ତ୍ରିନିଦାଦ୍,୧୪।୧୦- ଚଳିତ କାରିବିୟନ ପ୍ରିମିୟର ଲିଗ୍ରେ ଜାସନ ହୋଲ୍ଡରଙ୍କ ନେତୃତ୍ୱାଧୀନ ବାର୍ବାଡସ ଟ୍ରାଇଡେଣ୍ଟ ଚାମ୍ପିୟନ ହୋଇଛି। ଏହା ଦଳର ଦ୍ୱିତୀୟ ସିପିଏଲ ଟାଇଟଲ। ଏଠାରେ ଶନିବାର ରାତିରେ ଖେଳାଯାଇଥିବା ଫାଇନାଲରେ ବାର୍ବାଡସ ଟ୍ରାଇଡେଣ୍ଟ ଦଳ ୨୭ ରନ୍ରେ ଗୁୟାନା ଆମାଜନ ଓ୍ବାରିଅର୍ସକୁ ହରାଇ ଦେଇଛି। ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଟ୍ରାଇଡେଣ୍ଟ ଦଳ ଧାର୍ଯ୍ୟ ୨୦ ଓଭରରେ ୬ ଉଇକେଟ ହରାଇ ୧୭୧ ରନ୍ କରିଥିଲା। ଦଳ ପାଇଁ ଜୋନାଥନ କାର୍ଟର ଅପରାଜିତ ୫୦, ଜନସନ ଚାର୍ଲସ ୩୯ ଓ ଆଲେକ୍ସ ହେଲ୍ସ ୨୮ ରନ୍ କରିଥିଲେ। ବୋଲିଂରେ ଆମାଜନ ଓ୍ବାରିୟର୍ସ ପକ୍ଷରୁ ଇମ୍ରାନ ତାହିର, ବେନ ଲାଫଲିନ ଓ କିମୋ ପଲ ଗୋଟିଏ ଲେଖାଏ ଉଇକେଟ ନେଇଥିଲେ। ଜବାବରେ କ୍ରମାଗତ ବ୍ୟବଧାନରେ ଉଇକେଟ ହରାଇବା ଯୋଗୁ ଆମାଜନ ଓ୍ବାରିଅର୍ସ ବିଜୟଠାରୁ ବହୁ ଦୂରରେ ରହିଯାଇଥିଲା। ଦଳ ଶେଷ ପର୍ଯ୍ୟନ୍ତ ବ୍ୟାଟିଂ କରି ୯ ଉଇକେଟ କ୍ଷତିରେ ୧୪୪ ରନ୍ କରିବାକୁ ସକ୍ଷମ ହୋଇଥିଲା। ବ୍ରାଣ୍ଡନ କିଙ୍ଗ୍ ୪୩, କିମୋ ପଲ ୨୫ ଓ ନିକୋଲାସ ପୁରାନ ୨୪ ରନ୍ କରିଥିଲେ। ବିଜୟୀ ଦଳ ପାଇଁ ରେମନ ରେଫର ୪ ଓ ଆଶ୍ଲେ ନର୍ସ ୨ ଉଇକେଟ ନେଇଥିଲେ।