ଜଟଣୀ,୨୫ା୩(ଡି.ଏନ.ଏ): କରୋନା ଭୂତାଣୁ ସଂକ୍ରମଣ ମୁକାବିଲା ପାଇଁ ଲକ୍ଡାଉନ୍ ଘୋଷଣା କାର୍ଯ୍ୟକାରିତା ନେଇ ଜିଲାପାଳ ସିତାଂଶୁ କୁମାର ରାଉତ ମଙ୍ଗଳବାର ଜଟଣୀର ବିଭିନ୍ନ ସ୍ଥାନ ବୁଲି ସ୍ଥିତି ପରଖିଥିଲେ। ପୋଲିସ ଓ ପ୍ରଶାସନ ଦ୍ୱାରା ବିଭିନ୍ନ ସ୍ଥାନରେ ହେଉଥିବା ବ୍ଲକିଂ ସ୍ଥାନ ସମେତ ଅନ୍ୟ କେତେକ ଅଞ୍ଚଳ ବୁଲି ଦେଖିଥିଲେ। ସ୍ଥାନୀୟ ସୀତାରାମ ଛକରେ ଫଳ ଓ ପନିପରିବା ବିକୁଥିବା ଉଠାଦୋକାନୀଙ୍କ ନିକଟରେ ଗହଳି ଦେଖି ଜିଲାପାଳ ରାଉତ ବିରକ୍ତି ପ୍ରକାଶ କରିଥିଲେ। ଏହାର ପ୍ରତିକାର ବ୍ୟବସ୍ଥା କରିବାକୁ ଉପସ୍ଥିତ ସ୍ଥାନୀୟ ପ୍ରଶାସନିକ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। ଜଟଣୀ ସହରର ବିଭିନ୍ନ ସ୍ଥାନରେ ଥିବା ଉଠାଦୋକାନୀଙ୍କୁ ସ୍ଥାନୀୟ ନୂଆ ବସ୍ଷ୍ଟାଣ୍ଡ ପରିସରକୁ ସ୍ଥାନାନ୍ତର କରିବାକୁ ନିଷ୍ପତ୍ତି ହୋଇଥିବା ମ୍ୟୁନିସିପାଲିଟି ନିର୍ବାହୀ ଅଧିକାରୀ ତପନ କୁମାର ମହାପାତ୍ର କହିଛନ୍ତି। ଭୁବନେଶ୍ୱର ସବ୍କଲେକ୍ଟର ଦେବବ୍ରତ ସାହୁ, ଜଟଣୀ ତହସିଲଦାର ଓ ଅନ୍ୟ ଅଧିକାରୀଙ୍କ ଉପସ୍ଥିତିରେ ଆଲୋଚନା ହୋଇ ଏପରି ନିଷ୍ପତ୍ତି ହୋଇଛି। ଏହି ଥାନା ଅନ୍ତର୍ଗତ ହରିଭାଇନା ଛକ, ୧୬ ନଂ. ଜାତୀୟ ରାଜପଥର ଜଟଣୀ ଗେଟ୍, ପିତାପଲ୍ଲୀ ଛକରେ ରାସ୍ତା ବ୍ଲକିଂ କରାଯାଇଛି। ସେହିପରି ଜଟଣୀ ତହସିଲ ଓ ମ୍ୟୁନିସିପାଲିଟି ପକ୍ଷରୁ ଗଠିତ ୨ଟି ଲେଖାଏ ଟିମ୍ ସହର ଓ ଗ୍ରାମାଞ୍ଚଳ ବିଭିନ୍ନ ଅଞ୍ଚଳ ବୁଲି ଲୋକଙ୍କୁ ସଚେତନ କରିବା ସହ ଖୋଲାଥିବା ଦୋକାନ ବନ୍ଦ କରାଇଥିଲେ। ଆବଶ୍ୟକ ନ ଥିଲେ ଲୋକଙ୍କୁ ଘରୁ ନ ବାହାରିବାକୁ ପରାମର୍ଶ ଦେଇଥିଲେ। ଡାକବାଜି ଯନ୍ତ୍ରରେ ପ୍ରଚାର କରାଯାଇଥିଲା।