ପାଟଣାଗଡ଼, ୯ା୫(ଡି.ଏନ.ଏ.) ବଲାଙ୍ଗୀର ଜିଲା ପାଟଣାଗଡ଼ ବନବିଭାଗ ଶନିବାର କିରିବାଞ୍ଜି ଜଙ୍ଗଲରେ ଚଢ଼ାଉ କରି ବାର୍ହା ମାଂସ ଜବତ କରିବା ସହ ୩ ଜଣ ଶିକାରୀଙ୍କୁ ଗିରଫ କରିଛି। ଗିରଫ ଶିକାରୀମାନେ ହେଲେ ପାଟଣାଗଡ଼ ବ୍ଲକ ଅନ୍ତର୍ଗତ ସିଆଲବନ୍ଧ ଗ୍ରାମର କାଲି ବନଗୁଲା, ଜଗତ ଭୁଏ ଏବଂ ଗୌର ରାଉତ। ସେମାନଙ୍କଠାରୁ ୧୫ କେଜି ବାର୍ହା ମାଂସ, ଗୋଟିଏ ଆମେରିକାନ ସିଙ୍ଗଲ ବୋର ବନ୍ଧୁକ, ଛୁରି, ଟାଙ୍ଗିଆ ଓ ଏକ ବାଇକ ଜବତ କରାଯାଇଛି । ଅଭିଯୁକ୍ତମାନେ ବନବିଭାଗର ବାରମ୍ବାର ତାଗିଦ୍ ପରେ ମଧ୍ୟ ବନ୍ୟପ୍ରାଣୀ ଶିକାର ଜାରି ରଖିଥିଲେ। ସେମାନଙ୍କ ନାମରେ ପୂର୍ବରୁ ମଧ୍ୟ ବିଭାଗ ପକ୍ଷରୁ ଏକାଧିକ ମାମଲା ରହିଛି। ବାର୍ହା ଶିକାରରେ ବ୍ୟବହୃତ ବନ୍ଧୁକର ମାଲିକ ସରମୁହାଣ ଗ୍ରାମର ଜଗନ୍ନାଥ ମେହେର ଫେରାର ହୋଇଯାଇଛନ୍ତି। ତାଙ୍କୁ ଖୁବ୍ଶୀଘ୍ର ଗିରଫ କରାଯିବ ବୋଲି ପାଟଣାଗଡ଼ ରେଞ୍ଜ ଅଧିକାରୀ ବାସୁଦେବ ନାଥ ସୂଚନା ଦେଇଛନ୍ତି। ଚଢ଼ାଉରେ ଫରେଷ୍ଟର ରଞ୍ଜିତ ସିଂବାବୁ, ଫରେଷ୍ଟର ରାଜେନ୍ଦ୍ର ଧରୁଆ ପ୍ରମୁଖ ସାମିଲ ଥିଲେ।