କେନ୍ଦୁଝର,୧୫ା୮ (ସ୍ବ.ପ୍ର.): କେନ୍ଦୁଝର ଜିଲାରେ ଲଘୁଚାପଜନିତ ବର୍ଷା ଯୋଗୁ ଜନଜୀବନ ବ୍ୟତିବ୍ୟସ୍ତ ହୋଇପଡ଼ିଛି। ଅନେକ ଗ୍ରାମ, ବସ୍ତି, ଓ୍ବାର୍ଡ ଜଳବନ୍ଦୀ ହୋଇଛି। ତେବେ ଏନେଇ ପ୍ରଶାସନ ପାଖରେ ଠିକ ସୂଚନା ନାହିଁ। ନଦୀନାଳରେ ଜଳସ୍ତର ବୃଦ୍ଧି ପାଉଥିବାରୁ ଅନେକ ସ୍ଥାନରେ ପୋଲ ଉପରେ ପାଣି ପ୍ରବାହିତ ହୋଇ ଯାତାୟାତ ବାଧାପ୍ରାପ୍ତ ହୋଇଛି। ଜଙ୍ଗଲ ଓ ପାହାଡ଼ି ଅଞ୍ଚଳରେ ସବୁ ନଦୀନାଳରେ ଜଳପତ୍ତନ ବୃଦ୍ଧି ପାଇବାରେ ଲାଗିଛି। ଫଳରେ ରାସ୍ତା ଉପରେ ପାଣି ପ୍ରବାହିତ ହେଉଥିବାରୁ ଲୋକେ ଯାତାୟାତ କରିପାରୁନାହାନ୍ତି। ଅନେକ ଗାଁ ଓ ସାହିରେ ଲଗାଣ ବର୍ଷା ଯୋଗୁ ମାଟି ଘର ଭାଙ୍ଗିଯାଇଛି। ଜିଲାର ପ୍ରମୁଖ ବୈତରଣୀ ନଦୀରେ ଜଳ ପତ୍ତନ ବୃଦ୍ଧି ପାଇବାରେ ଲାଗିଛି। ଜିଲା ମୁଖ୍ୟାଳୟର ଭାଲୁକିପତଳା,ଜଗନ୍ନାଥପୁର, କାଶୀପୁର, ଟିକର ଗୁମୁରା ଆଦି ସାହିର ବହୁ ଲୋକ ଦୀର୍ଘ ତିନି ଧରି ପାଣି ଘେରରେ ରହିଛନ୍ତି। ନରଣପୁର ପେଟ୍ରୋଲ ପମ୍ପ ନିକଟରେ ଗଛ ଉପୁଡି ଏକ ଅଟୋ ଉପରେ ଖସି ପଡିଥିଲା। ଫଳରେ ଅଟୋରେ ଯାଉଥିବା ଯାତ୍ରୀମାନେ ଆହତ ହୋଇଛନ୍ତି। ଭାଟୁଣିଆ ମାଛ କାନ୍ଦଣା ପୋଲ, କାଦଗଡ ରେଲଓ୍ବେ ଫାଟକ, ଘସଡା ପୋଲ, ହାତୀକୁଚା ଝିଟିଙ୍ଗା ଓ ହାତୀକୁଚା ପୁରୁଣାସାହି ଆଦି ପୋଲ ଉପରେ ପାଣି ପ୍ରବହିତ ହେଉଛି। ହରିଚନ୍ଦନପୁର- ଦୈତାରୀ ରାସ୍ତାର ମୂଷଳ ନାଳ ପୋଲ ଉପରେ ୩ ଫୁଟ ପାଣି ପ୍ରବାହିତ ହେଉଥିବାରୁ ଯୋଗାଯୋଗ ବିଚ୍ଛିନ୍ନ ହୋଇଯାଇଛି।
