ନୂଆଗାଁ, ୧ା୫(ଡି.ଏନ.ଏ)- ସୁନ୍ଦରଗଡ ଜିଲା ନୂଆଗାଁ ବ୍ଲକ ବିଶ୍ରା ଥାନା ଅନ୍ତର୍ଗତ ବାରିଲେପ୍ଟା ଗ୍ରାମରେ ରହୁଥିବା ଯୁବ ବ୍ୟବସାୟୀ ହରିଦର୍ଶନ ସାହୁଙ୍କୁ ଗତ ୨୦୧୮ ମାର୍ଚ୍ଚ ୬ରେ ବାଗଡେଗା ସାପ୍ତାହିକ ହାଟରେ ଦିନଦ୍ୱିପ୍ରହରରେ କେତେକ ଦୁର୍ବୃତ୍ତ ଗୁଳିକରି ହତ୍ୟାକରିଥିଲେ। ଏହି ଘଟଣା ସେତେବେଳେ ସାଧାରଣରେ ଆତଙ୍କ ଖେଳାଇ ଦେଇଥିଲା। କିଛି ମାସ ପର୍ଯ୍ୟନ୍ତ ବାଗଡେଗା ସାପ୍ତାହିକ ହାଟକୁ ଲୋକେ ଯିବା ଆସିବା ମଧ୍ୟ କମ୍ କରିଦେଇଥିଲେ। ଦିନ ଦ୍ୱିପ୍ରହରରେ ଜଣେ ଯୁବ ବ୍ୟବସାୟୀଙ୍କୁ ପୁଣି ସାପ୍ତାହିତ ହାଟପାଳି ଦିନ ଗୁଳିକରି ଫେରାର୍ ହୋଇଯାଇଥିବା ଦୁର୍ବୃତ୍ତମାନଙ୍କୁ ଖୋଜିବା ବା ସେମାନଙ୍କୁ ଠାବ କରିବା ନେଇ ପୋଲିସ ସେତେବେଳେ ତତ୍ପରତା ଦେଖାଇଥିଲେ। ହେଲେ କିଛି ଦିନ ପରେ ପୋଲିସ ହଠାତ ନିଜ ତଦନ୍ତକୁ ଧିମେଇ ଯାଇଥିଲା। ଫଳରେ ଆଜକୁ ବର୍ଷେ ଉପରେ ହେଲା ହରିଦର୍ଶନ ସାହୁଙ୍କ ହତ୍ୟାକାରୀଙ୍କୁ ଠାବ କରିବାରେ ପୋଲିସ ସମ୍ପୂଣ୍ଣ ବିଫଳ ହୋଇଛି। ଏହି ଗୁଳିକାଣ୍ଡ ଘଟଣାରେ ଝାଡଖଣ୍ଡ ଅଞ୍ଚଳର ଦୁର୍ଦ୍ଦାନ୍ତ ସଙ୍ଗଠନ ପିଏଲ୍ଏଫ୍ଆଇର ହାତ ଥାଇପାରେ ବୋଲି ପୋଲିସ ଅନୁମାନ କରିଛି। ଦୀର୍ଘ ଏକବର୍ଷ ହେଲା ଉକ୍ତ ଘଟଣାରେ କୌଣସି ଦୁର୍ବୃତ୍ତ ଗିରଫ ନ ହେବା ଯୋଗୁ ମୃତକଙ୍କ ପରିବାର ପକ୍ଷରୁ ଉଦ୍ବେଗ ପ୍ରକାଶ କରାଯାଇଛି। ହରିଦର୍ଶନଙ୍କ ଭାଇ ସୁରେଶ ସାହୁ ଓ ତାଙ୍କ ସ୍ତ୍ରୀ ରାଜମୁନି ପୋଲିସର କାର୍ଯ୍ୟକଳାପ ପ୍ରତି ଆଙ୍ଗଳି ଉଠାଇଥିବାବେଳେ ଏହି ଘଟଣାର ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି। ଏସ୍ପି, ଜିଲାପାଳ ତଥା ଉଚ୍ଚ ପଦାଧିକାରୀଙ୍କୁ ସାକ୍ଷାତ କରିବେ ବୋଲି ସେମାନେ ପ୍ରକାଶ କରିଛନ୍ତି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ହରିଦର୍ଶନଙ୍କୁ କିଏ ଓ କେଉଁଥି ପାଇଁ ହତ୍ୟାକଲେ ତାହା କେବଳ ସନ୍ଦେହ ଭାବରେ ରହିଯାଇଛି। ସାଧାରଣରେ ଏହି ଘଟଣାକୁ ନେଇ ଅନେକ କଥା ଶୁଣିବାକୁ ମିଳୁଛି। କିଏ କହୁଛନ୍ତି