କଟକ ଅଫିସ,୨୭ା୧୧- ବାରବାଟୀ ଷ୍ଟାଡିୟମରେ ହେବାକୁ ଥିବା ଭାରତ-ୱେଷ୍ଟଇଣ୍ଡିଜ ଏକଦିବସୀୟ ଅନ୍ତର୍ଜାତୀୟ କ୍ରିକେଟ ମ୍ୟାଚ୍ କ୍ରମେ ପାଖେଇ ଆସିଛି। ସେଥିପାଇଁ ପ୍ରସ୍ତୁତିକୁ ଜୋରଦାର କରାଯାଇଛି। ମ୍ୟାଚ୍କୁ ସଫଳ ଭାବେ ଆୟୋଜନ କରିବାକୁ ବିଭିନ୍ନ ସ୍ତରରୁ ଚାଲିଛି ପ୍ରଚେଷ୍ଟା। ଏ ନେଇ କେନ୍ଦ୍ରାଞ୍ଚଳ ରାଜସ୍ବ ଆୟୁକ୍ତ ଅନିଲ କୁମାର ସାମଲଙ୍କ ଅଧ୍ୟକ୍ଷତାରେ ଆୟୁକ୍ତଙ୍କ ସମ୍ମିଳନୀ କକ୍ଷରେ ମଙ୍ଗଳବାର ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଥିଲା। ଓଡ଼ିଶା କ୍ରିକେଟ ଆସୋସିଏଶନ (ଓସିଏ) ସମ୍ପାଦକ ସଞ୍ଜୟ ବେହେରା ଉପସ୍ଥିତ ରହି ଗ୍ୟାଲେରୀ ନଂ-୭ର ଟିକେଟ୍ ବିକ୍ରି କରାଯିବନି ବୋଲି ମତ ଦେଇଛନ୍ତି। ସରକାରୀ ଏଜେନ୍ସି ଏହି ଗ୍ୟାଲେରୀର ଅନୁଧ୍ୟାନ ଶେଷ କରିଛି। ଏଯାଏ ରିପୋର୍ଟ ଦେଇ ନାହିଁ। ତେଣୁ ଓସିଏ କୌଣସି ପ୍ରକାର ରିସ୍କ ନେବାକୁ ଚାହେଁନି ବୋଲି ସଞ୍ଜୟ କହିଛନ୍ତି। ବାରବାଟୀ ଷ୍ଟାଡିୟମରେ ଦର୍ଶକ କ୍ଷମତା ୪୩ହଜାର ୯୨୯ ରହିଥିବା ବେଳେ ଗ୍ୟାଲେରୀ ନଂ-୭ ବାଦ୍ ପଡ଼ିବା ପରେ ୫୨୮୨ ଟିକେଟ୍ ସିଧାସଳଖ କମିଛି। ମ୍ୟାଚ୍ ଆୟୋଜନ ନେଇ ସମସ୍ତ ସରକାରୀ ଅଧିକାରୀଙ୍କ ସହ ଦୀର୍ଘ ସମୟ ଆଲୋଚନା କରାଯାଇଥିଲା। ପାର୍କିଂଠାରୁ ଆରମ୍ଭ କରି ଆମ୍ବୁଲାନ୍ସ ସେବା ଯୋଗାଇ ଦେବା ପର୍ଯ୍ୟନ୍ତ ବିଭିନ୍ନ ବ୍ୟବସ୍ଥା ଉପରେ ଗୁରୁତ୍ୱାରୋପ କରାଯାଇଛି। ଏଥିରେ ବିଭିନ୍ନ ବିଭାଗର ଉଚ୍ଚପଦସ୍ଥ ସରକାରୀ ଅଧିକାରୀ ଯୋଗ ଦେଇଥିଲେ। ଜିଲାପାଳ ଭବାନୀ ଶଙ୍କର ଚୟନି, ସିଏମ୍ସି କମିଶନର ଅନନ୍ୟା ଦାସ, ଓସିଏ ସଭାପତି ପଙ୍କଜ ଲୋଚନ ମହାନ୍ତିଙ୍କ ସମେତ ଓସିଏର ଅନ୍ୟ ପଦାଧିକାରୀ ଉପସ୍ଥିତ ଥିଲେ।
ସକାଳେ ୱେଷ୍ଟଇଣ୍ଡିଜ, ସନ୍ଧ୍ୟାରେ ଭାରତର ଅଭ୍ୟାସ
ଉଭୟ ଦଳ ୧୯ ତାରିଖ ମଧ୍ୟାହ୍ନରେ ଭୁବନେଶ୍ୱରରେ ପହଞ୍ଚିବେ। ୨୦ ଓ ୨୧ରେ ଉଭୟ ଦଳ ଅଭ୍ୟାସ ନିମନ୍ତେ ବାରବାଟୀକୁ ଆସିବେ ବୋଲି ଜଣାପଡ଼ିଛି। ଭାରତୀୟ ଦଳର ଅଭ୍ୟାସ ସମୟ ଅପରାହ୍ନ ୨ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ସ୍ଥିର କରାଯାଇଥିବା ବେଳେ ୱେଷ୍ଟଇଣ୍ଡିଜ ଦଳ ସକାଳ ୯ଟାରୁ ଦିନ ୧୨ଟା ପର୍ଯ୍ୟନ୍ତ ଅଭ୍ୟାସ କରିବ। କିଛି ନିର୍ଦ୍ଦିଷ୍ଟ ଗ୍ୟାଲେରୀରେ ଦର୍ଶକ ନେଟ୍ସ ସେସନ ଦେଖିବାର ବ୍ୟବସ୍ଥା ରହିବ।
