ବିଜୁ ବଡ଼ଜେନା ଖଳନାୟକ ଭାବରେ ଅନେକ ଥର ବଡ଼ ପରଦାରେ ମୁହଁ ଦେଖାଇ ସାରିଛନ୍ତି। ଗତ ବର୍ଷ ରିଲିଜ୍ ହୋଇଥିବା ‘ମାଲ୍ ମହୁ ଜୀବନ ମାଟି’ରେ ସେ କମେଡି ଖଳନାୟକ ଭୂମିକାରେ ଅବତୀର୍ଣ୍ଣ ହୋଇଥିଲେ। ଏବେ ବାବାଜି ଅବତାରରେ ଦର୍ଶକଙ୍କ ସାମ୍ନାକୁ ଆସୁଛନ୍ତି। ଫିଲ୍ମଟି ହେଲା ‘ହୀରୋ ନଂ. ଜିରୋ’। ଏଥିରେ ନିଜ ଭୂମିକା ସମ୍ପର୍କରେ ବିଜୁ କହନ୍ତି, ”ଏଥିରେ ମୋ ଭୂମିକା ବାବାଜି। ଗେରୁଆ ବସ୍ତ୍ର ପିନ୍ଧିଛି। ହେଲେ ଖଳନାୟକୀକୁ ଉସ୍କାଇବାରେ ଓସ୍ତାଦ। ମୋ ଇସାରା ଆଉ କଥାରେ ଜଣେ ଆଣ୍ଟିସୋସିଆଲ କାମରେ ବ୍ୟସ୍ତ। ମୋତେ ସେ ଲଭ୍ ଗୁରୁ ଭାବରେ ମାନିନେଇଛି। ଏହି ଭୂମିକାରେ କମେଡି ମଧ୍ୟ ରହିଛି।“ ନିର୍ମାଣାଧୀନ ‘ହୀରୋ ନଂ. ଜିରୋ’ର ନିର୍ଦ୍ଦେଶନା ଦେଇଛନ୍ତି ନିରଞ୍ଜନ ବେହେରା। ଲିଡ୍ ରୋଲ୍ରେ ଅଛନ୍ତି ଜ୍ୟୋତି ଏବଂ ନବାଗତା ଖୁସି। ସଂଗ୍ରାମ ବିଶ୍ୱାଳଙ୍କ ନିର୍ଦ୍ଦେଶନାରେ ‘ମହାସଂଗ୍ରାମ’ରୁ ଆରମ୍ଭ ହୋଇଥିଲା ତାଙ୍କର ବଡ଼ ପରଦା କ୍ୟାରିୟର। ‘ପ୍ରେମ ପାଇଁ ମହାଭାରତ’ରେ ଶକୁନି ଚରିତ୍ର ତାଙ୍କୁ ନିକଟରେ ବେଶ୍ ମାଇଲେଜ୍ ଦେଇଥିଲା। ଏହାବ୍ୟତୀତ ସଞ୍ଜୟ ନାୟକଙ୍କ ନିର୍ଦ୍ଦେଶନାରେ ନିର୍ମିତ ‘ଆସିବି ଫେରି ମୁଁ ବସୁଧା ଚିରି’ରେ ତାଙ୍କୁ ମିଳିଛି ମନଲାଖି ଭୂମିକା। ତେବେ ବିଜୁଙ୍କ ବାବାଜି ଅବତାର ଦର୍ଶକଙ୍କୁ କେତେ ଏଣ୍ଟରଟେନ୍ କରୁଛି ତାହା ଦେଖିବାକୁ ବାକି ରହିଲା।