ନୂଆଦିଲ୍ଲୀ,୨୦।୧୦(ପି.ଟି.)- ଆସନ୍ତା ନଭେମ୍ବର ୩ ତାରିଖରୁ ବାଂଲାଦେଶ ଓ ଭାରତ ମଧ୍ୟରେ ୩ ମ୍ୟାଚ୍ ବିଶିଷ୍ଟ ଟି୨୦ ସିରିଜ୍ ଖେଳାଯିବ। ଏହି ସିରିଜ୍ ଲାଗି ଭାରତୀୟ ଅଧିନାୟକ ବିରାଟ କୋହଲିଙ୍କୁ ବିଶ୍ରାମ ଦିଆଯାଇପାରେ। ଗତବର୍ଷ ଅକ୍ଟୋବରଠାରୁ ଭାରତୀୟ ଦଳ ଏପର୍ଯ୍ୟନ୍ତ ୫୬ ଅନ୍ତର୍ଜାତୀୟ ମ୍ୟାଚ୍ ଖେଳିଛି। ଏଥିରୁ କୋହଲି ୪୮ ମ୍ୟାଚ୍ରେ ଅଂଶଗ୍ରହଣ କରିଛନ୍ତି। କାମର ବୋଝ ହ୍ରାସ କରିବା ଲାଗି କୋହଲିଙ୍କୁ ବିଶ୍ରାମ ଦିଆଯିବାର ସମ୍ଭାବନା ରହିଛି। କିନ୍ତୁ ଦକ୍ଷିଣ ଆଫ୍ରିକା ବିପକ୍ଷରେ ଚାଲିଥିବା ୩ୟ ଟେଷ୍ଟ ଶେଷ ହେବା ପରେ ଚୟନକର୍ତ୍ତାମାନେ ଏ ସମ୍ପର୍କରେ କୋହଲିଙ୍କ ସହ କଥା ହେବେ। ଟିମ୍ ଇଣ୍ଡିଆ ଅଧିନାୟକ କେଉଁଭଳି ଅନୁଭବ କରୁଛନ୍ତି, ତାହା ଉପରେ ଏହା ନିର୍ଭର କରେ। ନିଜ ଶରୀରକୁ ସେ ଆମଠୁ ଭଲ ଜାଣିଛନ୍ତି। ଯଦି ଦରକାର ସେ ଚୟନକର୍ତ୍ତାଙ୍କୁ ବିଶ୍ରାମ ପାଇଁ କହିପାରିବେ ବୋଲି ଚୟନ କମିଟି ନିକତର ସୂତ୍ରରୁ ଜଣାପଡ଼ିଛି। ବାଂଲାଦେଶ ବିପକ୍ଷ ସିରିଜ୍ ଲାଗି ଆସନ୍ତା ୨୪ ତାରିଖରେ ଭାରତୀୟ ଦଳ ଘୋଷଣା ହେବ। ଦିଲ୍ଲୀରେ ପ୍ରଥମ ଟି୨୦ ଖେଳାଯିବ। ପରବର୍ତ୍ତୀ ଦୁଇଟି ଟି୨୦ ମ୍ୟାଚ୍ ନଭେମ୍ବର ୭ ଓ ୧୦ ତାରିଖରେ ଅନୁଷ୍ଠିତ ହେବାର କାର୍ଯ୍ୟସୂଚୀ ରହିଛି। ଏହାପରେ ଦୁଇଟିକିଆ ଟେଷ୍ଟ ସିରିଜ୍ ଖେଳାଯିବ, ଯାହାକି ବିଶ୍ୱ ଟେଷ୍ଟ ଚାମ୍ପିୟନଶିପ୍ର ଅଂଶବିଶେଷ।