କଣ୍ଟାମାଳ, ୯ା୧(ଡି.ଏନ୍.ଏ.)- ବୌଦ୍ଧ ଜିଲା କଣ୍ଟାମାଳ ବ୍ଲକ ଘଣ୍ଟାପଡ଼ା ପଁଚେତ୍ ଅଧୀନ ମାଣ୍ଡିଆଯୋର ଗଁାର ଲକ୍ଷ୍ମୀଧର ବେହେରା(୫୪) ଆର ବିଧବା ସୁଶୀଲା ଭୋଇ(୪୭) ଭତାରୁ ବଁଚିତ୍ ହେଇ ବଡ଼ା ଦୁଖେ ଦିନ୍ ବିତଉଛନ୍। ଉଭଏ ଅନେକଥର ଭତାର ଲାଗି କାଗଜପତର ଦେଇଛନ୍। ହେଲେ ବଛର ବଛର ବିତିଯାଇଥିଲେ ବି ଭତା ପାଏବାରୁ ବଁଚିତ୍ ହେଇଥିବାର ଉଭଏ ଅଭିଯୋଗ କରିଛନ୍।
ସୂଚନା ଅନ୍ସାରେ ମାଣ୍ଡିଆଯୋ ଗଁାର ଲକ୍ଷ୍ମୀଧର ବେହେରା। ପରିବାର କହେଲେ ମାଏକିନା, ଦୁଇ ପୁଓ ଆର ଦୁଇ ଝି’କେ ନେଇ ସଁସାର। ଲକ୍ଷ୍ମୀଧର ନିଜର ୨ ଏକର ଜମି ଚାଷ୍ବାସ କରବାର ସଂଗେ କୁଲିମଜୁରି କରି କୁଟୁମ ପୁଷୁଥିଲେ। ହେଲେ ଆଏଜ୍କେ ଅଢ଼େ ବଛର ତଲେ ସେ କେହେନ୍ସି ଗୁଟେ ଅଜନା ରୋଗ୍ରେ ପଡ଼ଲାରୁ ତାକର ଗୋଡ଼ହାତ୍ ଅଚଲ ହେଇଯାଇଛେ। ଚାଲବୁଲ ତ ଦୂରର କଥା ଏହେଦେ ସେ ଏକ୍ଲା ସାହାସ କରି ଠିଆ ବି ହେଇ ନାଇଁପାରବାର। ତାକର ଚିକିଛାରେ ପରିବାର ଲୋକ୍ ଲାଗ୍ବରମସ କରି ବୁର୍ଲାରୁ କଟକ ତକ୍ ଯାଇ ସରବ୍ସୁଅଁାତ୍ ହେଇଛନ୍। ଏନ୍ତାଥି ତାକର ୨ ଏକର ଜମି ବି ବଁଧକ୍ ପଡ଼ିଛେ। ଇଆଡ଼େ ଦେଢ଼ ବଛର ହେଲା ଭିନ୍ନକ୍ଷମ ଭତା ଲାଗି ବାରବାର ଆବେଦନ କରି ପଁଚେତ୍ରୁ ବ୍ଲକ ନରଦି ନରଦି ନିହାଲ ହେଇଗଲେନ। ହେଲେ କିଛି ଲାଭ ନାଇଁ। ଏନ୍ତାଥି ମାଏକିନା ପରହର ଘରେ କାମ୍ବୁତା କରି କୁଟୁମ ପୁଷୁଛନ୍। ସେନ୍ତା ମାଣ୍ଡିଆଯୋର ଇ ଗଁାର ନିସାହା ବିଧବା ସୁଶୀଳା ଭୋଇ। ୨ ବଛର ତଲେ ଆପ୍ନେ ରୋଗ୍ରେ ପଡ଼ି ଆରପାରକେ ବାଟ୍ କାଟଲା ଉତାରୁ ପରିବାରର ବୋଝ୍ ଖଁଦେଇଛନ୍। ଘରେ ୧୭ ବଛର୍ର ଅବିହାରି ଝି’। ଏନ୍ତାଥି ସୁଶୀଲା କୁଲିମଜୁରି କରି, ଆସର ପାସର ଜଂଗଲରୁ ସରଗୀ ପତର ଆନି ଖଲିଦନା ଟିପି ପରିବାର ଚଲଉଛନ୍। ସୁଶୀଲା ବି ବାରବାର ବିଧବା ଭତା ପାଏବାର ଲାଗି ଆବେଦନ କରି ଥକିଗଲେନ। ଡିସେମ୍ବର ମାସର ପହେଲା ହପ୍ତା ଜିଲାପାଳକଁର କୁଲତାଯୋର ପରିଦରଶନ ବେଲେ ବିଡିଓକୁଁ ଭେଟି ଲକ୍ଷ୍ମଣ ଆର ସୁଶୀଲା ଭତାର ଲାଗି ଗୁହାରି କରିଥିଲେ। ହେଲେ ପରଶାସନ ତରଫୁ ଇ ଦିଗେ ଆଏଜ୍ତକ କେହେନ୍ସି ପଦକ୍ଷେପ ନାଇଁ ନିଆଯାଇ ବଲି ଉଭଏ କହିଛନ୍। ଆଗରୁ କଣ୍ଟାମାଳ ବ୍ଲକରେ ମଲା ଲୁକ୍କର ନଁାରେ ମାସମାସ ଧରି ଭତା ଟଁକା ଉଠେଇ ନିର୍ବାହୀ ଅଧ୍କାରୀ ଖାଇଦେବାର ଅଭିଯୋଗ ରହିଛେ। ହେଲେ ଇଆଡେ ୨ ଝନ୍ ଆସାହା ହକ୍ଦାର ହିତାଧିକାରୀ ବାରବାର ଭତାର ଲାଗି ଆବେଦନ କରି ନିରଶ ହେବାରଟା ଥାନୀଅ ବୁଧିଜୀବୀକୁଁ ଆଶିରିଯ୍ କରିଛେ। ଇ ଦିଗେ ଜିଲାପାଲ ଖାସ୍ ଦୁରୁଷ୍ଟି ଦେଇ ପଦକ୍ଷେପ ନେବାକେ ଅଂଚଲର ବୁଧିଜୀବୀ ମହଲ ଦାବି କାରିଛନ୍।