୋନା ସଂକ୍ରମଣକୁ ରୋକିବାକୁ ନେଇ ରହିଥିବା ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ ବସ୍ଗୁଡିକରେ ସଚେତନତାମୂଳକ ପଦକ୍ଷେପ ନେବା ଆରମ୍ଭ ହୋଇଛି । ଯାତ୍ରୀଙ୍କୁ ସଚେତନ କରିବାକୁ ନେଇ ସରକାରୀ, ସିଟିବସ୍, ଓଏସ୍ଆରଟିସି ବସ୍କୁ ପରିସ୍କାର ରଖିବା ସହ ଯାତ୍ରୀଙ୍କ ସୁରକ୍ଷା ଉପରେ ଗୁରୁତ୍ୱ ଦିଆଯାଇଛି ।
ଡ୍ରପୁରରୁ ଗଞ୍ଜାମ ଜିଲାର ବିଭିନ୍ନ ଅଞ୍ଚଳକୁ ଯାତ୍ରା କରୁଥିବା ସମସ୍ତ ସରକାରୀ, ବେସରକାରୀ ଓ ସିଟିବସ୍ରେ ଯାତ୍ରୀଙ୍କ ହାତଧୋଇବା ବ୍ୟବସ୍ଥା କରାଯାଇଥିବା ଦେଖିବାକୁ ମିଳିଛି। ମିଳିଥିବା ସୂଚନା ପ୍ରକାରେ, ଓଏସ୍ଆରଟିସି ବସ୍ଗୁଡିକରେ ସଚେତନତାମୂଳକ ପୋଷ୍ଟର ଲଗାଯାଇଛି। ନିୟମିତ ପ୍ରତ୍ୟେକ ଟ୍ରିପ୍ରେ ବସ୍କୁ ବ୍ଲିଚିଂ ଦ୍ୱାରା ସଫା କରାଯାଉଛି। କର୍ମଚାରୀଙ୍କୁ ମାସ୍କ ବ୍ୟବହାର କରିବାକୁ ବାଧ୍ୟ କରାଯାଇଥିବା ବେଳେ ଯାତ୍ରା ପୂର୍ବରୁ ଯାତ୍ରୀଙ୍କୁ ହାତ ଧୋଇବା ପାଇଁ ବସ୍ରେ ଡେଟଲ ତଥା ହ୍ୟାଣ୍ଡୱାଶ୍ ରଖାଯାଇଛି ।
ଏହାବ୍ୟତୀତ ସମ୍ପୂର୍ଣ୍ଣ ବସ୍କୁ ବାରମ୍ବାର ଧୋଇବା ସହ ଯାତ୍ରା କରୁଥିବା ସମସ୍ତ ଯାତ୍ରୀଙ୍କ ହ୍ୟାଣ୍ଡୱାଶ୍ରେ ହାତ ଧୋଇବା ପରେ ବସ୍ରେ ପ୍ରବେଶ ପାଇଁ ଅନୁମତି ଦିଆଯାଉଛି। ଏହାବ୍ୟତୀତ ଓଏସ୍ଆରଟିସି ପକ୍ଷରୁ ନୂଆ ବସ୍ଷ୍ଟାଣ୍ଡରେ କରୋନା ପାଇଁ ଡାକବାଜି ଯନ୍ତ୍ର ମାଧ୍ୟମରେ ସଚେତନ କରାଯାଉଥିବା କାର୍ଯ୍ୟାଳୟ ପକ୍ଷରୁ କୁହାଯାଇଛି। ସେହିପରି ସିଟି ବସ୍ଗୁଡିକରେ ମଧ୍ୟ ଗୁରୁବାର ସକାଳୁ ଯାତ୍ରୀଙ୍କ ସୁରକ୍ଷା ପାଇଁ ସଚେତନତାମୂଳକ ପଦକ୍ଷେପ ଗ୍ରହଣ କରାଯାଉଥିବା ଦେଖିବାକୁ ମିଳିଛି। ଅନ୍ୟପକ୍ଷରେ ଗଞ୍ଜାମ ଜିଲା ଘରୋଇ ବସ୍ମାଲିକ ସଂଘ ସମ୍ପାଦକ ସୁବାସ ଚନ୍ଦ୍ର ପଟ୍ଟନାୟଙ୍କ ସୂଚନା ପ୍ରକାରେ, ରାଜ୍ୟ ସରକାରଙ୍କ ନିଷ୍ପତ୍ତି ପ୍ରକାରେ ସମସ୍ତ ଘରୋଇ ବସ୍ରେ ଯାତ୍ରୀଙ୍କ ହାତ ଧୋଇବା ପାଇଁ ସାବୁନ୍, ପାଣି ଓ ହ୍ୟାଣ୍ଡୱାଶ ରଖାଯାଇଛି । ନିର୍ଦ୍ଧାରିତ ସିଟ୍ଠାରୁ ଅଧିକ ଯାତ୍ରୀ ପରିବହନ ଉପରେ କଟକଣା ଲଗାଯାଇଛି। ଏଥିସହ କର୍ମଚାରୀଙ୍କୁ ମଧ୍ୟ ମୁହଁ ଢାଙ୍କିବା ପାଇଁ କୁହାଯାଇଛି। ବସ୍ରେ ସଚେତନତା ସୃଷ୍ଟି ସହ ନୂଆବସ୍ଷ୍ଟାଣ୍ଡରେ ପ୍ରଶାସନ ପକ୍ଷରୁ ହାତ ଧୋଇବା ବ୍ୟବସ୍ଥା ସହ ଯାତ୍ରୀଙ୍କ ସୁରକ୍ଷା ପାଇଁ ସ୍କାନିଂ କ୍ୟାମ୍ପର ବ୍ୟବସ୍ଥା କରାଯିବା ଉପରେ ପ୍ରଶାସନ ଗୁରୁତ୍ୱ ଦେବାର ଆବଶ୍ୟକତା ଥିବା ସମ୍ପାଦକ କହିଛନ୍ତି ।