ଗୋପ,୯ା୧୧(ଡି.ଏନ୍.ଏ.): ନିମାପଡ଼ା-ଗୋପ ରାସ୍ତାର କୁଶୁପୁର ଗାଁ ଛକ ନିକଟରେ ଶୁକ୍ରବାର ଏକ ବସ୍ ଓ କାର୍ ମୁହଁ।ମୁହିଁ ଧକ୍କା ହେବାରୁ ୧୫ରୁ ଊର୍ଦ୍ଧ୍ୱ ଆହତ ହୋଇଛନ୍ତି। ସ୍ଥାନୀୟ ଅଗ୍ନିଶମ ବିଭାଗ ଆହତମାନଙ୍କୁ ଉଦ୍ଧାର କରି ଗୋପ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ସେଠାରେ ବିଦ୍ୟୁତ୍ ନ ଥିବାରୁ ଆହତମାନଙ୍କୁ ମୋବାଇଲ ଟର୍ଚ୍ଚ ଲାଇଟରେ ଚିକିତ୍ସା କରାଯାଇଥିଲା। ସେଥିରୁ ୫ଜଣଙ୍କ ଅବସ୍ଥା ସଙ୍କଟାପନ୍ନ ହେବାରୁ କ୍ୟାପିଟାଲ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ଏ ନେଇ ଡାକ୍ତରଖାନାରେ କିଛି ସମୟ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା। ସୂଚନାଯୋଗ୍ୟ, ଶୁକ୍ରବାର ଅପରାହ୍ନ ୫ଟାରେ ନାଗେଶ୍ୱର ନାମକ ଏକ ଘରୋଇ ବସ୍ ୪୦ରୁ ଊର୍ଦ୍ଧ୍ୱ ଯାତ୍ରୀଙ୍କୁ ନେଇ କୋଣାର୍କ ଅଭିମୁଖେ ଯାଉଥିଲେ। ବିପରୀତ ଦିଗରେ ନିମାପଡ଼ା ଥାନା ଅଧୀନ କୁଆଁଶ ତରଡ଼ାପଡ଼ା ଗ୍ରାମର ୫ଜଣ ଯୁବକ ଏକ କାର୍(ନଂ.ଓଡି ୦୨ ଏଆର୍-୪୬୩୯) ଯୋଗେ କୋଣାର୍କରୁ ଫେରୁଥିବାବେଳେ କୁଶୁପୁର ଗାଁ ମୁଣ୍ଡ ଛକରେ ଦ୍ରୁତ ଗତିରେ ଆସି ଏହି ବସ୍କୁ ଧକ୍କା ଦେଇଥିଲା। କାର୍ରେ ଥିବା ଦେବାଶିଷ ବଡ଼ଜେନା (୨୨), ବାପି ବେହେରା (୨୯), ରାକେଶ ସ୍ବାଇଁ (୨୮), ଅଜିତ୍ ବେହେରା(୨୮) ଓ ତାପଶ ବିଶ୍ୱାଳ (୨୬) ଗୁରୁତର ହୋଇଥିବାବେଳେ ବସ୍ରେ ଥିବା ଲକ୍ଷ୍ମୀଧର ବେହେରା, ଇଫ୍ରାନ୍ ଖାନ୍, ସ୍ବାଗତ ସେନାପତି ସମେତ ୧୦ଜଣ ଆହତ ହୋଇଥିଲେ। ଦୁର୍ଘଟଣାସ୍ଥଳରେ ପୋଲିସ ପହଞ୍ଚତ୍ କାର୍ ଓ ବସ୍କୁ ଜବତ କରି ତଦନ୍ତ ଚଳାଇଛି।