ବାରବାଟୀ ଦିନିକିଆ ମ୍ୟାଚ୍ରେ ଭାରତୀୟ ଦଳକୁ ଜିତାଇବାରେ ଅନ୍ୟତମ ଭୂମିକା ଗ୍ରହଣ କରିଥିଲେ ଶାର୍ଦ୍ଦୁଳ ଠାକୁର। ତାଙ୍କ ବିଷୟରେ ଏକ ରୋଚକ କଥା ସାମ୍ନାକୁ ଆସିଛି। ସେ ଏକଦା ୬ ବଲ୍ରେ ୬ ଛକା ଲଗାଇଥିଲେ। ୨୦୦୬ରେ ଶାର୍ଦ୍ଦୁଳ ଆନ୍ତଃ ସ୍କୁଲ ମ୍ୟାଚ୍ରେ ଏହି ସଫଳତା ପାଇଥିଲେ। ସ୍ବାମୀ ବିବେକାନନ୍ଦ ସ୍କୁଲ ପାଇଁ ଖେଳୁଥିବା ୧୪ ବର୍ଷରୁ କମ୍ ଶାର୍ଦ୍ଦୁଳ ଏସ୍. ରାଧାକ୍ରିଷ୍ଣ ସ୍କୁଲ ବିପକ୍ଷରେ ଗୋଟେ ଓଭରରେ ୬ ଛକା ମାରିଥିଲେ। ଏହି ମ୍ୟାଚ୍ରେ ସେ ୭୩ ବଲରେ ୧୬୦ ରନ୍ର ବିସ୍ଫୋରକ ଇନିଂସ୍ ଖେଳିଥିଲେ। ଏଥିରେ ଥିଲା ୧୦ ଛକା ଓ ୨୦ ଚୌକା। କିନ୍ତୁ ପରବର୍ତ୍ତୀ ସମୟରେ ସେ ବୋଲିଂ ପ୍ରତି ଅଧିକ ଧ୍ୟାନ ଦେଇଥିଲେ। ୨୦୧୨ରେ ସେ ଜଣେ ବୋଲର ଭାବେ ପ୍ରଥମ ଶ୍ରେଣୀ କ୍ରିକେଟରେ ପଦାର୍ପଣ ମ୍ୟାଚ୍ ଖେଳିଥିଲେ। ସେତେବେଳେ ମୋଟାପା କାରଣରୁ ତାଙ୍କୁ ବେଶ୍ ସମାଲୋଚନାର ଶିକାର ହେବାକୁ ପଡ଼ିଥିଲା। ତାଙ୍କ ଓଜନ ୮୩ କିଲୋ ଥିଲା। ଏଥିଯୋଗୁ ସେ ୧୯ ବର୍ଷରୁ କମ୍ ମୁମ୍ବାଇ ଦଳରୁ ବିଦା ହୋଇଥିଲେ।