ନୟାଗଡ଼ ଅଫିସ,୧୮ା୮: ନୟାଗଡ଼ ଜିଲାର ବିଭିନ୍ନ ପଞ୍ଚାୟତରେ ଆଲୋକୀକରଣ ବ୍ୟବସ୍ଥା ଫେଲ୍ ମାରିଥିବା ଦେଖିବାକୁ ମିଳୁଛି। ଏ ନେଇ ପ୍ରତି ପଞ୍ଚାୟତକୁ ଅର୍ଥରାଶି ପ୍ରଦାନ କରାଯାଇଛି। ହେଲେ ପଞ୍ଚାୟତ ନିର୍ବାହୀ ଅଧିକାରୀ ଓ ସରପଞ୍ଚମାନେ ଧ୍ୟାନ ଦେଉ ନ ଥିବାରୁ ଏହି ବ୍ୟବସ୍ଥା ଫେଲ୍ ମାରିଥିବା କୁହାଯାଉଛି। ଅନ୍ୟପକ୍ଷେ ଲାଇଟ୍ ଲଗାଇବା ପରେ ରକ୍ଷଣାବେକ୍ଷଣା ଖର୍ଚ୍ଚ କିପରି କରିବେ ସେ ନେଇ ସରପଞ୍ଚମାନେ ଦ୍ୱନ୍ଦ୍ୱରେ ଥିବାରୁ ଏଥିପ୍ରତି ଆଗଭର ହେଉ ନ ଥିବା ଜଣାପଡିଛି।
ପ୍ରକାଶ ଯେ, ପ୍ରତି ଗ୍ରାମରେ ଆଲୋକୀକରଣ ବ୍ୟବସ୍ଥା ପାଇଁ କେନ୍ଦ୍ର ଅର୍ଥ କମିଶନ ଓ ରାଜ୍ୟ ଅର୍ଥ କମିଶନ ପଞ୍ଚାୟତକୁ ଟଙ୍କା ଦେଇଛନ୍ତି। ମିଳିଥିବା ସୂଚନା ଅନୁସାରେ ୨ ବର୍ଷରେ ପ୍ରତି ପଞ୍ଚାୟତକୁ ୧ ଲକ୍ଷ ୭୬ ହଜାର ଟଙ୍କା ପ୍ରଦାନ କରାଯାଇଛି। ଏହିଭଳି ଭାବେ ଜିଲାର ୧୯୪ ପଞ୍ଚାୟତକୁ ୩ କୋଟି ୪୧ ଲକ୍ଷ ୪୪ ହଜାର ଟଙ୍କା ପ୍ରଦାନ କରାଯାଇଛି। ପୂର୍ବରୁ ମଧ୍ୟ ଏ ନେଇ ଅର୍ଥ ପ୍ରଦାନ କରାଯାଇଥିଲା। ହେଲେ ଅନେକ ପଞ୍ଚାୟତରେ ବର୍ତ୍ତମାନ ସୁଦ୍ଧା ଲାଇଟ୍ ଲଗାଯାଇନାହିଁ। ୧୯୪ ପଞ୍ଚାୟତରୁ ପ୍ରାୟ ୩୦ ପ୍ରତିଶତ ଅର୍ଥାତ୍ ୫୮ ପଞ୍ଚାୟତରେ ଲାଇଟ୍ ଲଗାଯାଇଥିବା ନେଇ ଜିଲା ପଞ୍ଚାୟତ କାର୍ଯ୍ୟାଳୟରୁ ସୂଚନା ମିଳିଛି। ହେଲ ଉକ୍ତ ପଞ୍ଚାୟତଗୁଡିକ ବର୍ତ୍ତମାନ ସୁଦ୍ଧା ୟୁସି (ୟୁଟିଲାଇଜେଶନ ସାର୍ଟିଫିକେଟ) ଦାଖଲ କରିନାହାନ୍ତି। ଷ୍ଟ୍ରିଟ୍ ଲାଇଟ୍ ପିଛା ଟଙ୍କା ଦିଆଯାଉଥିବା ବେଳେ ପଞ୍ଚାୟତ ନିର୍ବାହୀ ଅଧିକାରୀ ଏ ଦିଗରେ ବୈଠକ କରି ଆଲୋଚନା କରାଇବା କଥା। ହେଲେ ଏ ଦିଗରେ କୌଣସି ଆଲୋଚନା ହେଉନାହିଁ। ଅନ୍ୟପଟେ କେଉଁ ଗ୍ରାମରେ ଦୁଇଟି କିମ୍ବା ଅନ୍ୟ କେଉଁ ଗ୍ରାମରେ ଗୋଟିଏ ଲାଇଟ୍ ଲଗାଯିବ ତାହାକୁ କେନ୍ଦ୍ର କରି ଅନେକ ସ୍ଥାନରେ ଲାଇଟ୍ ଲଗାଯାଉନାହିଁ। ଆଲୋକୀକରଣ ବ୍ୟବସ୍ଥାରେ ଗାଁ ମୁଣ୍ଡରେ ଲାଇଟ୍ ନ ଲଗାଯିବା ଯୋଗୁ ପୂର୍ବଭଳି ଗ୍ରାମବାସୀ ଅନ୍ଧାରରେ ଯାତାୟାତ କରୁଛନ୍ତି। ପ୍ରତି ପଞ୍ଚାୟତକୁ ଏ ନେଇ ଅର୍ଥ ରାଶି ପ୍ରଦାନ କରାଯାଉଥିବା ବେଳେ ଏହି ବ୍ୟବସ୍ଥା କାର୍ଯ୍ୟକାରୀ ନ ହେବା ଘଟଣା ପଞ୍ଚାୟତ କର୍ତ୍ତୃପକ୍ଷଙ୍କ କାର୍ଯ୍ୟଦକ୍ଷତା ପ୍ରତି ଅଙ୍ଗୁଳି ନିର୍ଦ୍ଦେଶ କରୁଛି। ଶୁଣିବାକୁ ମିଳୁଛି ଯେ, ଆଗାମୀ ଦିନରେ ଡିଆରଡିଏରେ ବୈଠକ କରାଯାଇ ଏ ନେଇ ଆଲୋଚନା କରାଯିବ। ଟେଣ୍ଡର ଡକାଯାଇ କୌଣସି ସଂସ୍ଥାକୁ ଆଲୋକୀକରଣ କରାଇବା ଦାୟିତ୍ୱ ଦିଆଯିବ। ଉକ୍ତ ସଂସ୍ଥା ଲାଇଟ୍ ଲଗାଇବା ସହିତ ଏହାର ରକ୍ଷଣାବେକ୍ଷଣ ମଧ୍ୟ କରିବ। ଏ ନେଇ ଜିଲା ପଞ୍ଚାୟତ ଅଧିକାରୀ ରତିକାନ୍ତ ଆଚାର୍ଯ୍ୟଙ୍କୁ ପଚାରିବାରୁ ସେ କହିଥିଲେ, ଅନେକ ଗ୍ରାମରେ ଲାଇଟ୍ ଲଗାଯାଇଥିଲେ ମଧ୍ୟ ଯୁସି ଦାଖଲ କରାଯାଇନାହିଁ। ବଳକା ରହିଯାଇଥିବା ପଞ୍ଚାୟତରେ ତୁରନ୍ତ ଲାଇଟ୍ ଲଗାଇବା ଦିଗରେ କାର୍ଯ୍ୟ କରାଯିବ ବୋଲି ସେ ପ୍ରକାଶ କରିଥିଲେ।