ଅତାବିରା, ୧୮।୩ (ଡି.ଏନ୍.ଏ.)-
କେନ୍ଦ୍ର ଆର ରାଏଜ୍ ଉଭଏ ସରକାର ଗରିବ୍ ଦୁଖିକର ଲାଗି ଅନେକ ଯୋଜନା କାଯ୍କାରୀ କରୁଛନ୍। ହେଲେ ସର୍ଭେରେ ଭୁଲଭଟକା, ସରକାରୀ ଅଧ୍କାରୀ, କରମ୍ଚାରୀକଁର ଖାମ୍ଖିଆଲି ମନଭାବ ଲାଗି ହକ୍ଦାର ହିତାଧିକାରୀ ସରକାରୀ ଯୋଜନାର ଲାଭ ପାଏବାରୁ ବଁଚିତ୍ ହେଉଛନ୍। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ବରଗଡ଼ ଜିଲା ଅତାବିରା ବ୍ଲକ ଟାମ୍ପରସରା ପଁଚେତ୍ ଗମ୍ଭାରୀପାଲି କୃଷିଫାର୍ମ ପାସର ଲିଚୁପଡ଼ାରେ।
ସୂଚନା ଅନ୍ସାରେ ବରଗଡ ଜିଲା ବେହେରାଟିକ୍ରାର ମୂଲବାସିନ୍ଦା ନୀଳ ଜଗଦଲା (୬୬)। ପରିବାର କହିଲେ ମାଏକିନା ଯଜ୍ଞ, ଦୁଇପୁଓ ସୁରେନ, ରବି, ବହ ଆର ନାତିନାତେନକୁଁ ନେଇ ସଁସାର। ନୀଳକଁର ବାପା ଗୋପାଳ ଆଏଜ୍କେ ୫୦ ବଛର ତଲେ କମେଇ ଖାଏବାର ଲାହଁାସେ ଗମ୍ଭାରୀପାଲି ପାସର ଲିଚୁପଡ଼ାକେ ପଲେଇ ଆସିଥିଲେ। ପରିବାରଟା ନିହାତି ଗରିବ୍ ହେଇଥିଲାବେଲେ ଜମିବାଡ଼ି, ଘରଡିହ, ସଁପତି ବଲି କିଛି ନାଇଁ। ନୀଳ ବାଢ଼ୁନ୍ ବେପାର କରି ଦୁଇ ପଏସା ରୁଜଗାର କରୁଛନ୍। ସେଥ୍ରେ ସେ ପିଲାଛୁଆକୁ ପାଠ୍ ପଢ଼ାବାର ସଂଗେ ବିହାଚୁରା କରିଛନ୍। ଏହେଦେ ଇ ବୁରୁଧ୍ ଦମ୍ପତି ସାନପୁଓ ରବିକଁର ସଂଗେ ରହୁଥିଲାବେଲେ ବଡ଼ପୁଓ ବିହାଚୁରା ହେଲା ଉତାରୁ ଭିନେ ହେଇ ରହୁଛନ୍। ନୀଳକଁର ଆଧାରକାର୍ଡ, ଭୋଟ ପରିଚଏପତର, ରାଶନକାର୍ଡ ରହିଛେ। ସରକାରୀ ଯୋଜନାରେ ପରିବାରଟା ମାସିକ ୧୫ କେ.ଜି. ଚାଉଲ ପାଉଛନ୍। ହେଲେ ବୁରୁଧ୍ ଦମ୍ପତି ଭତା ଆର ରୟତି ଜାଗା ଅଭାବୁ ଆବାସ ଯୋଜନାରୁ ବଁଚିତ୍ ହେଇ ରହିଥିବାର କହିଛନ୍। ସେନ୍ତା ପରିବାରଟା ସୁଖବାସୀ ହେଇଥିଲେ ବି ବସୁନ୍ଧରା ଯୋଜନାରେ ୪ ଡେସିମିଲ ଘର ଡିହ ପାଏବାରୁ ବଁଚିତ୍ ଥିବାର ନୀଳ କହିଛନ୍। ଇ ବାବ୍ଦେ ଅତାବିରା ବିଡିଓ ପ୍ରଣବ କୁମାର ଚାନ୍ଦ ଆର ତହସିଲଦାର ହୃଦାନନ୍ଦ ଅଡ୍ଡାକୁଁ ପଚ୍ରାଲାରୁ ଘଟନାର ତଦଁତ୍ କରି ପଦକ୍ଷେପ ନିଆଯିବା ବଲି ଉଭଏ କହିଥିଲେ।