ବୁଗୁଡ଼ା,୨୫ା୧୧(ଡି.ଏନ.ଏ.)-ବୁଗୁଡ଼ା ବନାଞ୍ଚଳ ଅନ୍ତର୍ଗତ ପଥରବଣି ଛକଠାରେ ରବିବାର ପୂର୍ବାହ୍ନରେ ବନ ବିଭାଗ ତରଫରୁ ଚଢ଼ାଉ କରାଯାଇ ଏକ୍ସେଲ ଗାଡ଼ି ଓ ସେଥିରେ ଥିବା ବାର୍ହା ମାଂସ ଜବତ କରାଯାଇଛି। ଉକ୍ତ ମାଂସ ନେଇ ଯାଉଥିବା କଣ୍ଟାବଣି ଗ୍ରାମର ପଠାଣ ମାଝିଙ୍କୁ ଗିରଫ ପରେ କୋର୍ଟଚାଲାଣ କରାଯାଇଥିବା ବୁଗୁଡ଼ା ବନାଞ୍ଚଳ ଅଧିକାରୀ ଫକୀର ଚରଣ ବେହେରା କହିଛନ୍ତି। ଏ ନେଇ ବୁଗୁଡ଼ା ବନ ବିଭାଗରେ ନଂ.୧୭୧/୧୯-୨୦ରେ ଏକ ମାମଲା ରୁଜୁ ହୋଇଛି। ପ୍ରକାଶ ଯେ, ଅଭିଯୁକ୍ତ ଯୁବକ ଜଣକ କିରିଆମ୍ବା ଜଙ୍ଗଲରେ ବାର୍ହା ଶିକାର କରି ମାଂସ ବିକ୍ରି କରିବାକୁ ତାଙ୍କ ଏକ୍ସେଲ ଗାଡ଼ି (ନଂ.ଓଡି୦୭ଏଫ୪୯୨୪)ରେ ଆସୁଥିଲେ। କୌଣସି ସୂତ୍ରରୁ ଖବର ପାଇ ବନାଞ୍ଚଳ ଅଧିକାରୀଙ୍କ ସମେତ ବନପାଳ ଅଭିରାମ ଖିଲ, ବନରକ୍ଷୀ ଅବିନାଶ କଅଁର, ସୁବ୍ରତ ତ୍ରିପାଠୀ, ରବୀନ୍ଦ୍ର ମଲିକ ପ୍ରମୁଖ ପଥରବଣି ଛକରେ ଚଢ଼ାଉ କରି ପଠାଣଙ୍କୁ କାବୁ କରିଥିଲେ। ତାଙ୍କ ଠାରୁ ସାଢ଼େ ୪ କେଜି ବାର୍ହା ମାଂସ ସହ ଗାଡ଼ି ଜବତ କରାଯାଇଛି। ସୂଚନାଯୋଗ୍ୟ, ମଙ୍ଗଳବାର ସଙ୍କୁରୁ ରାସ୍ତାରେ ବାରହା ଓ କୁଟୁରା ଛାଲ ସହ ମାଂସ ନେଇ ଟିଭିଏସ ଗାଡ଼ିରେ ଯାଉଥିବା ଜଣେ ଅଭିଯୁକ୍ତ ଧରାପଡିଥିଲେ।