ଫୁଲବାଣୀ ଅଫିସ/ଫିରିଙ୍ଗିଆ,୩ା୯- କନ୍ଧମାଳ ଜିଲା ଫିରିଙ୍ଗିଆ ଥାନା ଅଞ୍ଚଳରେ ବାଙ୍ଗାଲୋରରୁ ଫେରିଥିବା ଜଣେ ଯୁବକଙ୍କୁ ହତ୍ୟା କରାଯାଇଛି। ମୃତକ ହେଲେ କାଶିନିପଦର ପଞ୍ଚାୟତ ତଳପଡା ଗ୍ରାମର ବିମଳ କହଁର (୨୨) ା ଫିରିଙ୍ଗିଆ ପଞ୍ଚାୟତ ତଣ୍ଡ୍ରିଗାଁ ନାଳ ପାଖ ବିଲରୁ ସୋମବାର ତାଙ୍କ ମୃତଦେହ ମିଳିଛି। ବିମଳଙ୍କ ବେକକୁ ହଣାଯାଇଥିବା ବେଳେ ମୁହଁ ଛେଚି ଦିଆଯାଇଛି। ତେବେ କେଉଁ ପରିସ୍ଥିତିରେ ତାଙ୍କୁ ହତ୍ୟା କରାଯାଇଛି, ସେ ନେଇ ପୋଲିସ ଖୋଳତାଡ ଆରମ୍ଭ କରିଛି ା ମୃତଦେହ ଜବତ କରାଯାଇ ଜିଲା ମୁଖ୍ୟ ଚିକିତ୍ସାଳୟରେ ବ୍ୟବଚ୍ଛେଦ କରାଯାଇଛି। ଏ ନେଇ ଫିରିଙ୍ଗିଆ ଥାନାରେ ନଂ. ୭୬/୧୯ରେ ଏକ ହତ୍ୟା ମାମଲା ରୁଜୁ ହୋଇଛି ।
ତଳପଡା ଗ୍ରାମର କିତି କହଁରଙ୍କ ପୁଅ ବିମଳ ୫/୬ ବର୍ଷ ହେଲା ବାଙ୍ଗାଲୋରରେ ରହି ଶ୍ରମିକ କାର୍ଯ୍ୟ କରୁଥିଲେ। ଶୁକ୍ରବାର ବିମଳଙ୍କ ସହ ତାଙ୍କ ବାପା ଫୋନ ଯୋଗେ କଥା ହୋଇ ଘରକୁ ଆସିବାକୁ କହିଥିଲେ ା ଆଧାର କାର୍ଡ ଆଣି ଆସିଲେ ବ୍ଲକରେ କାମ ଅଛି ବୋଲି କହିଥିଲେ। ହେଲେ ବିମଳ ଗାଁକୁ ନ ଆସି ଫୋନ ହ୍ବାଟ୍ସ ଆପ୍ରେ ଆଧାର ଫଟୋ ପଠାଇ ଦେବେ ବୋଲି କହିଥିଲେ। ସୋମବାର ତଣ୍ଡ୍ରିଗାଁ ନାଳ ପାଖରେ ଜଣେ ଯୁବକଙ୍କୁ ହତ୍ୟା କରାଯାଇଥିବା ଖବର ପ୍ରଚାରିତ ହୋଇଥିଲା ା ପୋଲିସ ଘଟଣାସ୍ଥଳରେ ପହଞ୍ଚି ପଚରାଉଚରା କରିବାରୁ ଯୁବକ ଜଣକ ତଳପଡା ଗ୍ରାମର ବିମଳ ବୋଲି ଜଣାପଡିଥିଲା ା ପୋଲିସ ତାଙ୍କ ଘରକୁ ଖବର ଦେବାରୁ ବାପା ଆସି ମୃତଦେହ ଚିହ୍ନଟ କରିଥିଲେ ା ବାପା କିତି କହିଛନ୍ତି, ବିମଳ ଘରକୁ ଆସିବାକୁ ମନା କରିଥିଲା ା ବାଙ୍ଗାଲୋରରୁ ଫେରୁଥିବା ସମ୍ପର୍କରେ କିଛି ଜଣାଇନି। ପୂର୍ବରୁ କାହା ସହିତ ସେପରି ଶତ୍ରୁତା ନ ଥିଲେ ମଧ୍ୟ ପୁଅକୁ କିଏ ଏଭଳି ବୀଭତ୍ସ ଭାବେ ହତ୍ୟା କରିଛନ୍ତି, ତାହାର ତଦନ୍ତ କରାଯାଉ ବୋଲି କିତି କହିଛନ୍ତି। ଥାନାଧିକାରୀ ପି.ଶ୍ୟାମସୁନ୍ଦର ରାଓ କହିଛନ୍ତି, ପାରିପାର୍ଶ୍ୱିକ ସ୍ଥିତିରୁ ଏହା ଏକ ହତ୍ୟାକାଣ୍ଡ ବୋଲି ଜଣାପଡୁଛି। ବିଭିନ୍ନ ଦିଗକୁ ନେଇ ତଦନ୍ତ ଚାଲିଛି।
