ଭୁବନେଶ୍ୱର, ୨୯ା୬(ବ୍ୟୁରୋ): ଦେବଗଡ଼ ଜିଲା ବାର୍କୋଟ ଅଞ୍ଚଳରେ କଲରାପତରିଆ ବାଘଛାଲ ଚୋରା ଚାଲାଣ ର଼୍ୟାକେଟରେ ସମ୍ପୃକ୍ତ ଥିବା ଅଭିଯୋଗରେ ଆଉ ୪ଜଣଙ୍କୁ ଗିରଫ କରିଛି କ୍ରାଇମ୍ବ୍ରାଞ୍ଚର ସ୍ପେଶାଲ ଟାସ୍କଫୋର୍ସ (ଏସ୍ଟିଏଫ୍)। ସେମାନେ ହେଲେ କେନ୍ଦୁଝର ଜିଲା ନୟାକୋଟ ଅଞ୍ଚଳର କାଳୀୟ ଚରଣ ଦାସ(୫୬), ଭାସ୍କର ଓରଫ ଭାଗୀରଥି ନାୟକ(୪୦) ପଣ୍ଡିତ ଓରଫ ପୀତାମ୍ବର ଖଟେଇ (୪୦) ଏବଂ ସୁନ୍ଦରଗଡ ଜିଲା ବଣେଇ ଥାନା ଅଞ୍ଚଳର ନେତ୍ର ଓରଫ ନେତ୍ରାନନ୍ଦ କିଶାନ(୨୨)। ପୂର୍ବରୁ ଏହି ଘଟଣାରେ ଗତ ୨୦ ତାରିଖରେ ସୁନ୍ଦରଗଡ଼ ଜିଲାର ସଚ୍ଚିକାନ୍ତ ନାୟକ, ଦେବଗଡ଼ ଜିଲାର ଜଗନସନ ବେହେରା ଓ ରମଣୀସେନ ବେହେରାଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଥିଲା। ଅଧିକ ତଥ୍ୟ ପାଇଁ ପରେ ସେମାନଙ୍କୁ ରିମାଣ୍ଡରେ ଆଣି ଜେରା କରିଥିଲା ଏସ୍ଟିଏଫ୍ ଟିମ୍। ସେମାନଙ୍କଠାରୁ ମିଳିଥିବା ତଥ୍ୟ ଭିତ୍ତିରେ ଉକ୍ତ ଟିମ୍ ବିଭିନ୍ନ ସ୍ଥାନରେ ଚଢାଉ କରି ଗୁରୁବାର ଆଉ ୪ଜଣଙ୍କୁ ଗିରଫ କରିଛି। ଏମାନଙ୍କୁ ଶୁକ୍ରବାର ଦେବଗଡ଼ ଏସ୍ଡିଜେଏମ୍ କୋର୍ଟକୁ ଚାଲାଣ କରାଯାଇଥିଲା। ଜାମିନ ଆବେଦନ ଖାରଜ ହେବାରୁ ସମସ୍ତଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
ଏସ୍ଟିଏଫ୍ ସୂଚନା ଅନୁଯାୟୀ, ଭାଗୀରଥି ଓ ପୀତାମ୍ବର କଲରାପତରିଆ ବାଘଛାଲ ଯୋଗାଡ଼ କରି କାଳୀୟ ଚରଣଙ୍କୁ ଦେଇଥିଲେ। ନେତ୍ରାନନ୍ଦ ଏହି କାରବାରରେ ମୁଖ୍ୟ ମଧ୍ୟସ୍ଥ ସାଜିଥିଲେ। କାଳୀୟ ଚରଣଙ୍କଠାରୁ ନେତ୍ରାନନ୍ଦ ବାଘଛାଲ ଆଣି ସଚ୍ଚିକାନ୍ତ, ଜଗନସନ ଓ ରମଣୀସେନଙ୍କ ନିକଟରେ ବିକ୍ରି କରିବା ଲାଗି ପହଞ୍ଚାଇଥିଲେ। ଏ ନେଇ କେସ୍ ନଂ. ୮/୧୯ ରୁଜୁ କରାଯିବା ସହ ଉପରୋକ୍ତ ୩ ଅଭିଯୁକ୍ତଙ୍କୁ ଜେରା କରାଯାଇଥିଲା। ଘଟଣାରେ ଏକ ର଼୍ୟାକେଟ ସମ୍ପୃକ୍ତ ଥିବା ତଦନ୍ତରୁ ଜଣାପଡ଼ିଥିଲା।