ବେଙ୍ଗାଲୁରୁ/ନୂଆଦିଲ୍ଲୀ,୮ା୭: କର୍ନାଟକରେ ଶାସକ କଂଗ୍ରେସ ଓ ଧର୍ମନିରପେକ୍ଷ ଜନତା ଦଳ (ଜେଡିଏସ୍) ମେଣ୍ଟର ବିଧାୟକମାନେ ଇସ୍ତଫା ଦେବା ପରେ ତେରମାସିଆ ସରକାର ଉପରେ ଘନକଳାବାଦଲ ଉଠିଛି। ମୁଖ୍ୟମନ୍ତ୍ରୀ ଏଚ୍.ଡି. କୁମାରସ୍ବାମୀ ରବିବାର ରାତିରେ ଆମେରିକାରୁ ଫେରିବା ପରେ ଏହି ସଙ୍କଟକୁ ଟାଳିବା ପାଇଁ ପ୍ରାଣପଣେ ଉଦ୍ୟମ ଚଳାଇଛନ୍ତି। ପୂର୍ବତନ ପ୍ରଧାନମନ୍ତ୍ରୀ ତଥା ଜେଡିଏସ୍ ସୁପ୍ରିମୋ ଏଚ୍.ଡି. ଦେବେଗୌଡ଼ା ପୁଅ କୁମାରସ୍ବାମୀଙ୍କୁ ଇସ୍ତଫା ନ ଦେଇ ଶକ୍ତିପରୀକ୍ଷାର ସମ୍ମୁଖୀନ ହେବାକୁ ପରାମର୍ଶ ଦେଇଛନ୍ତି। ବେଙ୍ଗାଲୁରୁସ୍ଥିତ ଏକ ହୋଟେଲରେ ମାରାଥନ୍ ବୈଠକ ଚାଲିଥିବାବେଳେ ସୋମବାର କ୍ୟାବିନେଟ ବୈଠକ ପରେ ଭବିଷ୍ୟତ କାର୍ଯ୍ୟପନ୍ଥା ନେଇ କୁମାରସ୍ବାମୀ ଚୂଡ଼ାନ୍ତ ନିଷ୍ପତ୍ତି ନେବେ। ଅନ୍ୟପକ୍ଷରେ ଭାଜପା ବାଚସ୍ପତିଙ୍କ ନିଷ୍ପତ୍ତିକୁ ଅପେକ୍ଷା କରିଥିବାବେଳେ କଂଗ୍ରେସ ବରିଷ୍ଠ ନେତା ମଲ୍ଲିକାର୍ଜୁନ ଖାର୍ଗେଙ୍କୁ ମୁଖ୍ୟମନ୍ତ୍ରୀ କରିବାକୁ ପରୋକ୍ଷରେ ଦାବି କରିଥିବା କୁହାଯାଉଛି। ଏହି ରାଜନୈତିକ ସଙ୍କଟରୁ କର୍ନାଟକରେ ଛକାପଞ୍ଝା ଆରମ୍ଭ ହୋଇଯାଇଛି।
କର୍ନାଟକର ରାଜନୈତିକ ଘଟଣାକ୍ରମକୁ ନେଇ ଏଆଇସିସି ସାଧାରଣ ସମ୍ପାଦକ କେ.ସି. ବେଣୁଗୋପାଳ ବେଙ୍ଗାଲୁରୁରେ ଡେରା ପକାଇ ଉପମୁଖ୍ୟମନ୍ତ୍ରୀ ଜି. ପରମେଶ୍ୱର, ମନ୍ତ୍ରୀ ଡି.କେ. ଶିବକୁମାର ଏବଂ କେପିସିସି କାର୍ଯ୍ୟକାରୀ ସଭାପତି ଈଶ୍ୱର ଖଣ୍ଡରେଙ୍କ ସହ ଘନଘନ ବୈଠକ କରୁଛନ୍ତି। ପୂର୍ବତନ ମୁଖ୍ୟମନ୍ତ୍ରୀ ସିଦ୍ଦାରାମାୟା ମଙ୍ଗଳବାର ବିଧାୟକ ଦଳ ବୈଠକ ଡାକିଛନ୍ତି। ଇସ୍ତଫା ଦେଇଥିବା କଂଗ୍ରେସ ବିଧାୟକମାନେ ବୈଠକକୁ ନ ଆସିଲେ ଗମ୍ଭୀର ପରିଣାମ ଭୋଗିବେ ବୋଲି ସେ ଚେତାବନୀ ଦେଇଛନ୍ତି। ଦିନେ ଦୁଇଦିନ ମଧ୍ୟରେ ଆହୁରି କେତେଜଣ ବିଧାୟକ ଇସ୍ତଫା ଦେବାକୁ ଯାଉଥିବାରୁ ଏହି ବୈଠକକୁ ବିଶେଷ ଗୁରୁତ୍ୱପୂର୍ଣ୍ଣ ମନେକରାଯାଉଛି। ସେପଟେ ମୁମ୍ବାଇର ଏକ ହୋଟେଲରେ ରହିଥିବା ଅସନ୍ତୁଷ୍ଟ ବିଧାୟକମାନେ ଇସ୍ତଫାପତ୍ର ପ୍ରତ୍ୟାହାର କରିବେ ନାହିଁ କି ବିଧାୟକ ଦଳ ବୈଠକରେ ଯୋଗଦେବେ ନାହିଁ ବୋଲି ରବିବାର ସ୍ପଷ୍ଟ କରିଛନ୍ତି। କଂଗ୍ରେସ ନେତା ମଲ୍ଲିକାର୍ଜୁନ ଖାର୍ଗେ କହିଛନ୍ତି, ମେଣ୍ଟ ଭାଙ୍ଗି ସରକାରର ପତନ ଘଟାଇବା ଲାଗି ଭାଜପା ଷଡ଼ଯନ୍ତ୍ର ରଚୁଛି। ମହମ୍ମଦ ବିନ୍ ତୋଗ୍ଲକ୍ ପରେ ନରେନ୍ଦ୍ର ମୋଦି ନାମରେ ସମାନ ପ୍ରକୃତିର ଆଉ ଜଣେ ବ୍ୟକ୍ତି ଆସିଛନ୍ତି ବୋଲି ଖାର୍ଗେ ଟୁଇଟ୍ କରିଛନ୍ତି। ସେହିପରି ତାଙ୍କୁ କର୍ନାଟକର ମୁଖ୍ୟମନ୍ତ୍ରୀ କରାଯିବା ପାଇଁ କଂଗ୍ରେସ ପକ୍ଷରୁ ଦାବି କରାଯାଉଥିବା ଖବରକୁ ସେ ଖଣ୍ଡନ କରିଛନ୍ତି।
ପ୍ରକାଶ ଯେ, କଂଗ୍ରେସର ୯ ଏବଂ ଜେଡିଏସ୍ର ୩ ବିଧାୟକ ଶନିବାର ବାଚସ୍ପତି କେ.ଆର. ରମେଶ କୁମାରଙ୍କୁ ଇସ୍ତଫା ଦେଇ ରାଜ୍ୟପାଳ ଭଜୁଭାଇ ଭାଲାଙ୍କୁ ଭେଟିବା ପରେ ମୁମ୍ବାଇ ଯାଇଥିଲେ। ଏହା ପୂର୍ବରୁ କଂଗ୍ରେସର ଆଉ ଜଣେ ବିଧାୟକ ମଧ୍ୟ ଇସ୍ତଫା ଦେଇଥିଲେ। ଫଳରେ ୨୨୪ ସଦସ୍ୟ ବିଶିଷ୍ଟ ବିଧାନସଭାରେ ୧୧୮ ବିଧାୟକଙ୍କୁ ନେଇ ଚାଲିଥିବା ମେଣ୍ଟ ସରକାର ସଂଖ୍ୟାଲଘୁରେ ପରିଣତ ହେବାର ଆଶଙ୍କା ସୃଷ୍ଟି ହୋଇଛି। ଏମାନଙ୍କ ଇସ୍ତଫା ଗୃହୀତ ହେଲେ ମେଣ୍ଟର ବିଧାୟକ ସଂଖ୍ୟା ୧୦୩କୁ ଖସିଯିବ। ଏଭଳି ସମୟରେ ଭାଜପା ବାଚସ୍ପତିଙ୍କ ନିଷ୍ପତ୍ତିକୁ ଅପେକ୍ଷା କରିଥିବା ପୂର୍ବତନ ମୁଖ୍ୟମନ୍ତ୍ରୀ ବି.ଏସ୍. ୟେଦୁରପ୍ପା ସୂଚନା ଦେଇଛନ୍ତି। ଶାସକ ମେଣ୍ଟର ବିଧାୟକଙ୍କ ଇସ୍ତଫା ପଛରେ ଭାଜପାର ହାତ ଥିବା ଅଭିଯୋଗକୁ ସେ ଖଣ୍ଡନ କରି ଦଳର କେନ୍ଦ୍ରୀୟ ନେତୃତ୍ୱ ଏହି ଘଟଣାକ୍ରମ ଉପରେ ତୀକ୍ଷ୍ଣ ନଜର ରଖିଥିବା କହିଛନ୍ତି।