ଓ୍ବାଶିଂଟନ,୨୩।୩: କରୋନା ଭାଇରସ ବିଶ୍ୱ ପାଇଁ ଚିନ୍ତାର କାରଣ ପାଲଟି ଯାଇଥିବା ବେଳେ କିଛିଦିନ ତଳେ ବିଶ୍ୱ ସ୍ବାସ୍ଥ୍ୟ ସଙ୍ଗଠନ କହିଥିଲା ବାରମ୍ବାର ହାତ ଧୋଇଲେ ଆମେ କରୋନାଠାରୁ ଅନେକାଂଶରେ ଦୂରେଇ ରହିପାରିବା। ଅବଶ୍ୟ ଏହା ଠିକ୍ ହେଲେ ହାତ ଧୋଇବା ସମୟରେ କେତେ ଗୁଡିଏ ଦିଗ ପ୍ରତି ଧ୍ୟାନ ନ ଦେଲେ ଏହା କରୋନାକୁ ଦୂରେଇବାରେ ଆଦୌ ସହାୟକ ହେବ ନାହିଁ ବୋଲି କୁହାଯାଇଛି। ବିଶ୍ୱ ସ୍ବାସ୍ଥ୍ୟ ସଙ୍ଗଠନର ସୂଚନା ଅନୁଯାୟୀ, ଥଣ୍ଡା ପାଣି ଅପେକ୍ଷା ଉଷୁମ ପାଣିରେ ହାତ ଧୋଇବା ସହ ସାବୁନ ବା ସାନିଟାଇଚର ବ୍ୟବହାର କରିବା ଉଚିତ। ହାତ ଧୋଇବା ବେଳେ ୨୦ ସେକେଣ୍ଡ ପର୍ଯ୍ୟନ୍ତ ଆଙ୍ଗୁଳି ମଝିକୁ ଭଲଭାବେ ଘଷି ଧୋଇବା ଦରକାର। ହାତ ଧୋଇ ସାରିବା ପରେ ଏକ ସଫା ତଉଲିଆରେ ଏହାକୁ ଫୋଛିନେବା ଭଲ। ନାକ, ଆଖିରେ ହାତ ମାରିବା ପରେ, ଛିଙ୍କିବା ପରେ, କୌଣସି ଅଜଣା ବ୍ୟକ୍ତିଙ୍କ ସଂସ୍ପର୍ଶରେ ଆସିବା ପରେ ତୁରନ୍ତ ହାତ ଧୋଇବା ଜରୁରୀ। ହାତ ଧୋଇବା ପରେ ସିଧାସଳଖ କବାଟ ଖୋଲିବା, କୌଣସି ବସ୍ତୁକୁ ସ୍ପର୍ଶ କରିବା ଠିକ୍ ନୁହେଁ।