ଲକ୍ଷ୍ନୌ,୨୭।୯:ବାବ୍ରି ମସଜିଦ୍ ଭଙ୍ଗା ମାମଲାରେ ଉତ୍ତର ପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ତଥା ଭାଜପାର ବରିଷ୍ଠ ନେତା କଲ୍ୟାଣ ସିଂଙ୍କୁ ଜାମିନ ମିଳିଛି। ଏହି ମାମଲାରେ କଲ୍ୟାଣ ସିଂଙ୍କ ନାଁରେ ଆଇପିସିର ୧୫୩ଏ, ୧୫୩ବି, ୨୯୫, ୨୯୫ଏ, ୫୦୦ ଧାରାରେ ମାମଲା ରୁଜୁ ହୋଇଛି। ସୂଚନାଯୋଗ୍ୟ ଯେ, ୬ ଡିସେମ୍ବର ୧୯୯୨ରେ ହଜାର ହଜାର ସଂଖ୍ୟାର ଲୋକ ଅଯୋଧ୍ୟାରେ ପହଞ୍ଚି ବାବ୍ରି ମସଜିଦ୍ ଭାଙ୍ଗି ଦେଇଥିଲେ। ଯାହା ଫଳରେ ଦେଶରେ ସାମ୍ପ୍ରଦାୟିକ ଦଙ୍ଗା ହୋଇଥିଲା। ସିବିଆଇ ବିଜେପିର ବରିଷ୍ଠ ନେତା ଲାଲକୃଷ୍ଣ ଆଡଭାନୀ ଉତ୍ତର ପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ କଲ୍ୟାଣ ସିଂ, ମୁରଲୀ ମନୋହର ଯୋଶୀ, ମଧ୍ୟ ପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଉମା ଭାରତୀଙ୍କ ସମେତ ୧୩ ନେତାଙ୍କ ବିରୋଧରେ ଅପରାଧିକ ଷଡଯନ୍ତ୍ର ମକଦ୍ଦମା ଚଳାଇବା ପାଇଁ ଅଦାଲତରେ ଦାବି କରିଥିଲା। ରାଇବରେଲି କୋର୍ଟରେ ଚାଲୁଥିବା ମାମଲାକୁ ମଧ୍ୟ ଲକ୍ଷ୍ନୌ ସ୍ପେସାଲ କୋର୍ଟକୁ ଅଣାଯାଇ ଜଏଣ୍ଟ ଟ୍ରାଏଲ କରାଯାଉ ବୋଲି ସିବିଆଇ ପକ୍ଷରୁ ମାମଲା ଲଢୁଥିବା ଓକିଲ ନିରଜ କିଶନ କୌଲ ସୁପ୍ରିମକୋର୍ଟରେ ଅପିଲ କରିଥିଲେ।