![](https://www.dharitri.com/wp-content/uploads/2019/08/IMG_20190803_174853-1568x723.jpg)
ଚନ୍ଦ୍ରଗିରି,୪।୮(ଡି.ଏନ୍.ଏ.): ଉଭୟ କେନ୍ଦ୍ର ଓ ରାଜ୍ୟ ସରକାର ଗ୍ରାମାଞ୍ଚଳର ବିକାଶ ଲାଗି ବିଭିନ୍ନ ଯୋଜନା ମାଧ୍ୟମରେ ଖର୍ଚ୍ଚ କରୁଛନ୍ତି କୋଟି କୋଟି ଟଙ୍କା। ଉଦ୍ଦେଶ୍ୟ ରହିଛି ଗାଁର ବିକାଶ, ଦେଶର ବିକାଶ କିନ୍ତୁ ଆଜି ମଧ୍ୟ ଏପରି ଗାଁ ଅଛି ଯେଉଁଠି ବିକାଶ ଅପହଞ୍ଚ ହୋଇଛି। ବିଭାଗୀୟ ଅଧିକାରୀ ହେଉ ବା ଜନପ୍ରତିନିଧିଙ୍କ ଉଦାସୀନତା ତଥା ଦାୟିତ୍ୱହୀନତା ଯୋଗୁ ବାସ୍ତବରେ ବିକାଶଠାରୁ ବହୁ ଦୂରକୁ ଚାଲିଯାଉଛି ଗାଁ। ଗାଁକୁ ସଂଯୋଗ କରୁଥିବା ନଦୀ/ନାଳ ଉପରେ ପୋଲ ଟିଏ ନ ଥିବାରୁ କାଠପୋଲରେ ବିପଦପୂର୍ଣ୍ଣ ଭାବେ ଯାତାୟାତ କରୁଛନ୍ତି ଛାତ୍ରୀଛାତ୍ର ଓ ଅଞ୍ଚଳବାସୀ। ଏଭଳି ବିକାଶର ଦିଗହରା ଦୃଶ୍ୟ ଦେଖିବାକୁ ମିଳିଛି ଗଜପତି ଜିଲା ମୋହନା ବ୍ଲକ ଚାନ୍ଦିପୁଟ ପଞ୍ଚାୟତର ବାଙ୍କିଝୁଳା ଗ୍ରାମରେ। ଏହି ଗାଁକୁ ପୋଲ ଟିଏ ନ ଥିବାରୁ ଛାତ୍ରୀଛାତ୍ର କାଠ ପୋଲଦେଇ ବିପଦପୂର୍ଣ୍ଣ ଭାବେ ପ୍ରତିଦିନ ବିଦ୍ୟାଳୟକୁ ଯାଉଛନ୍ତି। ଏହି ପୋଲ ଉପରେ ବହୁ ବର୍ଷ ଧରି ବାଙ୍କିଝୋଳା, ଚଡିଆପଦା, ଜକରାପଲି ଗ୍ରାମ ସମେତ ଚାରୋଟି ପଞ୍ଚାୟତର ଲୋକେ ନିର୍ଭର କରିଆସୁଛନ୍ତି। ଗତ ଫାଇଲିନ ବାତ୍ୟାରେ ଏହି ପୋଲଟିର ଦୁଇ ପାର୍ଶ୍ୱ ଖାଇଯାଇଥିବା ବେଳେ ଏହା ଉପରେ କାଠ ପୋଲ ପକାଇ ଯାତାୟାତ କରୁଥିଲେ ଲୋକେ। ମାତ୍ର ଗତ ତିତିଲି ବାତ୍ୟାରେ ପୋଲଟି ଭାସିଯାଇଥିଲା । ସେହି ଦିନଠାରୁ ଅଞ୍ଚଳବାସୀ ପୁଣି ଉକ୍ତ ଭଙ୍ଗା ପୋଲ ଉପରେ କାଠ ପକାଇ ଯାତାୟାତ କରୁଛନ୍ତି । ଏହା ସହ ସାମାନ୍ୟବର୍ଷା ହେଲେ ନାଳର ଜଳସ୍ତର ବଢ଼ିଗଲେ ବାହ୍ୟଜଗତରୁ ବିଚ୍ଛିନ୍ନ ହୋଇଯାଉଛନ୍ତି ଅଞ୍ଚଳବାସୀ । ଉକ୍ତ ରାସ୍ତା ଉପରେ ପୁନଃ ପୋଲଟି ନିର୍ମାଣ ପାଇଁ ଜନପ୍ରତିନିଧିଙ୍କ ସମେତ ବିଭାଗୀୟ ଉଚ୍ଚ ପଦସ୍ଥ ଅଧିକାରୀଙ୍କୁ ବାରମ୍ବାର ଜଣାଇ ଆସୁଥିଲେ ମଧ୍ୟ କୌଣସି ସୁଫଳ ମିଳୁ ନ ଥିବା ଅଞ୍ଚଳବାସୀ ଅଭିଯୋଗ କରିଛନ୍ତି ।