ବିଜେପୁର, ୩।୧୨(ଡି.ଏନ୍.ଏ.): ବରଗଡ ଜିଲା ବିଜେପୁର ଏନ୍ଏସି ପକ୍ଷରୁ ସହରରେ ପଲିଥିନ ଚଢାଉ ଅଭିଯାନ ମଙ୍ଗଳବାରରୁ ଆରମ୍ଭ ହୋଇଛି। କାର୍ଯ୍ୟନିର୍ବାହୀ ଅଧିକାରୀ ରୁକ୍ମଣ ମେହେରଙ୍କ ନେତୃତ୍ୱରେ ତଥା ସ୍ବଚ୍ଛ ଭାରତ ଅଭିଯାନର ନୋଡାଲ ଅଫିସର ଦିବ୍ୟ କିଶୋର ପୂରୋହିତଙ୍କ ତତ୍ତ୍ୱାବଧାନରେ ବିଭିନ୍ନ ବ୍ୟବସାୟିକ ପ୍ରତିଷ୍ଠାନରେ ଚଢାଉ ହୋଇଥିଲା। ଏଥିରେ ବାରଣ ସତ୍ତ୍ବେ ବେଆଇନ ଭାବେ ବ୍ୟବହାର କରୁଥିବା ଦୋକନୀମାନଙ୍କ ନିକଟରୁ ୧୪ କିଗ୍ରା ପଲିଥିନ ଜବତ ହୋଇଥିଲା। ସେମାନଙ୍କଠାରୁ ୩୯୦୦ଟଙ୍କା ଜୋରିମାନା ଆଦାୟ ହୋଇଛି। ଟ୍ୟାକ୍ସ କଲେକ୍ଟର ପ୍ରକାଶ ଭୋଇଙ୍କ ସମେତ ସ୍ବଚ୍ଛ ସାଥି ଓ ପୋଲିସ କର୍ମଚାରୀଗଣ ଚଢ଼ାଉରେ ସାମିଲ ହୋଇଥିଲେ। ଆଗାମୀ ଦିନରେ ଦୋକାନୀମାନଙ୍କୁ ପଲିଥିନ ବ୍ୟବହାର ନ କରିବାକୁ ନୋଟିସ ଦିଆଯିବ। ଏହାର ଖିଲାପ କଲେ ଦୋକାନୀଙ୍କ ବିରୋଧରେ ଥାନାରେ ମାମଲା ରୁଜୁ କରାଯିବା ସହ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଏନ୍ଏସି ପକ୍ଷରୁ ସୂଚନା ଦିଆଯାଇଛି।