ନୂଆଦିଲ୍ଲୀ, ୧୩ା୬ (ପି.ଟି.)-ଭାରତୀୟ ଅଲିମ୍ପିକ ଆସୋସିଏଶନ (ଆଇଓଏ) ଉପସଭାପତି ସୁଧାଂଶୁ ମିତ୍ତଲଙ୍କ ଅଭିଯୋଗକୁ ଅନ୍ତର୍ଜାତୀୟ ହକି ମହାସଂଘ (ଏଫ୍ଆଇଏଚ୍) ଅଗ୍ରାହ୍ୟ କରିବା ସହ ଏହାର ସଭାପତି ନରିନ୍ଦର ବାତ୍ରାଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ମନା କରିଦେଇଛି। ୨୦୧୬ ନିର୍ବାଚନ ବେଳେ ବାତ୍ରା ଏଫ୍ଆଇଏଚ୍ ନିୟମାବଳୀର ଉଲ୍ଲଂଘନ କରିଥିବା ମିତ୍ତଲ ଅଭିଯୋଗ କରିଥିଲେ। ଏଫ୍ଆଇଏଚ୍ର ଇଣ୍ଡିପେଣ୍ଡେଣ୍ଟ ଇଣ୍ଟିଗ୍ରିଟି ୟୁନିଟ୍ ଚେୟାରମ୍ୟାନ ଓ୍ବେନ୍ ସ୍ନେଲ କିନ୍ତୁ ବାତ୍ରାଙ୍କୁ କ୍ଲିନ୍ ଚିଟ୍ ଦେଇଛନ୍ତି। ମିତ୍ତଲ ଅଭିଯୋଗ କରିଥିଲେ ୨୦୧୬ ନଭେମ୍ବରରେ ଏଫ୍ଆଇଏଚ୍ର ମୁଖ୍ୟ ଭାବେ ନିର୍ବାଚିତ ହେବା ବେଳେ ବାତ୍ରା ହକି ଇଣ୍ଡିଆର ସଭାପତି ପଦବୀରେ ରହିଥିଲେ। ତେବେ ବାତ୍ରା ଏଫ୍ଆଇଏଚ୍ର ସଭାପତି ହେବାପରେ ହକି ଇଣ୍ଡିଆରୁ ଓହରିଯାଇଥିବାରୁ ସେ କୌଣସି ନିୟମ ଉଲ୍ଲଂଘନ କରି ନାହାନ୍ତି। ବାତ୍ରା ସଫେଇ ଦେଇ କହିଥିଲେ ଯେ, ସେ ଏଫଆଇଏଚ୍ ସଭାପତି ଭାବେ ନିର୍ବାଚିତ ହେବା ପଛରେ ସ୍ବାର୍ଥ ନିହିତ ଦ୍ୱନ୍ଦ୍ୱ ସୃଷ୍ଟି ହୋଇ ନାହିଁ। କାରଣ ସେ ୨୦୧୬ ନଭେମ୍ବର ୨୫ରେ ହକି ଇଣ୍ଡିଆ ସଭାପତି ପଦବୀରୁ ଇସ୍ତଫା ଦେଇସାରିଥିଲେ। ସୂଚନାଯୋଗ୍ୟ, ମିତ୍ତଲ ପୂର୍ବରୁ ଅନ୍ତର୍ଜାତୀୟ ଅଲିମ୍ପିକ କମିଟି (ଆଇଓସି)କୁ ଏକ ଚିଠି ଲେଖିଥିଲେ। ବାତ୍ରା ବେଆଇନ ଭାବେ ଆଇଓଏ ସଭାପତି ଭାବେ ନିର୍ବାଚିତ ହୋଇଥିବା ଅଭିଯୋଗ କରିଥିଲେ। ତେବେ ଶୁକ୍ରବାର ଆଇଓସି ମଧ୍ୟ ବାତ୍ରାଙ୍କୁ କ୍ଲିନ୍ ଚିଟ୍ ଦେଇଛି। ଆଇଓଏ ସଭାପତି ପଦବୀ ହାସଲ କରିବା ଲାଗି ବାତ୍ରା କୌଣସି ଅସାଧୁ ଉପାୟ ଅବଲମ୍ବନ କରି ନ ଥିବା କହିଛି।
