ମୁମ୍ବାଇ: ମୁମ୍ବାଇର ପପୁଲାର ବାନ୍ଦ୍ରା ଷ୍ଟେଶନକୁ ୧୩୦ ବର୍ଷ ପୂରିଛି। ଏହି ଅବସରରେ ଶୁକ୍ରବାର ବଲିଉଡ୍ ବାହଶାହ ଶାହରୁଖ ଖାନ ପୋଷ୍ଟାଲ ଏନ୍ଭଲପ୍ ଓ ଡାକ ଟିକେଟ ଉନ୍ମୋଚନ କରିଛନ୍ତି। ଏହି ସ୍ବତନ୍ତ୍ର ଅବସରରେ ବାନ୍ଦ୍ରା ରେଲଓ୍ବେ ଷ୍ଟେଶନରେ ଏକ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏଥିରେ ଶାହରୁଖ ମୁଖ୍ୟ ଅତିଥି ଭାବେ ଯୋଗ ଦେଇ ପଶ୍ଚିମ ରେଲଓ୍ବେ ଅଧିକାରୀମାନଙ୍କ ପାଇଁ ଡାକ ଟିକେଟ ଜାରି କରିଥିଲେ। ଏହି କାର୍ଯ୍ୟକ୍ରମରେ ମହାରାଷ୍ଟ୍ର ସରକାରଙ୍କ ମନ୍ତ୍ରୀ ଆଶୀଷ ଶୋଲାର ସମେତ ବହୁ ମାନ୍ୟଗଣ୍ୟ ବ୍ୟକ୍ତି ଯୋଗଦେଇଥିଲେ। ଶାହରୁଖଙ୍କୁ ଦେଖିବା ପାଇଁ ଷ୍ଟେଶନରେ ଲୋକଙ୍କ ଭିଡ଼ ଜମିଥିବା ବେଳେ ପୋଲିସ ଫୋର୍ସ କଡ଼ା ସୁରକ୍ଷା ବଳୟରେ ତାଙ୍କୁ କାର୍ଯ୍ୟକ୍ରମ ସ୍ଥଳକୁ ନେଇଥିଲେ। ଆୟୋଜିତ ସଭାକୁ ସମ୍ବୋଧିତ କରି ଶାହରୁଖ କହିଛନ୍ତି, ଫିଲ୍ମରେ ସେ ବହୁ ଅଭିନେତ୍ରୀଙ୍କ ସହ ରେଲଓ୍ବେ ଷ୍ଟେଶନରେ ରୋମାଣ୍ଟିକ ସିନ୍ ଶୁଟିଂ କରିଛନ୍ତି। ହେଲେ ବାନ୍ଦ୍ରା ଷ୍ଟେଶନକୁ କେବେ ଆସି ନାହାନ୍ତି ବୋଲି ସେ କହିଛନ୍ତି। ଏଥିସହ ଏହି ଡାକ ଟିକେଟକୁ ବ୍ୟବହାର କରିବା ପାଇଁ ସେ ଲୋକଙ୍କୁ ନିବେଦନ କରିଛନ୍ତି। ସୂଚନାଯୋଗ୍ୟ, ବାନ୍ଦ୍ରା ଷ୍ଟେସନର ବିଲଡିଂକୁ ଐତିହ୍ୟ ସ୍ଥଳୀର ମାନ୍ୟତା ଦିଆଯାଇଛି।
