ପୁରୀ ଅଫିସ,୯ା୪: ପୁରୀ ଜିଲାରେ ଜଣେ କରୋନା ଆକ୍ରାନ୍ତ ଚିହ୍ନଟ ପରେ ଅଧିକ ସତର୍କ ହୋଇଯାଇଛି ଜିଲା ପ୍ରଶାସନ। ଆଗକୁ ଯେପରି ଏହି ସଂଖ୍ୟା ବୃଦ୍ଧି ନ ଘଟେ ସେଥିଲାଗି ପ୍ରଶାସନିକ ଅଧିକାରୀ ପ୍ରଚେଷ୍ଟା ଜାରି ରଖିଛନ୍ତି। ତେବେ ସାମାଜିକ ଦୂରତାକୁ ରକ୍ଷା କରିବା ଏବଂ ଯଥା ସମ୍ଭବ ଘରେ ରହିବା ଲାଗି ଜିଲାବାସୀଙ୍କୁ ପରାମର୍ଶ ଦିଆଯାଉଛି । ଜନସାଧାରଣଙ୍କ ସୁବିଧା ପାଇଁ ମଙ୍ଗଳାଘାଟ-ଷ୍ଟର୍ଲିଂ ବାଇପାସ୍ ରାସ୍ତାରେ ହୋଲ୍ସେଲ ପରିବା ମାର୍କେଟ ବସିବା ଲାଗି ବୁଧବାର ଜିଲା ପ୍ରଶାସନ ନିଷ୍ପତ୍ତି ନେଇଛି। ମଙ୍ଗଳାଘାଟଠାରୁ ଷ୍ଟର୍ଲିଂ ପଟକୁ ଗୋଟିଏ ପାର୍ଶ୍ୱ ରାସ୍ତାରେ ଆସନ୍ତା ଶୁକ୍ରବାରଠାରୁ ହୋଲ୍ସେଲ ପରିବା ମାର୍କେଟ ବସିବ ବୋଲି ସ୍ଥିର କରାଯାଇଛି। ବୁଧବାର ଜିଲାପାଳ ବଲୱନ୍ତ ସିଂ, ଏସ୍ପି ଉମାଶଙ୍କର ଦାଶ, ଉପଜିଲାପାଳ ଭବତାରଣ ସାହୁ,ପୌର ନିର୍ବାହୀ ଅଧିକାରୀ ବିଜୟ କୁମାର ଦାଶ ପ୍ରମୁଖ ଏହି ସ୍ଥାନ ବୁଲି ଦେଖିଛନ୍ତି ।
ବ୍ୟବସାୟୀ ଏବଂ ଗ୍ରାହକ ସାମାଜିକ ଦୂରତାକୁ ନ ମାନିବାରୁ ବଡ଼ଶଙ୍ଖ, ମାର୍କେଟ ଛକ ଏବଂ ଲକ୍ଷ୍ମୀ ବଜାର ପରିବା ମାର୍କେଟକୁ ଆସନ୍ତା ୧୪ ତାରିଖ ମଧ୍ୟରାତ୍ର ପର୍ଯ୍ୟନ୍ତ ବନ୍ଦ ରଖିଛି ପ୍ରଶାସନ। ଏହା ପରଠାରୁ ଦେବୀଗଡ଼ାରେ ପରିବା ବ୍ୟବସାୟୀ ବସୁଥିଲେ। କିନ୍ତୁ ସେଠାରେ କମ୍ ଜାଗା ଯୋଗୁ ଗହଳି ହେଉଥିଲା। ଏହାକୁ ଦୃଷ୍ଟିରେ ରଖି ବୁଧବାର ପ୍ରଶାସନିକ ଅଧିକାରୀ ପରିବା ବ୍ୟବସାୟ ଲାଗି ଜାଗା ଚିହ୍ନଟରେ ବାହାରିଥିଲେ। ପ୍ରଥମେ କୃଷକ ବଜାରକୁ ଯାଇଥିଲେ। ମାତ୍ର ସେଠାରେ ୨୫ହୋଲ୍ସେଲ ପରିବା ବ୍ୟବସାୟୀ ସାମାଜିକ ଦୂରତା ରଖି ବସିବା ପାଇଁ ପର୍ଯ୍ୟାପ୍ତ ଜାଗା ନ ଥିବାରୁ ମଙ୍ଗଳାଘାଟ-ଷ୍ଟର୍ଲିଂ ବାଇପାସ୍କୁ ବୁଲି ଦେଖିଥିଲେ। ବର୍ତ୍ତମାନ ଏହି ରାସ୍ତାରେ ଗାଡି ଚଳାଚଳ କରୁନାହିଁ । ତେଣୁ ଏହି ରାସ୍ତାରେ ୨୫ଜଣ ହୋଲ୍ସେଲ ପରିବା ବ୍ୟବସାୟୀ ବସିବେ । ପ୍ରତ୍ୟେକ ବ୍ୟବସାୟୀଙ୍କ ମଧ୍ୟରେ ୧୦ରୁ ୧୫ ଫୁଟ ଦୂରତା ରହିବ। କେବଳ ରିଟେଲରମାନେ ଏମାନଙ୍କଠାରୁ ପରିବା କିଣିବେ। ରିଟେଲରମାନେ ବିଭିନ୍ନ ସାହିଗଳିରେ ନେଇ ପରିବା ବିକ୍ରି କରିପାରିବେ । ସେହିପରି ୧୩ଟି ସ୍ବୟଂ ସହାୟକ ଗୋଷ୍ଠୀଙ୍କୁ ମଧ୍ୟ ଚିହ୍ନଟ କରାଯାଇଛି । ସେମାନେ ମଧ୍ୟ ଏହି ହୋଲସେଲ୍ ବ୍ୟବସାୟୀଙ୍କଠାରୁ ପରିବା କିଣି ନେଇ ସହରର ବିଭିନ୍ନ ସ୍ଥାନରେ ବିକ୍ରି କରିପାରିବେ ।