ବ୍ରହ୍ମପୁର ଅଫିସ୍,୨୫ା୮-ପ୍ରତ୍ୟେକ ଜୀବନ ମୂଲ୍ୟବାନ । କିନ୍ତୁ ଅସାବଧାନତା ଯୋଗୁ ଦୁର୍ଘଟଣାରେ ପ୍ରତ୍ୟେକ ଦିନ ବହୁ ଜୀବନ ହାନି ହେଉଛି ।
ଅନେକ ଲୋକେ ସେମାନଙ୍କ ମୁରବି ହରାଉଛନ୍ତି। ଗୋଟିଏ ଦୁର୍ଘଟଣା ସାରା ପରିବାରକୁ ପ୍ରଭାବିତ କରୁଛି। ଝିଅ ପୁଅଙ୍କ ପାଇଁ ବାପାଙ୍କ ଗୁରୁତ୍ୱ ଢ଼େର୍ ଅଧିକ । ଏଣୁ ପିଲାମାନେ ଶପଥ ନିଅ, ଯଦି ଘରୁ ବାହାରିବା ବେଳେ ବାପା ହେଲମେଟ୍ ପିନ୍ଧି ନାହାନ୍ତି, ତେବେ ଗାଡ଼ିରେ ବସିବାକୁ ମନା କର ବୋଲି ଛାତ୍ରୀଛାତ୍ରଙ୍କୁ ପରାମର୍ଶ ଦେଇଛନ୍ତି ବ୍ରହ୍ମପୁର ଏସ୍ପି ପିନାକ ମିଶ୍ର। ଶନିବାର ସକାଳେ ବ୍ରହ୍ମପୁର ସେଣ୍ଟ ଭିନ୍ସେଣ୍ଟ କନ୍ଭେଣ୍ଟ ସ୍କୁଲରେ ଆୟୋଜିତ ଟ୍ରାଫିକ ଏବଂ ପରିବେଶ ସଚେତନତା କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ଯୋଗଦେଇ ଏସ୍ପି ମିଶ୍ର ଏହି ପରାମର୍ଶ ଦେଇଥିଲେ। ଏଥି ସହ ସେ ସ୍କୁଲ କର୍ତ୍ତୃପକ୍ଷଙ୍କୁ ପ୍ରସ୍ତାବ ଦେଇଥିଲେ, ଯଦି କୌଣସି ଅଭିଭାବକ ହେଲମେଟ୍ ପିନ୍ଧି ନ ଥିବା ଦୃଷ୍ଟିକୁ ଆସୁଛି, ତେବେ ସେମାନଙ୍କ ଝିଅ ପୁଅଙ୍କ ମୋଟ ମାର୍କରୁ ୫ମାର୍କ କାଟି ଦିଆଯାଉ। ପିଲାମାନଙ୍କୁ ସ୍କୁଲରେ ଛାଡ଼ିବା ଏବଂ ନେବା ସମୟରେ ଯଦି ଅଭିଭାବକମାନେ ହେଲପେଟ୍ ପିନ୍ଧି ନାହାନ୍ତି, ତେବେ ଏନେଇ ସେମାନଙ୍କୁ ସଚେତନ କରାଯାଉ ବୋଲି ଏସ୍ପି ମିଶ୍ର ସ୍କୁଲ କର୍ତ୍ତୃପକ୍ଷଙ୍କୁ ପରାମର୍ଶ ଦେଇଥିଲେ । ଏତଦ୍ ବ୍ୟତୀତ ପ୍ରତ୍ୟେକ ଛାତ୍ରୀଛାତ୍ର ନିଜ ସହପାଠୀଙ୍କୁ ସମ୍ମାନ କରନ୍ତୁ, ପରିବେଶ ସୁରକ୍ଷା ପାଇଁ ପ୍ଲାଷ୍ଟିକ୍ ବ୍ୟବହାର ଠାରୁ ଦୂରେଇ ରହିବାକୁ ଏସ୍ପି ମିଶ୍ର ଗୁରୁତ୍ୱାରୋପ କରିଥିଲେ। ଏହା ପରେ ଏକ ସଚେତନତା ଶୋଭାଯାତ୍ରା ସ୍କୁଲରୁ ବାହାରି ସହର ପରିକ୍ରମା କରିବା ପରେ ଫେରିଥିଲା। ଶୋଭାଯାତ୍ରା ବେଳେ ଛାତ୍ରୀଛାତ୍ରମାନେ ଚାରା ରୋପଣ, ଜଳ ସଂରକ୍ଷଣ, ତାପମାତ୍ରା ବୃଦ୍ଧି, ବନ୍ୟଜନ୍ତୁ ସୁରକ୍ଷା ଏବଂ ଟ୍ରାଫିକ୍ ନିୟମ ମାନିବା ପାଇଁ ସଚେତନତା ବାର୍ତ୍ତା ଦେଇଥିଲେ। ବ୍ରହ୍ମପୁର ରୋଟାରୀ କ୍ଲବ ପକ୍ଷରୁ ଆୟୋଜିତ କାର୍ଯ୍ୟକ୍ରମରେ ପ୍ରିନ୍ସପାଲ୍ ସିଷ୍ଟର୍ ଜିନଥ୍, ଭାଇସ୍ପ୍ରିନ୍ସପାଲ୍ ସିଷ୍ଟର୍ ବିନା, କ୍ଲବ ସଭାପତି ଭି.ଅଜୟ କୁମାର, ସମ୍ପାଦକ ପ୍ରଦ୍ୟୁମ୍ନ ବିଷୋୟୀଙ୍କ ସମେତ କ୍ଲବର ବହୁ ସଦସ୍ୟ ଏବଂ ସ୍କୁଲର ଶିକ୍ଷୟିତ୍ରୀ ଶିକ୍ଷକ ଏହାକୁ ପରିଚାଳନା କରିଥିଲେ ।