ବାଲିଗୁଡ଼ା,୨୯ା୫(ଡି.ଏନ୍.ଏ.)- ଦୀର୍ଘ ସପ୍ତାହେ ହେଲାଣି ଲୋ ଭୋଲଟେଜ ଯୋଗୁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ବାଲିଗୁଡ଼ା ଅଞ୍ଚଳବାସୀ। ଦିନକୁ ଦିନ ଅଞ୍ଚଳରେ ତାପମାତ୍ରା ବୃଦ୍ଧି ପାଉଥିବାବେଳେ ଲୋ ଭୋଲଟେଜ ଯୋଗୁ ସହରରେ ଜଳ ଯୋଗାଣ ମଧ୍ୟ ହୋଇପାରୁନାହିଁ। ଦୀର୍ଘ ଚାରିଦିନ ହେଲାଣି ସହରବାସୀ ପାନୀୟ ଜଳ ପାଇପାରୁନଥିବା ଅଭିଯୋଗ କରିଛନ୍ତି। ସେପଟେ ପମ୍ପ ଅପରେଟରଙ୍କ କହିବା ଅନୁଯାୟୀ ଲୋ ଭୋଲଟେଜ ଯୋଗୁ ମୋଟର ଚାଲିପାରୁନାହିଁ। ଫଳରେ ସହରବାସୀଙ୍କୁ ଜଳ ଯୋଗାଇବା ସମ୍ଭବ ହୋଇପାରୁନାହିଁ। ଏଥିସହ ଘରେ ଫ୍ୟାନ ଚାଲୁ ନ ଥିବାରୁ ଲୋକେ ଗରମରେ ସିଝୁଛନ୍ତି। ପ୍ରକାଥାଉକି, ବାଲିଗୁଡା ଏକ ବିଜ୍ଞାପିତ ପରିଷଦ ଅଞ୍ଚଳ (ଏନ୍ଏସି) ହୋଇଥିଲେ ମଧ୍ୟ ଏଠାରେ ଜଳଯୋଗାଣ ସଂସ୍ଥା (ପିଏଚ୍ଇଡ଼ି) ବିଭାଗର କୌଣସି କାର୍ଯ୍ୟାଳୟ ନାହିଁ। ଏନ୍ଏସି ଅଧିକାରୀ ଜଳଯୋଗାଣ ନେଇ କୌଣସି ପଦକ୍ଷେପ ନେଉନଥିବାବେଳେ ପିଏଚ୍ଇଡି ବିଭାଗର ଯେଉଁ ଅଧିକାରୀ ବାଲିଗୁଡ଼ା ଦାୟିତ୍ୱରେ ଅଛନ୍ତି ଲୋକେ ଅଭିଯୋଗ କରିବାକୁ ଗଲେ ତାଙ୍କର ଦେଖା ମିଳୁନାହିଁ। ଯଥାଶୀଘ୍ର ସମସ୍ୟାର ସମାଧାନ ନହେଲେ ଅଞ୍ଚଳବାସୀ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।
