ବାଲିଆପାଳ,୨୩।୩(ସ୍ବ.ପ୍ର/ଡି.ଏନ.ଏ.)-କରୋନା ଭୂତାଣୁର ଭୟାବହତାକୁ ଦେଖି ବାଲେଶ୍ୱର ଜିଲା ବାଲିଆପାଳ ବ୍ଲକକୁ ଆସନ୍ତା ୩୧ ତାରିଖ ପର୍ଯ୍ୟନ୍ତ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀଙ୍କ ନିର୍ଦ୍ଦେଶରେ ଲକ୍ଡାଉନ ଘୋଷଣା କରାଯାଇଛି। ରବିବାର ଜନତା କର୍ଫ୍ୟୁକୁ ବାଲେଶ୍ୱର ଜିଲା ସମେତ ବାଲିଆପାଳ ବ୍ଲକରେ ବିପୁଳ ସମର୍ଥନ ମିଳିଥିଲା। ସୋମବାର ଲୋକେ ବଜାରଘାଟ କରିବା ଲାଗି ପଦାକୁ ବାହାରିଥିଲେ। ଏପରିକି ବସ୍ରେ ବହୁ ସଂଖ୍ୟାରେ ଲୋକେ ଯାତାୟାତ କରୁଥିବା ଦେଖାଯାଇଥିଲା। ଏହି ଭୂତାଣୁ ସଂକ୍ରମଣକୁ କମ୍ କରିବା ଏବଂ ଲୋକଙ୍କୁ ଏକତ୍ରିତ ହେବାରୁ ରୋକିବା ଲାଗି ବାଲିଆପାଳ ବ୍ଲକକୁ ଲକଡାଉନ ଘୋଷଣା କରାଯାଇଛି। ଜିଲାପାଳଙ୍କ ନିର୍ଦ୍ଦେଶକ୍ରମେ ବାଲିଆପାଳ ପୋଲିସ ପକ୍ଷରୁ ପ୍ରଚାର ଗାଡ଼ି ଯୋଗେ ସମସ୍ତ ଦୋକାନ, ବଜାର, ମାର୍କେଟ ପ୍ରଭୃତି ବନ୍ଦ ଲାଗି ମଧ୍ୟ ସୂଚନା ଦିଆଯାଉଛି। ଅତି ଜରୁରୀ ନ ହେଲେ ଲୋକେ ବାହାରକୁ ନ ବାହାରି ଘରେ ରହିବାକୁ ପରାମର୍ଶ ଦିଆଯାଉଛି। ପ୍ରଶାସନ ପକ୍ଷରୁ ସୂଚନା ଜାରି ହେବା ପରେ ବାଲିଆପାଳ ବିଡିଓ ଛବିରାଣୀ ସାହୁ, ତହସିଲଦାର ଦୀପକ ଦାସ ପୋଲିସ ଅଧିକାରୀଙ୍କ ସହିତ ବାଲିଆପାଳ, ସିମୁଳିଆ ବଜାର, କାଳିପଦା, ଲଙ୍ଗଳେଶ୍ୱର, ଜାମକୁଣ୍ଡା, ଡଗରା, ନିଖିରା, ପଞ୍ଚୁପାଲି, ରତେଇ ଆଦି ବଜାରକୁ ଯାଇ ଦୋକାନ ବଜାର ବନ୍ଦ
ରହିବ।