ବାରିପଦା ଅଫିସ,୩୦ା୧- ବହୁଜନ କ୍ରାନ୍ତି ମୋର୍ଚ୍ଚା ପକ୍ଷରୁ ବୁଧବାର ଭାରତ ବନ୍ଦ ଡାକରା ଦିଆଯାଇଥିଲା। ଏହି ପରିପ୍ରେକ୍ଷୀରେ ଲୋକଙ୍କୁ ସଚେତନ କରିବା ପାଇଁ ପ୍ରଚାରପତ୍ର ବଣ୍ଟା ଯାଇଥିଲା। ତେବେ ଏହି ପ୍ରଚାରପତ୍ରରେ ବ୍ରାହ୍ମଣମାନଙ୍କୁ ଅପମାନିତ କରାଯାଇଥିବା ବାରିପଦା ବ୍ରାହ୍ମଣ ସମାଜ ଅଭିଯୋଗ କରିଛି। ଏନେଇ ମୋର୍ଚ୍ଚାର ରାଷ୍ଟ୍ରୀୟ ସଂଯୋଜକ ୱାମନ ମେଶ୍ରାମଙ୍କ ନାମରେ ବାରିପଦା ଟାଉନ ଥାନାରେ ବ୍ରାହ୍ମଣ ସମାଜ ଲିଖିତ ଅଭିଯୋଗ କରିଛି। ଏହା ସହିତ ସମାଜର ଏକ ପ୍ରତିନିଧି ଦଳ ଏସ୍ପି ପରମାର ସ୍ମିଥ ପୁରୁଷୋତ୍ତମଦାସଙ୍କୁ ସାକ୍ଷାତ୍ କରି ତୁରନ୍ତ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛି। ସମାଜର ସଭ୍ୟ ନିମାଇଁ ଚରଣ ତ୍ରିପାଠୀ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, ମୋର୍ଚ୍ଚା ପକ୍ଷରୁ ଯେଉଁ ପ୍ରଚାରପତ୍ର ସର୍ବସାଧାରଣରେ ବଣ୍ଟା ଯାଇଛି ତାହାର ୬ ନମ୍ବର ଧାଡିରେ ବ୍ରାହ୍ମଣମାନଙ୍କ ସମ୍ବନ୍ଧରେ ଅମୂଳକ, ଭିତ୍ତିିହୀନ ଏବଂ ମିଥ୍ୟା ତଥ୍ୟ ଦେଇ ବ୍ରାହ୍ମଣମାନଙ୍କୁ ଅପମାନିତ କରିବା ସହିତ ଭାରତୀୟ ସମ୍ବିଧାନ ଓ ଆଇନକୁ କୁଠାରାଘାତ କରାଯାଇଛି। ବ୍ରାହ୍ମଣ ସମାଜର କାମେଶ୍ୱର ତ୍ରିପାଠୀ, ଚଣ୍ଡୀ ପ୍ରସାଦ ଦାସ, ଅଚ୍ୟୁତ ପ୍ରସାଦ ମହାପାତ୍ର, ନରୋତ୍ତମ ପାଣିଗ୍ରାହୀ, ନିମାଇଁ ଚରଣ ତ୍ରିପାଠୀ, ଶଶିଭୂଷଣ ଦାଶ, ପ୍ରଦୀପ କୁମାର ପଣ୍ଡା, ଦୋଳଗୋବିନ୍ଦ ଦାସ ପ୍ରମୁଖ ବାରିପଦା ଟାଉନ ଥାନାକୁ ଯାଇ ଲିଖିତ ଅଭିଯୋଗ କରିବା ସହିତ ଏସ୍ପିଙ୍କୁ ସାକ୍ଷାତ୍ କରିଥିଲେ।