କଟକ ଅଫିସ,୧୭।୧୧: ଐତିହାସିକ କଟକ ବାଲିଯାତ୍ରା ଶନିବାର ପଞ୍ଚମ ଦିନରେ ପହଞ୍ଚିଛି। ଦିନ ଯେତିକି ବିତିବାରେ ଲାଗିଛି ସେହି ଅନୁସାରେ ଲୋକଙ୍କ ଭିଡ ଜମିବାରେ ଲାଗିଛି। ସନ୍ଧ୍ୟା ହେଲେ ରଙ୍ଗବେରଙ୍ଗର ଆଲୋକମାଳାରେ ମହାନଦୀ ପଠା ଝଲସୁଛି। ଏଥିସହ ବାଲିଯାତ୍ରାର ଉପର ଓ ତଳ ପଡିଆରେ ଥିବା ବିଭିନ୍ନ ଷ୍ଟଲରେ ଖାଦ୍ୟ ସାଙ୍ଗକୁ ଅନ୍ୟ ସାମଗ୍ରୀ ବିକ୍ରି ହେଉଥିବା ଦେଖିବାକୁ ମିଳିଛି।
ପୋଲିସ ପକ୍ଷରୁ ସୁରକ୍ଷା କଡ଼ାକଡ଼ି
ବାଲିଯାତ୍ରାରେ ପ୍ରବଳ ଭିଡକୁ ଦୃଷ୍ଟିରେ ରଖି ପୋଲିସ ପକ୍ଷରୁ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି। ଡିସିପି ଅଖିଳେଶ୍ୱର ସିଂ ଯାତ୍ରା ପଡିଆରେ ଉପସ୍ଥିତ ରହି ବିଭିନ୍ନ ସ୍ଥାନରେ ଲାଗିଥିବା ସିସିଟିଭି ସହାୟତାରେ ଚୋରି, ଡକାୟତି ଓ ପାର୍କିଂ ବ୍ୟବସ୍ଥା ଅନୁଧ୍ୟାନ କରିଥିଲେ।
ହଜିବା ବ୍ୟକ୍ତିଙ୍କ ଭରସା ପୋଲିସ ଆଉଟ ପୋଷ୍ଟ
ବାଲିଯାତ୍ରା ବୁଲିବା ପାଇଁ ପରିବାର ସଦସ୍ୟଙ୍କ ସହ ପିଲାମାନେ ବିଭିନ୍ନ ସ୍ଥାନରୁ ଆସିଥାନ୍ତି। ହେଲେ ଭିଡ ଭିତରେ ଅଧିକାଂଶ ଲୋକେ ହଜିଯାଆନ୍ତି। ସେମାନଙ୍କୁ ତାଙ୍କ ପରିବାର ଲୋକଙ୍କ ସହ ମିଶାଇବା ପାଇଁ ସାହାରା ପାଲଟିଥିଲା ଯାତ୍ରା ପଡିଆରେ ଖୋଲିଥିବା ବିଭିନ୍ନ ଆଉଟ ପୋଷ୍ଟ। ହଜି ଯାଉଥିବା ବ୍ୟକ୍ତି ଆଉଟ୍ ପୋଷ୍ଟରେ ଆସି ଖବର ଦେବା ପରେ ସେମାନଙ୍କୁ ତଳ ପଡିଆରେ ଥିବା ୧୦ନମ୍ବର ଆଉଟ ପୋଷ୍ଟ ନିକଟକୁ ନିଆଯାଏ। ସେଠାରେ ଆନାଉନ୍ସ କରାଯିବା ପରେ ପରିବାର ଲୋକେ ଆସି ତାଙ୍କୁ ସେଠାରୁ ନେଇଥାନ୍ତି। ପ୍ରତିଦିନ ପାଖାପାଖି ୧୦୦ ଜଣ ହଜିଯାଉଥିବା ବ୍ୟକ୍ତି ଏଠାରେ ଅଭିଯୋଗ କରିଥାନ୍ତି। ପରେ ପୋଲିସ ସହାୟତାରେ ସେମାନଙ୍କୁ ସେମାନଙ୍କ ପରିବାର ଲୋକଙ୍କୁ ହସ୍ତାନ୍ତର କରାଯାଇଥାଏ।
ସାମୁକା ତିଆରି ସାମଗ୍ରୀର ବଢୁଛି ଚାହିଦା
ବାଲିଯାତ୍ରା ପଡିଆ ରିଂରୋଡରେ ଦେଖିବାକୁ ମିଳିଛି ସାମୁକା ତିଆରି ସାମଗ୍ରୀର ଚାହିଦା। ଏହାକୁ କିଣିବା ନିମନ୍ତେ ଲୋକଙ୍କ ଭିଡ ଲାଗିଥିଲା। ଦିଘାରୁ ଆସିଥିବା ବ୍ୟବସାୟୀ ଆଶିଷ ସିଂ କହିଛନ୍ତି, ୧୨ ବର୍ଷ ହେବ ବାଲିଯାତ୍ରାରେ ସାମୁକା ତିଆରି ସାମଗ୍ରୀ ବିକ୍ରି କରିବାକୁ ଆସୁଛି। ସାମୁକାରେ ଦେବଦେବୀଙ୍କ ମୂର୍ତ୍ତି, ହାତୀ, ପକ୍ଷୀ, ହରିଣ, ମୟୂର ଆଦି ଉପକରଣ ପ୍ରସ୍ତୁତ ହୋଇଥିବାବେଳେ ଏହାର ଦାମ ୫ ଟଙ୍କାରୁ ଆରମ୍ଭ କରି ୨୦୦ ଟଙ୍କା ପର୍ଯ୍ୟନ୍ତ ରହିଛି।
ଗୁଆଘିଅ ଚା’ ଦୋକାନରେ ଗହଳି
ଯାତ୍ରା ପଡିଆରେ ବିକ୍ରି ହେଉଛି ଗୁଆଘିଅ ଚା’। ମୁନୁ ଭାଇଙ୍କ ଗୁଆଘିଅ ଚା ଦୋକାନ ନାମରେ ପ୍ରସିଦ୍ଧ ଥିବା ଏହି ଦୋକାନରେ ଦିନକୁ ୧୫୦୦ରୁ ଊର୍ଦ୍ଧ୍ୱ କପ୍ ଚା ବିକ୍ରି ହୋଇଥାଏ। ମଇଁଷି କ୍ଷୀର, ଓମ୍ଫେଡ କ୍ଷୀର, ଖୁଆ, କାଜୁ, ଗୁଆଘିଅକୁ ମିଶ୍ରଣ କରି ଏହି ଭିନ୍ନ ଧରଣର ଚା ପ୍ରସ୍ତୁତ କରାଯାଇଥାଏ। ଏହାକୁ ପିଇବା ପାଇଁ ବ୍ୟବସାୟୀଙ୍କଠାରୁ ଆରମ୍ଭ କରି ଲୋକଙ୍କ ଭିଡ ଲାଗିଥାଏ। ଗୋଟିଏ ଚା’ର ମୂଲ୍ୟ ୧୦ଟଙ୍କା ଥିବାବେଳେ ଯାତ୍ରା ଭିଡକୁ ଦୃଷ୍ଟିରେ ରଖି ୧୫ଜଣ କାରିଗର ଏହି ଚା ପ୍ରସ୍ତୁତ କରିଥାନ୍ତି ବୋଲି ବ୍ରଜକିଶୋର ଦେ କହିଛନ୍ତି।