କିଙ୍ଗଷ୍ଟନ,୧୯।୫(ଏଏଫପି): ଜାମାଇକା କିମ୍ବଦନ୍ତୀ ଧାବକ ଉସେନ୍ ବୋଲ୍ଟ ପ୍ରଥମଥର ପାଇଁ ବାପା ହେବାର ସୌଭାଗ୍ୟ ଲାଭ କରିଛନ୍ତି। ତାଙ୍କ ବାନ୍ଧବୀ କାସି ବେନ୍ନେଟ ଏକ କନ୍ୟା ସନ୍ତାନକୁ ଜନ୍ମ ଦେଇଛନ୍ତି। ଜମାଇକା ପ୍ରଧାନମନ୍ତ୍ରୀ ଆଣ୍ଡ୍ୟୁ ହୋଲନେସ୍ ସୋସିଆଲ ମିଡିଆରେ ଏ ନେଇ ସୂଚନା ଦେଇଛନ୍ତି। ମାତାପିତା ହେବାର ସୌଭାଗ୍ୟ ଅର୍ଜନ କରିଥିବାରୁ ସେ ବୋଲ୍ଟ ଓ ବେନ୍ନେଟଙ୍କୁ ଟୁଇଟ୍ କରି ଅଭିନନ୍ଦନ ଜଣାଇଛନ୍ତି। ଏହି ଯୋଡିଙ୍କ କନ୍ୟା ରବିବାର ଜନ୍ମ ଗ୍ରହଣ କରିଛି ବୋଲି କେତେକ ସ୍ଥାନୀୟ ଗଣମାଧ୍ୟମ ଉଲ୍ଲେଖ କରିଛି। ତେବେ ଏ ସଂକ୍ରାନ୍ତରେ ଅଧିକ କିଛି ସୂଚନା ଦିଆଯାଇନାହିଁ।
୩୩ ବର୍ଷୀୟ ବୋଲ୍ଟ ମାର୍ଚ୍ଚରେ ବାପା ହେବାକୁ ଯାଉଛନ୍ତି ବୋଲି ସୂଚନା ଦେଇଥିଲେ। ୮ଥର ଅଲିମ୍ପିକ୍ ସ୍ବର୍ଣ୍ଣପଦକ ଜିତିଥିବା ବୋଲ୍ଟ ଅବଶ୍ୟ ମଜାରେ କହିଥିଲେ ଯେ, ‘କୌଣସି ବ୍ୟକ୍ତି! କୌଣସି ପିଲା!’ ମୋ ସହିତ ଖେଳିବାକୁ ପ୍ରୟାସ ନ କରନ୍ତୁ’। ୧୦୦ମି. ଓ ୨୦୦ ମି.ରେ ବିଶ୍ୱ ରେକର୍ଡ ସ୍ଥାପନ କରିଥିତ୍ବା ବୋଲ୍ଟ ଦୀର୍ଘ ଏକ ଦଶନ୍ଧିଧରି ଆଥଲେଟିକ୍ସରେ ନିଜର ପତିଆର ଜାରି କରିବା ପରେ ୨୦୧୭ରେ ଆଥଲେଟିକ୍ସରୁ ଅବସର ଘୋଷଣା କରିଥିଲେ। ୨୦୧୬ରେ ବୋଲ୍ଟ ବିଶ୍ୱ ଏକମାତ୍ର ବ୍ୟକ୍ତିଭାବେ କ୍ରମାଗତ ୩ଟି ଅଲିମ୍ପିକ୍ସରେ ୧୦୦ ଓ ୨୦୦ମି. ଦୌଡରେ ସ୍ବର୍ଣ୍ଣ ପଦକ ହାସଲ କରି ବିରଳ ରେକର୍ଡ ସ୍ଥାପନ କରିଥିଲେ।