ଠାକୁରମୁଣ୍ଡା, ୨୮।୩ (ଡି.ଏନ୍.ଏ.): କରୋନା ଭାଇରସ୍ ସଂକ୍ରମଣକୁ ନେଇ ସାରା ବିଶ୍ୱ ଚିନ୍ତାରେ ଥିବାବେଳେ ମୟୂରଭଞ୍ଜ ଜିଲା କରଞ୍ଜିଆ ବନଖଣ୍ଡ ଠାକୁରମୁଣ୍ଡା ରେଞ୍ଜ ଚମ୍ପାଝର ଫରେଷ୍ଟ ବିଟ୍ ଅଞ୍ଚଳବାସୀ ଏବେ ବାଘକୁ ନେଇ ଭୟଭୀତ ହୋଇପଡ଼ିଛନ୍ତି। ଗୁରୁବାର ବିଳମ୍ବିତ ରାତିରେ ଠାକୁରମୁଣ୍ଡା-ଶରତ ମୁଖ୍ୟ ରାସ୍ତାରେ ଏକ ମଇଁଷି ପଲକୁ ବାଘ ଆକ୍ରମଣ କରିଛି। ଏଥିରେ ଏକ ଅଣ୍ଡିରା ମଇଁଷି ଗୁରୁତର ହୋଇଛି। ଏହି ସମୟରେ ଉକ୍ତ ରାସ୍ତାଦେଇ ଯାଉଥିବା ୧୦୮ ଆମ୍ବୁଲାନ୍ସ ଏହା ଦେଖି ସେଠାରେ ଅଟକି ଯାଇଥିଲା। ଫଳରେ କିଛି ସମୟ ପରେ ବାଘ ଉକ୍ତ ସ୍ଥାନ ଛାଡି ପଳାଇଯାଇଥିଲା। ୧୦୮ କର୍ମଚାରୀଙ୍କଠାରୁ ଖବର ପାଇ ସ୍ଥାନୀୟ ଲୋକେ ଘଟଣାସ୍ଥଳରେ ପହଞ୍ଚି ମଇଁଷିକୁ ଉଦ୍ଧାର କରିବା ସହ ବନବିଭାଗକୁ ଖବର ଦେଇଥିଲେ। ବନବିଭାଗ କର୍ମଚାରୀ ପ୍ରାଣୀ ବିଭାଗ କର୍ମଚାରୀଙ୍କ ସହାୟତାରେ ମଇଁଷିର ଚିକିତ୍ସା କରିଛନ୍ତି। ବାଘ ଆକ୍ରମଣର ଶିକାର ମଇଁଷି ନିକଟ ଡଙ୍ଗାଡିହା ଗ୍ରାମର ଲକ୍ଷ୍ମଣ ହୋତାଙ୍କର ବୋଲି ଜଣାପଡିଛି। ତେବେ ଉକ୍ତ ବାଘ କଲରପତରିଆ ବୋଲି ବନପାଳ ଗିରିଜା ନନ୍ଦନ ଦଳେଇ କହିଛନ୍ତି ।