ବରଗଡ଼ ଅଫିସ୍,୭।୫- ଝାଡ଼ଖଣ୍ଡ ରାଜ୍ୟ ସିମଡେଗା ଅଞ୍ଚଳର ଜଣେ ମହିଳା ତାଙ୍କ ଶିଶୁପୁତ୍ରଙ୍କୁ ଧରି ବାଟବଣା ହୋଇ ବରଗଡ଼ ଜିଲା ପଦ୍ମପୁର ଉପଖଣ୍ଡ ଅଞ୍ଚଳକୁ ଚାଲି ଆସିଛନ୍ତି । ତେବେ ଶିଶୁଙ୍କୁ ଧରି ମହିଳା ଜଣକ ଅସହାୟ ଅବସ୍ଥାରେ ବୁଲାବୁଲି କରୁଥିବାବେଳେ ପାଇକମାଲ ଅନ୍ତର୍ଗତ କାଂସଡ଼ା ପଞ୍ଚାୟତର ସରପଞ୍ଚ ଯୁଧିଷ୍ଠିର ସାହୁ ସେମାନଙ୍କୁ ପ୍ରାୟ ଦେଢ଼ମାସ ହେଲା ଆଶ୍ରୟ ଦେଇ ଅନ୍ୟମାନଙ୍କ ପାଇଁ ଦୃଷ୍ଟାନ୍ତ ସାଜିଛନ୍ତି । ସେହିପରି ବିଜେପୁର ବ୍ଲକ ଯୋଖିପାଲି ଗ୍ରାମର ସାମାଜିକ କର୍ମୀ ଦିବସ କୁମାର ସାହୁ ଘଟଣାକୁ ନେଇ ଝାଡ଼ଖଣ୍ଡ ରାଜ୍ୟ ସରକାରଙ୍କୁ ଟୁଇଟ୍ କରି ସେହି ମହିଳା ଓ ଶିଶୁଙ୍କୁ ଉଦ୍ଧାର କରି ସେମାନଙ୍କ ଘରକୁ ପହଞ୍ଚାଇବା ଦିଗରେ ପଦକ୍ଷେପ ନେବାକୁ ଅନୁରୋଧ କରିଛନ୍ତି ।
ସୂଚନା ଅନୁଯାୟୀ, ମହିଳା ଜଣକ ନିଜ ଶିଶୁକୁ ଧରି କାଂସଡ଼ା ଅଞ୍ଚଳରେ ଅସହାୟ ଅବସ୍ଥାରେ ବୁଲାବୁଲି କରୁଥିଲେ । ତେବେ ଗତ ମାର୍ଚ୍ଚ ୨୬ତାରିଖ ମହୁଲ ଗୋଟାଇବା ପାଇଁ ଯାଇଥିବା କିଛି ଲୋକେ ସେମାନଙ୍କୁ ଦେଖିଥିଲେ ଏବଂ କରୋନା ସଂକ୍ରମଣ ନେଇ ଭୟଭୀତ ହୋଇ ପଡ଼ିଥିଲେ । ଏ ନେଇ ସ୍ଥାନୀୟ ସରପଞ୍ଚ ସାହୁଙ୍କ ଦୃଷ୍ଟି ଆକର୍ଷଣ କରାଯାଇଥିଲା । ଏହାପରେ ସରପଞ୍ଚ ପାଇକମାଲ ଥାନା ଅଧିକାରୀଙ୍କୁ ସେ ସମ୍ପର୍କରେ ଅବଗତ କରିବା ସହିତ ସେମାନଙ୍କୁ ଉଦ୍ଧାର କରି କ୍ବାରାଣ୍ଟାଇନ ସେଣ୍ଟରରେ ଆଶ୍ରୟ ଦେଇଥିଲେ । ଏହା ସହିତ ମହିଳା, ଶିଶୁଙ୍କୁ ସୁରକ୍ଷା ପାଇଁ ୨ଜଣ ଜଗୁଆଳି ଏବଂ ରନ୍ଧାଖାଦ୍ୟ ଯୋଗାଇବା ପାଇଁ ଜଣେ ରୋଷେୟାର ବ୍ୟବସ୍ଥା କରିଥିଲେ।
ତେବେ କ୍ବାରେଣ୍ଟାଇନ ସେଣ୍ଟରରେ ୧୪ଦିନ ରହିବା ପରେ ସରପଞ୍ଚ ସାହୁ ସମ୍ପୃକ୍ତ ମହିଳା ଓ ଶିଶୁଙ୍କୁ ସେମାନଙ୍କ ନିଜ ଗାଁ ସିମଡ଼େଗାକୁ ପଠାଇବା ପାଇଁ ତହସିଲଦାର, ବିଡ଼ିଓ ଏବଂ ପଦ୍ମପୁର ଉପଜିଲାପାଳଙ୍କୁ ଅନୁରୋଧ କରିଥିଲେ । ମାତ୍ର ଏ ପର୍ଯ୍ୟନ୍ତ କିଛି ସୁଫଳ ମିଳିପାରି ନାହିଁ । ଏହି ଖବର ଜାଣିବା ପରେ ସାମାଜିକ କର୍ମୀ ସାହୁ ଝାଡ଼ଖଣ୍ଡ ରାଜ୍ୟ ସରକାରଙ୍କ ଦୃଷ୍ଟି ଆକର୍ଷଣ କରିଥିଲେ । ଏହାପରେ ଝାରଖଣ୍ଡ ପୋଲିସ ଫୋନ ଯୋଗେ ତଥ୍ୟ ମାଗିଥିଲେ। ସମ୍ପୃକ୍ତ ମହିଳା, ଶିଶୁଙ୍କୁ କୋଭିଡ୍ ହେଲ୍ପଲାଇନ୍ ନମ୍ବରରେ ଯୋଗାଯୋଗ କରି ରେଜିଷ୍ଟ୍ରେଶନ କରିବା ପାଇଁ ପରାମର୍ଶ ଦିଆଯାଇଛି। ଏହି ପ୍ରକ୍ରିୟା ପରେ ଅସହାୟ ମହିଳା ଜଣକ ଏବେ ଶିଶୁପୁତ୍ରକୁ ଧରି ତାଙ୍କ ରାଜ୍ୟ ଯିବାକୁ ବାଟ ଫିଟିଛି।