ବାରିପଦା ଅଫିସ,୫ା୧୧- ସୋମବାର ରାତିରେ ବାରିପଦା ଟାଉନ ଥାନାରୁ ହ୍ୟାଣ୍ଡକପ୍ ଭାଙ୍ଗି ଜଣେ ଅଭିଯୁକ୍ତ ଚମ୍ପଟ ମାରିବା ଘଟଣା ଏଠାରେ ଚର୍ଚ୍ଚାର ବିଷୟ ହୋଇଛି। ରାତି ଡ୍ୟୁଟିରେ ଥିବା କର୍ମଚାରୀମାନେ ଶୋଇ ରହିଥିବା ସୁଯୋଗ ନେଇ ଅଭିଯୁକ୍ତ ଫେରାର ହୋଇଯାଇଥିଲେ। ତେବେ ମଙ୍ଗଳବାର ଅପରାହ୍ନ ୨ଟା ବେଳେ ପୋଲିସ ତାଙ୍କୁ ଗିରଫ କରିଛି। ଏହି ଘଟଣାରେ ଏସ୍ପି ୩ ପୋଲିସ କର୍ମଚାରୀଙ୍କୁ ନିଲମ୍ବନ କରିଛନ୍ତି।
ସୂଚନା ଅନୁଯାୟୀ, ବାରିପଦା ମଧୁବନ ଅଞ୍ଚଳର ଜଣେ ମହିଳାଙ୍କୁ ଦୁର୍ବ୍ୟବହାର କରାଯାଇଥିବା ଅଭିଯୋଗ ହୋଇଥିଲା। ଏହି ଘଟଣାରେ ପୋଲିସ ଏକ ମାମଲା (ନଂ.୩୩୨/୧୯) ରୁଜୁକରି ରବି ଟିଟୁ ନାମକ ଜଣେ ଯୁବକଙ୍କୁ ଅଟକ ରଖିଥିଲା। ରାତିରେ ଡ୍ୟୁଟିରେ ଥିବା ପୋଲିସ କର୍ମଚାରୀମାନେ ଟିଟୁଙ୍କ ହାତରେ ହ୍ୟାଣ୍ଡକପ୍ ଦେଇ ହାଜତ ଗେଟରେ ଲକ୍ କରିଦେଇଥିଲେ। ରାତି ଡ୍ୟୁଟିରେ ଥିବା ପୋଲିସ କର୍ମଚାରୀମାନେ ନିଘୋଡ ନିଦରେ ଶୋଇଯିବା ପରେ ରବି କୌଶଳ କ୍ରମେ ହ୍ୟାଣ୍ଡକପ୍କୁ ଭାଙ୍ଗି ବିଳମ୍ବିତ ରାତିରେ ଚମ୍ପଟ ମାରିଥିଲେ। ନିଦ ଭାଙ୍ଗିବା ପରେ ରବି ଥାନାରେ ନ ଥିବା ଦେଖି ପୋଲିସ କର୍ମଚାରୀମାନେ ତାଙ୍କୁ ଖୋଜିବା ପାଇଁ ଲାଗି ପଡ଼ିଥିଲେ। ହେଲେ ତାଙ୍କ ପତ୍ତା ମିଳି ନ ଥିଲା। ପରେ ଥାନାର କର୍ମଚାରୀମାନେ ରାତ୍ରିି ପାଟ୍ରୋଲିଂ ଦାୟିତ୍ୱରେ ଥିବା ଅଧିକାରୀଙ୍କୁ ଏସମ୍ପର୍କରେ ଜଣାଇଥିଲେ। ହେଲେ ସେ ଡ୍ୟୁଟି ଛାଡି ଘରେ ଶୋଇଥିବାରୁ ତୁରନ୍ତ ଆସିପାରି ନ ଥିଲେ। ଶେଷରେ ମଙ୍ଗଳବାର ଅପରାହ୍ନ ୨ଟା ବେଳେ ଫେରାର ଅଭିଯୁକ୍ତ ରବି ଥାନାର ଅଭ୍ୟର୍ଥନା କକ୍ଷ ପଛରେ ଲୁଚି ରହିଥିବା ଜଣାପଡ଼ିବାରୁ ପୋଲିସ ତାଙ୍କୁ କାବୁ କରିନେଇଥିଲା। କାର୍ଯ୍ୟରେ ଅବହେଳା କାରଣକୁ ନେଇ ଏସପି ପୁରୁଷୋତ୍ତମଦାସ ସୋମବାର ରାତିରେ ଡିସିଓ ଚାର୍ଜରେ ଥିବା ଏଏସଆଇ ବାସନ୍ତୀ ସିଂ, କନଷ୍ଟେବଳ ତପନ କୁମାର ବାରିକ ଏବଂ ଓଏପିଏଫ ଚୈତନ୍ୟ ଅମାନ୍ତ୍ୟଙ୍କୁ ଚାକିରିରୁ ନିଲମ୍ବନ କରିଛନ୍ତି। ଥାନାରୁ ଫେରାର ହେବା ଘଟଣାରେ ଅନ୍ୟ ଏକ ମାମଲା(ନଂ. ୩୩୩/୧୯) ରୁଜୁ କରି ପୋଲିସ ଅଭିଯୁକ୍ତ ରବିଙ୍କୁ କୋର୍ଟ ଚାଲାଣ କରିଛି।