ଲାଠୋର, ୨୫।୭ (ଡି.ଏନ୍.ଏ.): ସରକାର ଗରିବ ଦୁଖି, ବାସହୀନମାନକୁ ପ୍ରଧାନମନ୍ତ୍ରୀ ଆବାସ, ଇନ୍ଦିରା ଅବାସ, ବିଜୁ ପକାଘର, ମୋ କୁଡ଼ିଆ ଯୋଜନାରେ ସାମିଲ କରି ପକାଘର ଯୁଗେଇ ଦେଉଛନ୍। ହେଲେ ଏସ୍ଇସିସି ତାଲିକାନେ ଭୁଲଭଟକା ଲାଗି ଅନେକ ଜାଗାରେ ଗରିବ୍ ପରିବାରମାନେ ଯୋଜନାରୁ ବାଦ୍ପଡ଼ି ବଡ଼ା ଗୁଲଗୁଲା ହେଇ ଜୀବନ୍ ବିତଉଛନ୍। ଏନ୍ତା ଗୁଟେ ଘଟନା ଦେଖ୍ବାକେ ମିଲିଛେ ବଲାଙ୍ଗୀର ଜିଲା ଖପରାଖୋଲ ବ୍ଲକ ଲାଠୋର ପଁଚେତ୍ ଅଧୀନ ପିପଲବାହାଲ ଗଁାରେ।
ସୂଚନା ଅନ୍ସାରେ ପିପଲବାହାଲ ଗଁାର ବୈଦାର ପରାଭୁଏ। ପରିବାର କହେଲେ ମାଏକିନା ଇନ୍ଦିରା, ଦୁଇ ଝି’ ଆର ଗୁଟେ ପୁଓକେ ନେଇ ତାକର ସଁସାର। ଜମିବାଡ଼ି, ସଁପତି ବଲି ତାକର କିଛି ନାଇଁ। ନିଜେ ଲୁହା କାମ୍ କରବାର ସଂଗେ ରାଏଜ୍ ବାହାରକେ ଦାଦନ୍ ଯାଇ କୁଟୁମ ପୁଷୁଛନ୍। ହେଲେ ବୈଦାରକଁର ବଏସ୍ ଅଧ୍କା ହେବାର ଲାଗି ଏହେଦେ ସେ ଲୁହା କାମ୍ ନାଇଁ କରିପାରବାର। ଯେନ୍ଥିରଲାଗି ଏହେଦେ କୁଟୁମବସିଆ ଦାଦନ୍ ଯାଇ ପେଟ୍ ପାଲୁଛନ୍। ଏନ୍ତାଥି ସେ ତାକର ମାଏଟ୍ ଖପର ଘରଟାକେ ମରାମତି କରି ନାଇଁପାରବାର। ଖପର ଉପରେ ଗୁଟେ ପଲିଥିନ୍ ଢାପି କୁଟୁମବସିଆ ମୁଡ଼ଗୁଁଜିଛନ୍। ସେ ବହୁତ ବଛର ହେଲା ସରକାରୀ ଯୋଜନାରେ ଘରଖଁଡ଼େ ପାଏବାର ଲାଗି ଭିନେ ଭିନେ ସମିଆରେ ଥାନୀୟ ନେତା, ସରକାରୀ ବାବୁମାନକୁ ଗୁହାରି କରି ନିରାଶ ହେଇଥିବାର କହିଛନ୍। ଏହେଦେ ପରିବାରଟା ଉପେ ଶୂଇନ୍ ହେଇ ଭଂଗା ଦଦ୍ରା କୁରିଆରେ ଜୀବନ୍କେ ପାଏନ୍ଛଡ଼େଇ ରହୁଛନ୍। ସେନ୍ତା ବୈଦାର ଦିନାକେତେ ତଲେ ଖପ୍ରାଖୋଲ ବ୍ଲକ ପରଶାସନକେ ଘରଖଁଡ଼େ ଯୁଗେଇ ଦେବାକେ ନିବେଦନ କରିଥିବାର କହିଛନ୍। ଇ ଦୁଖି ଗରିବ୍ ପରିବାରକେ ବ୍ଲକ ପରଶାସନ ଦୁରୁଷ୍ଟି ଦେଇ ଯେତେ ଜଲଦି ହେବା ସରକାରୀ ଯୋଜନାରେ ଘରଖଁଡ଼େ ଯୁଗେଇ ଦେବାକେ ସାଧାରନରେ ଦାବି ହେଉଛେ।