ଭୁବନେଶ୍ୱର,୩୧।୫(ବ୍ୟୁରୋ): ମୋଦି ସରକାରଙ୍କ ଦ୍ୱିତୀୟ ପାଳି ମନ୍ତ୍ରିମଣ୍ଡଳରୁ ବାଦ୍ ପଡ଼ିଛନ୍ତି ସୁନ୍ଦରଗଡ଼ ଲୋକ ସଭା ଆସନରୁ ଏମ୍ପି ହୋଇଥିବା ଜୁଏଲ୍ ଓରାମ। ଉକ୍ତ ଆସନରୁ ବିପୁଳ ଭୋଟରେ ବିଜୟୀ ହେବା ପରେ ଜୁଏଲଙ୍କ ମନ୍ତ୍ରୀ ପଦ ବଜାୟ ରହିବ ବୋଲି ଆଶା କରାଯାଉଥିବା ବେଳେ ତାଙ୍କୁ ସୁଯୋଗ ମିଳିନାହିଁ। ଏ ନେଇ ପ୍ରତିକ୍ରିୟା ରଖିଛନ୍ତି ଜୁଏଲ୍। ସେ କହିଛନ୍ତି, ଚଳିତ ଥର ଭାଜପା ୩ଶହରୁ ଊର୍ଦ୍ଧ୍ୱ ଆସନରେ ଜିତିଛି। ସେମାନଙ୍କ ମଧ୍ୟରୁ ୪୦ରୁ ୫୦ଜଣ ମନ୍ତ୍ରୀ ହେବେ। ଏଥର କିଛି ଲୋକଙ୍କୁ ସୁଯୋଗ ମିଳିଛି, କିଛି ଲୋକ ବାଦ ପଡ଼ିଛନ୍ତି। ଗତଥର ମୋତେ ସୁଯୋଗ ମିଳିଥିଲା, ଏଥର ଆଉ କିଛି ଲୋକଙ୍କୁ ମିଳିଛି। ଏହା ଗଣତନ୍ତ୍ରର ଏକ ସୁସ୍ଥ ପରମ୍ପରା। ଏହା ଏକ ସାଧାରଣ ଓ ସ୍ବାଭାବିକ ପ୍ରକ୍ରିୟା। ତାଙ୍କୁ ଦଳ ଯାହା ବି କାମ ଦେଇଛି ତାହା ସେ କରି ଆସିଛନ୍ତି କହିବା ସହ ୫ ବର୍ଷ କ୍ୟାବିନେଟ୍ ମନ୍ତ୍ରୀ ହେବା ସୁଯୋଗ ଦେଇଥିବାରୁ ମୋଦିଙ୍କୁ କୃତଜ୍ଞତା ଜଣାଇଛନ୍ତି।
ପ୍ରକାଶଯୋଗ୍ୟ, ଗୁରୁବାର ଏନ୍ଡିଏର ନୂତନ ମନ୍ତ୍ରିମଣ୍ଡଳରେ ସାମିଲ ହେବା ଲାଗି ଓଡ଼ିଶାରୁ ଧର୍ମେନ୍ଦ୍ର ପ୍ରଧାନ ଓ ପ୍ରତାପ ଷଡ଼ଙ୍ଗୀଙ୍କୁ ଫୋନ୍ କଲ୍ ଆସିଥିଲା। ମାତ୍ର ମନ୍ତ୍ରୀ ଦୌଡ଼ରେ ଥିବା ଜୁଏଲଙ୍କୁ ଆସି ନ ଥିଲା। ଧର୍ମେନ୍ଦ୍ର ନିଜ ସ୍ଥାନ ବଜାୟ ରଖି ଶୁକ୍ରବାର ପୁନର୍ବାର ପେଟ୍ରୋଲିୟମ, ପ୍ରାକୃତିକ ଗ୍ୟାସ ଓ ଇସ୍ପାତ ବିଭାଗ ମନ୍ତ୍ରୀ ହୋଇଥିବା ବେଳେ ପ୍ରତାପ ଏମ୍ଏସ୍ଏମ୍ଇ, ପ୍ରାଣୀ ସମ୍ପଦ, ମତ୍ସ୍ୟ ଓ ଦୁଗ୍ଧ ବିଭାଗ ମନ୍ତ୍ରୀ ହୋଇଛନ୍ତି।