ବରଗଡ଼ ଅଫିସ୍,୧୩।୫: ବରଗଡ଼ ଜିଲା ବେହେରା ମାର୍କେଟ୍ ୟାର୍ଡ଼ରେ ବସୁଥିବା ବାଲିଯୋରୀ କପଡ଼ା ବଜାରକୁ ବନ୍ଦ କିମ୍ବା ଅନ୍ୟତ୍ର ସ୍ଥାନାନ୍ତର କରିବାକୁ ଗ୍ରାମବାସୀ ଦାବି କରିଛନ୍ତି। ଏ ନେଇ ବୁଧବାର ବାଲିଯୋରୀ ଗ୍ରାମବାସୀ ଜିଲାପାଳଙ୍କ ଜରିଆରେ ମୁଖ୍ୟମନ୍ତ୍ରୀଙ୍କୁ ଏକ ସ୍ମାରକପତ୍ର ପ୍ରଦାନ କରିଛନ୍ତି । ଜିଲାପାଳଙ୍କ ଅନୁପସ୍ଥିତିରେ ଅତିରିକ୍ତ ଜିଲାପାଳ ମିର୍ଦ୍ଧା ଟପ୍ପୋ ସ୍ମାରକପତ୍ର ଗ୍ରହଣ କରିଥିଲେ। ସ୍ମାରକପତ୍ରରେ ସେମାନେ ଉଲ୍ଲେଖ କରିଛନ୍ତି, ଗତ ୮ତାରିଖ ପ୍ରଶାସନ ପକ୍ଷରୁ ବାଲିଯୋରୀ କପଡ଼ା ବଜାରକୁ ବେହେରା ମାର୍କେଟ୍ ୟାର୍ଡ଼ ପରିସରରେ ଖୋଲାଯାଇଛି। ଏହି କପଡ଼ା ବଜାରକୁ ଜିଲା ତଥା ରାଜ୍ୟ ବାହାରୁ ମଧ୍ୟ କପଡ଼ା ବ୍ୟବସାୟୀମାନେ ଆସୁଛନ୍ତି। ଏଥିଯୋଗୁ ବଜାରରେ ଅସମ୍ଭାଳ ଭିଡ଼ ରହୁଛି। ଫଳରେ କରୋନା ସଂକ୍ରମଣ ଭୟ ରହିଥିବା ଗ୍ରାମବାସୀ କହିଛନ୍ତି। ଏହି ଦୃଷ୍ଟିରୁ ତୁରନ୍ତ ଏହି କପଡ଼ା ବଜାରକୁ ଅନ୍ୟତ୍ର ସ୍ଥାନାନ୍ତର କରିବା ପାଇଁ ଦାବି ହୋଇଛି । ସ୍ମାରକପତ୍ରରେ ସ୍ଥାନୀୟ ସରପଞ୍ଚ ଶୋଭାବତୀ ବିଶ୍ୱାଳଙ୍କ ସହିତ ବହୁ ଗ୍ରାମବାସୀଙ୍କ ସ୍ବାକ୍ଷର ରହିଛି। ସେହିପରି ଫାଇଟ୍ ଅନ୍ ରାଇଟ୍ର ସଭାପତି ଦେବବ୍ରତ ମିଶ୍ରଙ୍କ ନେତୃତ୍ୱରେ ଗ୍ରାମବାସୀ ସ୍ମାରକପତ୍ର ପ୍ରଦାନ କରିବାକୁ ଯାଇଥିଲେ ।