ସଜେଇ ହେବ ରିଂ ରୋଡ୍
ଖେଳାଳିମାନେ ରିଂ ରୋଡ୍ ଦେଇ ଷ୍ଟାଡିୟମ ଭିତରକୁ ପ୍ରବେଶ କରିବେ। ସେମାନଙ୍କ ଯାତାୟାତ ପଥକୁ ସୁସଜ୍ଜିତ କରିବାର ଦାୟିତ୍ୱ ନେଇଛି କଟକ ମହାନଗର ନିଗମ(ସିଏମ୍ସି)। ସିଏମ୍ସି କମିଶନର ଅନନ୍ୟା ଦାସ ଉପସ୍ଥିତ ରହି ରିଂରୋଡ୍ର ବିଭିନ୍ନ ସ୍ଥାନ ମରାମତି କରାଯିବା ସହ ଏହାକୁ ସୁସଜ୍ଜିତ କରାଯିବ ବୋଲି କହିଛନ୍ତି।
ଟିକେଟ୍ ଦର ଅପରିବର୍ତ୍ତିତ
ପୂର୍ବରୁ ଯାହା ଟିକେଟ ଦର ଥିଲା, ଆସନ୍ତା ମ୍ୟାଚରେ ମଧ୍ୟ ସମାନ ରହିବ। ଟିକେଟ ଦରରେ କୌଣସି ପରିବର୍ତ୍ତନ ହୋଇ ନ ଥିବା ବେଳେ କେବଳ ଏଥିରେ ଜିଏସଟି ଟ୍ୟାକ୍ସ ଯୋଡ଼ି ହୋଇଛି। ଟିକେଟରେ ସିଟ୍ ନମ୍ବର ଉଲ୍ଲେଖ ରହିବ।
ଗ୍ୟାଲେରୀ ଟିକେଟ୍ ଦର(ଟଙ୍କାରେ)
୧ ଓ ୩ ୬୦୦
୨ ଓ ୪ ୫୦୦
୬ ନମ୍ବର ୪୦୦
ସ୍ପେଶାଲ ଏନକ୍ଲୋଜର ୩୦୦୦
ନ୍ୟୁ ପ୍ୟାଭିଲିୟନ ୫୦୦୦
କର୍ପୋରେଟ ବକ୍ସ ୮୦୦୦
ଏସି ବକ୍ସ ୫୦୦୦
୨୧.୭୧ କୋଟି ଟଙ୍କାର ଇନସ୍ୟୁରାନ୍ସ
ମ୍ୟାଚ୍ ପାଇଁ ମୋଟ ୨୧ କୋଟି ୭୧ ଲକ୍ଷ ୭୦ହଜାର ଟଙ୍କାର ଇନସ୍ୟୁରାନ୍ସ କରାଯାଇଥିବା ଜଣାପଡ଼ିଛି। ଏଥିରେ ଦର୍ଶକଙ୍କ ନିମନ୍ତେ ୭କୋଟି ଟଙ୍କାର ଇନସ୍ୟୁରାନ୍ସ ରହିଥିବା ବେଳେ ଅଗ୍ନିକାଣ୍ଡ କିମ୍ବା ଅନ୍ୟ ବିପଦ ନିମନ୍ତେ ରହିଛି ୮କୋଟି ଟଙ୍କାର ଇନସ୍ୟୁରାନ୍ସ। ୬କୋଟି ୭୧ଲକ୍ଷ ୭୦ହଜାର ଟଙ୍କା ଅପ୍ରତ୍ୟାଶିତ ପରିସ୍ଥିତିକୁ ଦୃଷ୍ଟିରେ ରଖି ଇନସ୍ୟୁରାନ୍ସ କରାଯାଇଛି।
ଖାଦ୍ୟ ଦର ଉପରେ ଲାଗିବ କଟକଣା
ଗ୍ୟାଲେରୀ ଗୁଡ଼ିକରେ ବିକ୍ରି ହେବାକୁ ଥିବା ଶୁଖିଲା, ରନ୍ଧା ଖାଦ୍ୟ ଦର ଉପରେ କଟକଣା ଲଗାଯିବ। ଭେଣ୍ଡରମାନେ ମନମୁଖୀ ଚଢ଼ା ଦରରେ ଏହାକୁ ବିକ୍ରି କରୁଥିବାର ଅଭିଯୋଗ ହୋଇଥିଲା। ଏ ନେଇ ଉପଜିଲାପାଳଙ୍କ ତତ୍ତ୍ବାବଧାନରେ ଖାଦ୍ୟ ଦର ନିର୍ଦ୍ଧାରଣ କରାଯିବ ବୋଲି ବୈଠକରେ ନିଷ୍ପତ୍ତି ହୋଇଛି।