ନାଉଗାଁ,୫ା୧(ସ୍ବ.ପ୍ର.): ନାଉଗାଁ ବ୍ଲକ ଅନ୍ତର୍ଗତ ଶାଳିଜଙ୍ଗା ମହିମା ଆଶ୍ରମ ସମ୍ମୁଖରୁ ଦୁଇ ଦୁର୍ବୃତ୍ତ ଏକ ବାଇକ୍ ଡିକି ଭାଙ୍ଗି ୧ ଲକ୍ଷ ଟଙ୍କା ସହିତ ବ୍ୟାଙ୍କ ପାସବୁକ ଓ କିଛି ଗୁରୁତ୍ୱପୂର୍ଣ୍ଣ କାଗଜପତ୍ର ଲୁଟ୍ କରିଛନ୍ତି। ଏନେଇ ଶୁକ୍ରବାର ନାଉଗାଁ ଥାନାରେ ରଞ୍ଜିତ ଦାସ ନାମକ ବ୍ୟକ୍ତି ଅଭିଯୋଗ କରିଛନ୍ତି। ସେ ତାଙ୍କ ଅଭିଯୋଗରେ ଦର୍ଶାଇଛନ୍ତି, ମହିମା ଆଶ୍ରମର ମା’ ରିନାରାଣୀ ଦାସଙ୍କ ବ୍ୟାଙ୍କ ପାସବୁକରୁ ଉକ୍ତ ଆଶ୍ରମର ରଞ୍ଜତ୍ତ ଦାସ ଓ ମହେଶ ଜେନା ନାମଙ୍କ ଦୁଇ କର୍ମଚାରୀ ଡେରିକିସ୍ଥିତ ବ୍ୟାଙ୍କରୁ ଏକଲକ୍ଷ ଟଙ୍କା ଉଠାଇ ସେମାନଙ୍କ ସିଡି ଡିଲକ୍ସ ବାଇକ ଡିକିରେ ରଖିଥିଲେ। ପରେ ଆଶ୍ରମର ଜେନେରେଟର ଓ ଟ୍ରାକ୍ଟର ପାଇଁ ନାଉଗାଁର ଏସାର ପେଟ୍ରୋଲ ପମ୍ପରୁ ଡିଜେଲ ଆଣିଥିଲେ। ସେଠାରୁ ଆସି ଆଶ୍ରମ ସମ୍ମୁଖରେ ବାଇକ ରଖି ଡିଜେଲ ରଖିବାକୁ ଆଶ୍ରମ ଭିତରକୁ ଯାଇଥିଲେ। ବାହାରକୁ ଆସି ଦେଖିବା ବେଳକୁ ଦୁଇ ଅଚିହ୍ନା ଯୁବକ ତାଙ୍କ ବାଇକ ଡିକି ଭାଙ୍ଗି ଟଙ୍କା ଓ ସମସ୍ତ କାଗଜପତ୍ର ନେଇ ଏକ କଳା ପଲସରରେ ଫେରାର ହୋଇ ଯାଇଥିଲେ। ସ୍ଥାନୀୟ ଲୋକ ଏହା ଦେଖି ଡାକ ପକାଇଥିଲେ ମଧ୍ୟ ଉକ୍ତ ଦୁଇ ଯୁବକ ନାଉଗାଁ ଆଡକୁ ପଳାଇ ଯାଇଥିଲେ। ଅଭିଯୋଗ ପାଇବା ପରେ ଥାନା ପକ୍ଷରୁ ୧/୨୦ରେ ଏକ ମାମଲା ରୁଜୁ କରାଯାଇ ତଦନ୍ତ ଆରମ୍ଭ କରାଯାଇଥିବା ଥାନାଧିକାରୀ ପ୍ରଜ୍ଞା ରିତାମ୍ଭର କର ସୂଚନା ଦେଇଛନ୍ତି।