ଢେଙ୍କାନାଳ ଅଫିସ, ୨୯।୩ – ଦିନକୁ ଦିନ ଅଧିକ ଭୟାବହ ହେଉଛି କରୋନା। ସଂକ୍ରମଣରେ ମୃତକ ଏବଂ ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି। ଏହାକୁ ରୋକିବାକୁ ସଙ୍ଗରୋଧ, ସାମାଜିକ ଦୂରତା, ସ୍ବଚ୍ଛତା ଏବଂ ସତର୍କତା ଉପରେ ବିଶେଷ ଗୁରୁତ୍ୱ ଦେଉଛନ୍ତି ସରକାର। ଲକ୍ଡାଉନ ବ୍ୟବସ୍ଥା କଡ଼ାକଡ଼ି କରାଯାଇଛି। ତଥାପି ସହରାଞ୍ଚଳରେ ଅନେକେ ନିୟମ ଉଲ୍ଲଂଘନ କରିବାକୁ ପଛାଉନାହାନ୍ତି। ହେଲେ ଗ୍ରାମାଞ୍ଚଳ କଥା ଅଲଗା। ଏଠାକାର ଲୋକମାନେ ସହରବାସୀଙ୍କ ଅପେକ୍ଷା ଅଧିକ ସଚେତନ ଥିବା ଦେଖିବାକୁ ମିଳିଛି। ଗଁ। ର ବରିଷ୍ଠ ଲୋକମାନେ ଯୁବଗୋଷ୍ଠୀଙ୍କ ସହାୟତାରେ ସଚେତନତା କାର୍ଯ୍ୟକ୍ରମକୁ ଆଗକୁ ନେଉଛନ୍ତି। ଢେଙ୍କାନାଳ ଜିଲାର ଅନେକ ଗ୍ରାମର ପ୍ରବେଶ ପଥରେ ବାଉଁଶ ବାଡ଼ ତିଆରି କରାଯାଇଛି। ଗଁା ଭିତରକୁ ବହିରାଗତଙ୍କ ପ୍ରବେଶ ଉପରେ କଟକଣା ଜାରି କରାଯାଇଛି। ସାନିଟାଇଜର, ସାବୁନରେ ହାତ ସଫା କରିବା ଉପରେ ଗୁରୁତ୍ୱ ଦିଆଯାଉଥିବାବେଳ ସମସ୍ତେ ମାସ୍କ ବ୍ୟବହାର କରୁଛନ୍ତି।
ଢେଙ୍କାନାଳ ସହରଠାରୁ ୫କିମି ଦୂରରେ ଅବସ୍ଥିତ ଶୁଆଖାଇକାଟେଣୀ ପଞ୍ଚାୟତର ରଞ୍ଜା ଗ୍ରାମରେ କରୋନା ସଂକ୍ରମଣ ରୋକିବାକୁ ବ୍ୟାପକ ବ୍ୟବସ୍ଥା କରାଯାଇଛି। ଅଞ୍ଚଳର ଯୁବଗୋଷ୍ଠୀ ସଚେତନତା ଦାୟିତ୍ୱ ନିଜ କାନ୍ଧକୁ ନେଇଛନ୍ତି। ସେମାନେ ଘର ଘର ବୁଲି ଲୋକଙ୍କୁ ସଚେତନ କରାଉଛନ୍ତି। ଗ୍ରାମର ମହିଳାମାନେ ମଧ୍ୟ ଛୋଟ ପିଲାଙ୍କୁ ହ୍ୟାଣ୍ଡଓ୍ବାଶ ଏବଂ ସାନିଟାଇଜରରେ ହାତ ପରିଷ୍କାର କରି ଧୋଇବାକୁ ପରାମର୍ଶ ଦେଉଛନ୍ତି। ଜରୁରୀ କାର୍ଯ୍ୟ ନ ଥିଲେ କେହି ବାହାରକୁ ନ ବାହାରିବାକୁ ବାରମ୍ବାର କୁହାଯାଉଛି। ବାହାରକୁ ଯାଇ ଫେରୁଥିବା ଲୋକଙ୍କୁ ଗଁାରେ ପଶିବା ଆଗରୁ ହାତଗୋଡ଼ ଧୋଇବା ବ୍ୟବସ୍ଥା କରାଯାଇଛି।
ସେହିପରି କଙ୍କଡ଼ାହାଡ଼ ବ୍ଲକର ଶୀତଳବସା ଗ୍ରାମର ଡାଇମଣ୍ଡ ୟୁଥ୍ କ୍ଲବ ପକ୍ଷରୁ ମଧ୍ୟ ଲକ୍ଡାଉନ୍ ନିୟମକୁ କଡାକଡି ଭାବେ ପାଳନ କରିବା ଲାଗି ସଚେତନତା ପ୍ରଚାର କରାଯାଉଛି। କ୍ଲବ ସଭାପତି ସାତୁକ ମହାନ୍ତ, ସମ୍ପାଦକ ଶିବୁ ମହାନ୍ତ ପ୍ରମୁଖ ସମସ୍ତ ସଦସ୍ୟ ଏଥିରେ ସହଯୋଗ କରୁଛନ୍ତି।