ଢେଙ୍କାନାଳ ଅଫିସ, ୧୫।୫- ବାତ୍ୟା ‘ଫନୀ’ ପ୍ରଭାବରେ ଢେଙ୍କାନାଳ ଜିଲାର ଆମ୍ବ, କାଜୁ, ପରିବା ଚାଷ ବିଶେଷ ଭାବେ କ୍ଷତିଗ୍ରସ୍ତ ହୋଇଛି। ଇତିମଧ୍ୟରେ ସରକାରୀସ୍ତରରେ କ୍ଷୟକ୍ଷତି ଆକଳନ ଶେଷ ହୋଇଥିବାବେଳେ ମଙ୍ଗଳବାର ବାତ୍ୟା ପ୍ରଭାବିତ ଅଞ୍ଚଳ ପରିଦର୍ଶନ କରିଛନ୍ତି କେନ୍ଦ୍ରୀୟ ଭାଜପା କୃଷକ ମୋର୍ଚ୍ଚା ପ୍ରତିନିଧି ଦଳ। କ୍ଷତିଗ୍ରସ୍ତ ଚାଷୀଙ୍କୁ ତୁରନ୍ତ କ୍ଷତିପୂରଣ ଦେବାକୁ ସେମାନେ ଦାବି କରିଛନ୍ତି।
ରାଷ୍ଟ୍ରୀୟ କୃଷକ ମୋର୍ଚ୍ଚା ଉପସଭାପତି ମହେଶ୍ୱର ସାହୁ, ରାଜ୍ୟ କୃଷକ ମୋର୍ଚ୍ଚା ଉପସଭାପତି ରାମଚନ୍ଦ୍ର ପାତ୍ର, ହୃଷୀକେଶ ଜେନାଙ୍କ ସମେତ ୫ଜଣିଆ ପ୍ରତିନିଧି ଦଳ ଶଙ୍କରପୁର, ପାମାଳ, ପୌରାଞ୍ଚଳ ଅଧୀନ ସିମିଳିଆ, ସଦର ବ୍ଲକର କାଇମାଟି, କୃଷ୍ଣକୁମାରପୁର ଏବଂ ଗଁଦିଆ ବ୍ଲକ କପିଳାସ, ଦେଓଗାଁ ଆଦି ଅଞ୍ଚଳରେ କ୍ଷତିଗ୍ରସ୍ତ କାଜୁ ଏବଂ ଆମ୍ବ ବଗିଚା ସହ ଚାଷଜମି ବୁଲି ଦେଖିଥିଲେ।
ପ୍ରତିନିଧି ଦଳର ସଦସ୍ୟମାନେ ଜିଲା କାର୍ଯ୍ୟାଳୟରେ ଅତିରିକ୍ତ ଜିଲାପାଳଙ୍କୁ ଭେଟି ଚାଷୀଙ୍କୁ ତୁରନ୍ତ କ୍ଷତିପୂରଣ ଦେବାକୁ ଦାବି କରିଛନ୍ତି। ଆମ୍ବ ଚାଷୀଙ୍କୁ ହେକ୍ଟର ପିଛା ୨ ଲକ୍ଷ, କାଜୁ ଚାଷୀଙ୍କୁ ହେକ୍ଟର ପିଛା ୧ ଲକ୍ଷ ଏବଂ ପରିବା ଚାଷୀଙ୍କୁ ହେକ୍ଟର ପିଛା ୫୦ ହଜାର ଟଙ୍କା ଦେବାକୁ ସେମାନେ ଜିଲା ପ୍ରଶାସନର ଦୃଷ୍ଟିଆକର୍ଷଣ କରିଛନ୍ତି। ସେହିପରି ବାତ୍ୟାକୁ ୧୦ଦିନ ବିତିଯାଇଥିଲେ ମଧ୍ୟ ବର୍ତ୍ତମାନ ସୁଦ୍ଧା ଠିକ୍ ଭାବେ କ୍ଷୟକ୍ଷତି ଆକଳନ ହୋଇପାରିନାହିଁ। ଏହାକୁ ନେଇ କୃଷକ ମୋର୍ଚ୍ଚା ନେତୃବୃନ୍ଦ ରାଜ୍ୟ ସରକାର ଏବଂ ଜିଲା ପ୍ରଶାସନକୁ ତୀବ୍ର ସମାଲୋଚନା କରିଥିଲେ। ବାତ୍ୟାରେ ଲକ୍ଷାଧିକ ଟଙ୍କାର ଆମ୍ବ, କାଜୁ, ପରିବାର ଚାଷ ନଷ୍ଟ ହୋଇଥିବା ରାଷ୍ଟ୍ରୀୟ ଉପସଭାପତି ମହେଶ୍ୱର ସୂଚନା ଦେଇଛନ୍ତି।