ବ୍ୟବସାୟୀକ କାରଣରୁ ପ୍ରତିପକ୍ଷ ହିଂସାରେ ଏଭଳି ଘଟଣା ଘଟାଇ ପାରନ୍ତି ତ ଆଉ କାହା ମୁହଁରୁ ଶୁଣିବାକୁ ମିଳୁଛି ସେ ଯେଉଁ ନେଟୱାର୍କ କାମ କରୁଥିଲେ ସେଥିରେ ଟଙ୍କା ନେଣଦେଣକୁ ନେଇ କେତେକ ଲୋକ ସହ ଶତ୍ରୁତା ଥିଲା । ଏଭଳି ବିଭିନ୍ନ ପାରିପାର୍ଶିକ କୁହାଶୁଣା କଥାକୁ ନେଇ ନାନା କଥା ଉଠୁଛି। ହେଲେ ବାସ୍ତବ କଣ ଏପର୍ଯ୍ୟନ୍ତ ଜଣାପଡିନାହିଁ। ଯେ ପର୍ଯ୍ୟନ୍ତ ପୋଲିସ ଉକ୍ତ ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତଙ୍କୁ ଗିରଫ ନ କରିଛି, ସେ ପର୍ଯ୍ୟନ୍ତ ଗୁଳିକାଣ୍ଡର ପ୍ରକୃତ କାରଣ ଜଣାପଡିବ ନାହିଁ। ସାଧାରଣ ଲୋକେ ଓ ପରିବାର ପକ୍ଷରୁ ମିଳିଥିବା ସୂଚନା ମୁତାବକ ବାଗଡେଗା ଗ୍ରାମର ମୂଳବାସିନ୍ଦା ହରିଦର୍ଶନ ସାହୁ କିଛି ବର୍ଷ ହେଲା ବାରିଲେପ୍ଟା ଗ୍ରାମରେ ଜାଗାକିଣି ସେଠାରେ ନିଜ ପରିବାର ସହ ରହୁଥିଲେ। ନିଜ ସ୍ତ୍ରୀ ରାଜମୁନୀଙ୍କ ସହିତ ୨ଝିଅ ଓ ଗୋଟିଏ ପୁଅଙ୍କୁ ନେଇ ତାଙ୍କ ପରିବାର। ବାରିଲେପ୍ଟା ଗାଁରେ ଗୋଟିଏ ଛୋଟ ତେଜରାତି ଦୋକାନ ଦେବା ସହ ଧାନ ବ୍ୟବସାୟ କରି ବେଶ ସୁରୁଖୁରୁରେ ପରିବାର ଚଳାଉଥିଲେ ସେ। ନିଜ ଭଲ ବ୍ୟବସାୟ ଯୋଗୁ ତିନି ପିଲାଙ୍କୁ ପାଠ ମଧ୍ୟ ପଢ଼ାଇଥିଲେ । ବର୍ତ୍ତମାନ ଗୋଟିଏ ଝିଅ ଯୁକ୍ତ ଦୁଇ ପ୍ରଥମ ବର୍ଷ ପରୀକ୍ଷା ଦେଇଥିବା ବେଳେ ଅନ୍ୟ ଝିଅ ମାଟ୍ରିକ ପରୀକ୍ଷା ଦେଇଛି ଓ ପୁଅ ଡିପ୍ଲୋମା କରୁଛି। ହରିଦର୍ଶନଙ୍କ ମୃତ୍ୟୁ ପରେ ମଧ୍ୟ ତାଙ୍କ ସ୍ତ୍ରୀ ରାଜମୁନୀ ଓ ଭାଇ ସୁରେଶ ଯଥାସାଧ୍ୟ ପିଲାମାନଙ୍କୁ ପଢ଼ାଇବାରେ ଉଦ୍ୟମ ଜାରି ରଖିଛନ୍ତି। ବର୍ତ୍ତମାନେ ସେ ମାଆ ଓ ବାପା ଉଭୟ ଭୂମିକାରେ ରହି ପିଲାଙ୍କୁ ପାଠପଢ଼ିବା ପାଇଁ ଉତ୍ସାହିତ ଜାରି ରଖିଛନ୍ତି। ହେଲେ ହରିଦର୍ଶନଙ୍କ ମୃତ୍ୟୁପରେ ପରିବାର ଚଳାଇ ପିଲାଙ୍କୁ ପାଠପଢ଼ାଇବା ସମସ୍ୟାକୁ ସେ ଅନୁଭବ କଲେଣି । ଗୋଟିଏ ପଟେ ପୋଲିସ ହରିଦର୍ଶନଙ୍କ ହତ୍ୟାକାରୀଙ୍କୁ ଠାବ କରିବାରେ ବିଫଳ ହୋଇଥିବା ବେଳେ ସ୍ଥାନୀୟ ପ୍ରଶାସନ ମଧ୍ୟ ସମ୍ପୂର୍ଣ୍ଣ ନୀରବ।