ବରଗଡ଼ ଅଫିସ୍,୧୧।୫-ଲକ୍ ଡାଉନ୍ କଟକଣା ଯୋଗୁ ପୁରୀ ଜିଲା କୋଣାର୍କ ନିକଟ ଅଚ୍ୟୁତପୁରର ଏକ ଇଟାଭାଟିରେ ବରଗଡ଼ ଜିଲା ପାଇକମାଲ ବ୍ଲକ ଛେତଗାଁର ୩୫ ଶ୍ରମିକ ନିଜ ପିଲାଛୁଆଙ୍କ ସହିତ ଫସି ରହିଥିଲେ। ତେବେ ସ୍ଥାନୀୟ ସାମାଜିକ କର୍ମୀ ଦିବସ କୁମାର ସାହୁଙ୍କ ଉଦ୍ୟମକ୍ରମେ ସମ୍ପୃକ୍ତ ଶ୍ରମିକମାନେ ସୋମବାର ନିଜ ଗ୍ରାମକୁ ଏକ ବସ୍ ଯୋଗେ ଫେରିଛନ୍ତି। ନିଜ ରୋଜଗାର ଟଙ୍କାରେ ଏକ ବସ୍ ଭଡ଼ା କରି ସେମାନେ ଗାଁକୁ ପହଞ୍ଚିଛନ୍ତି। ଫେରିବା ପରେ ସେମାନେ ସାମାଜିକ କର୍ମୀ ସାହୁଙ୍କ ଉଦ୍ୟମକୁ ପ୍ରଶଂସା କରିଛନ୍ତି।
ପ୍ରକାଶଯୋଗ୍ୟ, ଗତ କିଛିମାସ ତଳେ ଏହି ଶ୍ରମିକମାନେ ଅଚ୍ୟୁତପୁରରେ ଥିବା ଏକ ଇଟାଭାଟିରେ କାମ କରୁଥିଲେ। ଲକ୍ ଡାଉନ୍ ଯୋଗୁ କାମ ଧନ୍ଦା ବନ୍ଦ ହୋଇ ଯାଇଥିଲା। ଫଳରେ ସେମାନେ ଇଟାଭାଟି ନିକଟ ଏକ ଅସୁରକ୍ଷିତ ସ୍ଥାନରେ ରହିଥିଲେ। ଏହି ଖବର ପାଇବା ପରେ ସାମାଜିକ କର୍ମୀ ସାହୁ ସେମାନଙ୍କୁ ଉଦ୍ଧାର କରିବା ପାଇଁ ମୁଖ୍ୟମନ୍ତ୍ରୀ, ପୁରୀ ଜିଲା ପ୍ରଶାସନକୁ ଅନୁରୋଧ କରିଥିଲେ। ଏହାପରେ ଶ୍ରମିକମାନଙ୍କୁ ନିକଟସ୍ଥ ପଞ୍ଚାୟତ ଅଫିସକୁ ଅଣାଯାଇ ସେଠାରେ ଆଶ୍ରୟ ଦେବା ସହିତ ସେମାନଙ୍କ ଖାଇବା, ପିଇବା ବ୍ୟବସ୍ଥା କରାଯାଇଥିଲା। ମାତ୍ର ଶ୍ରମିକମାନେ ଘରକୁ ଫେରିବାକୁ ଚାହୁଁଥିଲେ। ଏ ନେଇ ପୁଣି ଥରେ ସେମାନେ ସାମାଜିକ କର୍ମୀ ସାହୁଙ୍କୁ ଯୋଗାଯୋଗ କରିଥିଲେ। ସାମାଜିକ କର୍ମୀ ଏସମ୍ପର୍କରେ ଆଇଜି ଅମିତାଭ ଠାକୁରଙ୍କ ଦୃଷ୍ଟି ଆକର୍ଷଣ ପରେ ଆଇଜି ଠାକୁର ଗାଡ଼ିପାସ୍ ବ୍ୟବସ୍ଥା କରିଥିଲେ। ପରେ ଶ୍ରମିକମାନେ ଏକ ବସ୍କୁ ୩୨ ହଜାର ଟଙ୍କାରେ ଭଡ଼ା କରି ନିଜ ଗ୍ରାମକୁ ଫେରିଥିଲେ। ତେବେ ଗାଡ଼ି ଭଡ଼ାରେ ସବୁ ରୋଜଗାର ଟଙ୍କା ସରିଯାଇ ଥିବା ଯୋଗୁ ସମ୍ପୃକ୍ତ ଶ୍ରମିକଙ୍କ ପରିବାରକୁ ସରକାରୀ ସହାୟତା ଯୋଗାଇ ଦେବାକୁ ସାଧାରଣରେ ଦାବି ହୋଇଛି।