ଭଟ୍ଲି,୨୬ା୧୦(ଡି.ଏନ୍.ଏ.): ବରଗଡ଼ ଜିଲା ବାରପାହାଡ଼ ଜଙ୍ଗଲରୁ ଛତିଶଗଡ଼ ଜଙ୍ଗଲକୁ ଚାଲିଯାଇଥିବା ହାତୀପଲ ଶନିବାର ପୁଣିଥରେ ବାରପାହାଡ଼ ଜଙ୍ଗଲମୁହାଁ ହୋଇଛନ୍ତି। ବିଗତ ୩ଦିନ ଧରି ଭଟ୍ଲି ବନ ବିଭାଗ ହାତୀପଲ ଫେରୁଥିବା ଖବର ପାଇ ସଜାଗ ରହିଥିଲେ। ଶନିବାର ସକାଳୁ ଉକ୍ତ ହାତୀପଲ ମଧ୍ୟରୁ ୨ ବଣୁଆ ହାତୀ ଭଟ୍ଲି ବ୍ଲକ୍ ବାରପାହାଡ଼ ପାଦଦେଶରେ ଥିବା ଜିରାତରା ନିକଟରେ ରହିଥିବା ବନ ବିଭାଗ ସୂତ୍ରରୁ ଜଣାପଡ଼ିଛି। ଏହି ୨ଟି ହାତୀ ନୂଆଁଗଡ଼ ଗ୍ରାମ ହାଇସ୍କୁଲର ପ୍ରାୟ ୨୦ ଫୁଟ ପାଚେରି ଭାଙ୍ଗିଦେଇଥିବା ବେଳେ ଅନେକ ଚାରା ନଷ୍ଟ କରିଦେଇଛନ୍ତି। ଏହାସହ ଗ୍ରାମର ଭୋଜରାଜ ସା ଏବଂ ସୁଦାମ ସାହୁଙ୍କ ଧାନ ଫସଲ ନଷ୍ଟ କରିଥିବା ଜଣାପଡ଼ିଛି। ପରେ ସେମାନେ ଭଟ୍ଲି ନିକଟସ୍ଥ ଗୋପାଳପୁର ଦେଇ ଯିବା ବେଳେ ଅନେକ ବିଲରେ ଥିବା ଧାନ ଫସଲ ନଷ୍ଟ କରିଥିବା ଖବର ମିଳିଛି। ଏ ନେଇ ଚାଷୀ ଚିନ୍ତାରେ ପଡିଛନ୍ତି। ଏ ସମ୍ପର୍କରେ ଭଟ୍ଲି ବନ ବିଭାଗ ରେଞ୍ଜର ରାଜେନ୍ଦ୍ର ଭୋଇଙ୍କୁ ପଚାରିବାରୁ ବର୍ତ୍ତମାନ ଦୁଇଟି ହାତୀଙ୍କୁ ଠାବ କରାଯାଇଛି। ଅନ୍ୟ ହାତୀପଲ ଓଡ଼ିଶା-ଛତିଶଗଡ଼ ସୀମାରୁ ପ୍ରାୟ ୫୦ କିମି ଦୂରରେ ଥିବା କହିଛନ୍ତି। ବନବିଭାଗ ସେମାନଙ୍କ ଗତିବିଧି ଉପରେ ନଜର ରଖିଛନ୍ତି।