ବହଳଦା,୧୪ା୮(ଡି.ଏନ୍.ଏ.)- ଅରୁଣାଚଳ ପ୍ରଦେଶରୁ ନକଲି ବିଦେଶୀ ମଦ ଚୋରା ଚାଲାଣର ଚେର ମୟୂରଭଞ୍ଜ ଜିଲା ବହଳଦା ପର୍ଯ୍ୟନ୍ତ ଲମ୍ବିଛି। ଏହାର ପର୍ଦ୍ଦାଫାଶ କରି ବହଳଦା ପୋଲିସ ଏକ ବଡ଼ ସଫଳତା ହାସଲ କରିଛି। ସୋମବାର ବିଳମ୍ବିତ ରାତିରେ ପୋଲିସର ଚଢ଼ାଉ ଫଳରେ ପ୍ରାୟ ୧୦ ଲକ୍ଷରୁ ଊର୍ଦ୍ଧ୍ୱ ଟଙ୍କାର ନକଲି ବିଦେଶୀ ମଦ ଜବତ ହୋଇଛି। ପୋଲିସ ସୂଚନା ଅନୁଯାୟୀ, ସୋମବାର ରାତିରେ ବହଳଦା ପୋଲିସ କୌଣସି ସୂତ୍ରରୁ ଖବରପାଇ ଅତର୍କିତ ଚଢ଼ାଉ କରିଥିଲା। ଥାନା ଆଇଆଇସି ବୀରେନ୍ଦ୍ର ସେନାପତିଙ୍କ ନେତୃତ୍ୱରେ ଏସଆଇ ଭାସ୍କର ପ୍ରଧାନ, ଏଏସଆଇ କେ.ସି ପାତ୍ର, ବିକାଶ ସେଠୀ ପ୍ରମୁଖ ବହଳଦା ବ୍ୟାଙ୍କ ଅଫ ଇଣ୍ଡିଆ ରାସ୍ତା ନିକଟରେ ଏକ ଦଶଚକିଆ ଟ୍ରକ(ନଂ.ଏନଲ୦୨କେ-୨୨୯୪)ରୁ ଅନଲୋଡ ହେଉଥିବା ଏହି ବିପୁଳ ପରିମାଣର ନକଲି ମଦ ଜବତ କରିଥିଲେ। ଅରୁଣାଚଳ ପ୍ରଦେଶରୁ ଆସିଥିବା ଏହି ମଦ ସ୍ଥାନୀୟ ଜନୈକ ମଦ ବ୍ୟବସାୟୀଙ୍କ ବୋଲି ଆଲୋଚନା ହେଉଛି। ଗାଡ଼ିର ଡ୍ରାଇଭର ଓ ହେଲପର ଘଟଣାସ୍ଥଳରୁ ଫେରାର ହୋଇଯାଇଥିବା ବେଳେ ପୋଲିସ ଅନଲୋଡ କରୁଥିବା ୩ ଜଣଙ୍କୁ ଅଟକ ରଖି ପଚରାଉଚୁରା କରୁଛି। ମୟୂରଭଞ୍ଜ ଅବକାରୀ ବିଭାଗ ପକ୍ଷରୁ ବିଭିନ୍ନ ଜାଗାରେ ଥିବା ଲାଇସେନ୍ସ ପ୍ରାପ୍ତ ମଦ ଦୋକାନ ନିଲାମର ଦୁଇଦିନ ପରେ ରାଜ୍ୟ ବାହାରୁ ବିପୁଳ ପରିମାଣର ମଦ ଆସିବା ସମସ୍ତଙ୍କୁ ଚକିତ କରିଛି ା ବହଳଦା ଅବକାରୀ କାର୍ଯ୍ୟାଳୟଠାରୁ ମାତ୍ର ଶହେ ମିଟର ଦୂରରେ ଏତେ ବଡ଼ କାରନାମା ଘଟିଥିଲେ ମଧ୍ୟ ସ୍ଥାନୀୟ ଅବକାରୀ ବିଭାଗ ପାଖରେ ଏନେଇ କୌଣସି ସୂଚନା ନ ଥିବା ବିଭାଗର ସାଧୁତା ନେଇ ପ୍ରଶ୍ନବାଚୀ ସୃଷ୍ଟି କରିଛି ା ତେବେ ଅରୁଣାଚଳ ପ୍ରଦେଶରୁ ବହଳଦାରେ ପହଞ୍ଚିବାକୁ ହେଲେ ଶହ ଶହ ଥାନା ଓ ଗେଟ ଅତିକ୍ରମ କରିବାକୁ ପଡୁଥିବା ବେଳେ ଅନାୟାସରେ ଲକ୍ଷାଧିକ ଟଙ୍କାର ନକଲି ମଦ କିପରି ଆସିଲା ତାହା ତଦନ୍ତ ସାପେକ୍ଷ ା