ବାରିପଦା ଅଫିସ,୨୫ା୧- ଶୀତ ଋତୁରେ ମୟୂରଭଞ୍ଜ ଜିଲାକୁ ଦେଶ ବିଦେଶ ତଥା ବିଭିନ୍ନ ଅଞ୍ଚଳରୁ ଆସୁଥିବା ପକ୍ଷୀଙ୍କ ଗଣନା କାର୍ଯ୍ୟ ଗତ ୩ ଓ ୪ ତାରିଖ ଦୁଇଦିନ ଧରି କରାଯାଇଥିଲା। ବାରିପଦା ବନଖଣ୍ଡର ୭ଟି ବନାଞ୍ଚଳରେ ଗଣନା କାର୍ଯ୍ୟ ଶେଷ ହୋଇ ରିପୋର୍ଟ ପ୍ରସ୍ତୁତି ହୋଇଛି। ଚଳିତ ବର୍ଷ ଏହି ବନଖଣ୍ଡରେ ୮ ହଜାର ୧୫୭ ପକ୍ଷୀ ଥିବା ସୂଚନା ମିଳିଛି। ଅନ୍ୟପକ୍ଷେ ଗତ ବର୍ଷ ୮ ହଜାର ୬୮୧ ପକ୍ଷୀ ଥିଲେ। ଚଳିତ ବର୍ଷ ମୋଟ ୫୨୪ ଟି ପକ୍ଷୀ କମିଥିବା ବନଖଣ୍ଡ କାର୍ଯ୍ୟାଳୟ ରିପୋର୍ଟରେ ଉଲ୍ଲେଖ ରହିଛି।
ସୂଚନା ମୁତାବକ, ବାରିପଦା ବନଖଣ୍ଡର ବେତନଟୀ ବନାଞ୍ଚଳର ୧୩ ଜଳାଶୟ, ଉଦଳା ବନାଞ୍ଚଳର ୩, ଦେଉଳି ବନାଞ୍ଚଳର ୪ , ବାଙ୍ଗିରିପୋଷି ବନାଞ୍ଚଳର ୫, ବାରିପଦା ବନାଞ୍ଚଳର ୧୩, କପ୍ତିପଦା ବନାଞ୍ଚଳର ୨ ଓ ରାସଗୋବିନ୍ଦପୁର ବନାଞ୍ଚଳର ୫ ଟି ଜଳାଶୟରେ ପକ୍ଷୀ ଗଣନା କରାଯାଇଥିଲା। ଗଣନା ପରେ ରିପୋର୍ଟ ମୁତାବକ ବେତନଟୀ ବନାଞ୍ଚଳରେ ୨୬୦୨, ଉଦଳାରେ ୪୨୦, ଦେଉଳିରେ ୨୦୦୫, ବାଙ୍ଗିରିପୋଷିରେ ୬୬୯, ବାରିପଦାରେ ୧୬୭୯, କପ୍ତିପଦାରେ ୩୮୧ ଓ ରାସଗୋବିନ୍ଦପୁର ବନାଞ୍ଚଳରେ ୪୦୧ ପକ୍ଷୀ ଥିବା ଜଣାପଡିଥିଲା। ଚଳିତ ବର୍ଷ ଉକ୍ତ ବନଖଣ୍ଡର ୪୫ଟି ଜଳାଶୟରେ ପକ୍ଷୀ ଗଣନା ହୋଇଥିବାବେଳେ ଗତ ବର୍ଷ ୪୮ ଟି ଜଳାଶୟରେ ଗଣନା ହୋଇଥିଲା। ବାରିପଦା ବନଖଣ୍ଡ ଅଧିକାରୀ ସ୍ବୟମ ମଲିକ ‘ଧରିତ୍ରୀ’କୁ ସୂଚନା ଦେଇ କହିଛନ୍ତି ଯେ, ଚଳିତ ବର୍ଷ ଗଣନା ବେଳେ ପାଗ ଖରାପ ଥିବାରୁ ଠିକ ଭାବେ ପକ୍ଷୀ ଦୃଶ୍ୟମାନ ହୋଇ ନାହାନ୍ତି। ଏଥିପାଇଁ ପକ୍ଷୀ ସଂଖ୍ୟା କମିଥିବା ବିଭାଗ ଅନୁଧ୍ୟାନ ବେଳେ ଜାଣିବାକୁ ପାଇଛି। ସେହିପରି ସ୍ଥାନୀୟ ପକ୍ଷୀ ବହୁତ ସଂଖ୍ୟାରେ ଥିବାବେଳେ ବିଦେଶୀ ପକ୍ଷୀ ନ ଥିବା ମଧ୍ୟ ସେ କହିଛନ୍ତି।