କଟକ ଅଫିସ,୨୮।୫: ବରଫି ପାଇଁ ଜିଲା ପ୍ରଶାସନ ପକ୍ଷରୁ ମାତାମଠ ମଣାଣିରେ ବାଲି ଫିଲିଂ କାର୍ଯ୍ୟକୁ ବିରୋଧ କରିଛନ୍ତି କଟକର ତେଲୁଗୁ ସମ୍ପ୍ରଦାୟ। ଏଥିପାଇଁ ବିକଳ୍ପ ବ୍ୟବସ୍ଥା କରିବାକୁ ଦାବି ହୋଇଛି। ତେଲୁଗୁ ସମ୍ପ୍ରଦାୟର କେହି ମୃତ୍ୟୁ ହେଲେ ସତ୍କାର ପାଇଁ ୨୦୦୨ରେ ମାତାମଠସ୍ଥିତ ଏକ ସ୍ଥାନ ନିରୂପଣ ହୋଇଥିଲା। ଏହାକୁ ତେଲୁଗୁ ମଶାଣୀ ଘୋଷଣା କରାଯାଇଥିଲା। ସେବେଠାରୁ ମଙ୍ଗଳାବାଗ, ଥୋରିଆସାହି, ଦେୱାନବଜାର, ଓଡ଼ିଆବଜାର, ଜଗନ୍ନାଥ ବଲ୍ଲଭ, ସୂତାହାଟ, ବାଉଁଶଗଳି, ପଟାପୋଲ, ମୋଚିସାହି, ରାଣୀହାଟ, ମାଛୁଆବଜାର, ନୂଆପାଟଣା, କ୍ୟାଣ୍ଟନମେଣ୍ଟ, ହାୱଡ଼ାମୋଟର ଅଞ୍ଚଳର ପ୍ରାୟ ୧ ଲକ୍ଷ ଲୋକ କ୍ରିୟାକର୍ମ ପାଇଁ ଏହି ମଶାଣୀ ଉପରେ ନିର୍ଭର କରୁଛନ୍ତି। କଟକ ମହାନଗର ନିଗମ (ସିଏମସି) ମଶାଣି ଚାରିପାଖରେ ୮ ଲକ୍ଷ ଟଙ୍କା ବ୍ୟୟରେ ପାଚେରି ନିର୍ମାଣ, ଟ୍ୟୁବୱେଲ ପାଣି ତଥା ଆଲୋକ ବ୍ୟବସ୍ଥା କରିଥିଲା। ଫାଇଲିନ ବାତ୍ୟାରେ ଏହା କିଛିକାଂଶରେ କ୍ଷତିଗ୍ରସ୍ତ ହୋଇଥିଲା। ପରେ ସିଏମସି ୪ ଲକ୍ଷ ଟଙ୍କା ବ୍ୟୟରେ ମଶାଣୀର ପୁନରୁଦ୍ଧାର କରିଥିଲା। ଏହାଛଡ଼ା ୩ ଲକ୍ଷ ୮୦ ହଜାର ବ୍ୟୟରେ ମାତାମଠ, ସିସୋର (ଜାଇକା) ରୋଡଠାରୁ ମଶାଣୀ ପର୍ଯ୍ୟନ୍ତ ପକ୍କାରାସ୍ତା କରାଯାଇଛି। ତେଲୁଗୁ ସମ୍ପ୍ରଦାୟ ପକ୍ଷରୁ ମଧ୍ୟ ପ୍ରାୟ ୩ ଲକ୍ଷ ୫୦ ହଜାର ଟଙ୍କା ବ୍ୟୟରେ ଶିବଙ୍କ ରୁଦ୍ର ମୂର୍ର୍ତ୍ତି ସ୍ଥାପନ ସହ ପରିବେଶ ସୁରକ୍ଷା ପାଇଁ ପ୍ରାୟ ୨୦୦ ଚାରା ଲଗାଯାଇଛି। ଶବବାହକମାନେ ବସିବା ପାଇଁ ୬ଟି ସିମେଣ୍ଟ ବେଞ୍ଚ ସେହି ସ୍ଥାନରେ ତିଆରି ହୋଇଛି। ଏହା ସତ୍ତ୍ବେ ଜିଲା ପ୍ରଶାସନ ସୂଚନା ନ ଦେଇ ବାଲି ଫିଲିଂ କରୁଛି। ଏ ନେଇ ସମ୍ପ୍ରଦାୟର ଲୋକେ ଜିଲାପାଳ, ସିଏମ୍ସି କମିଶନରଙ୍କୁ ଲିଖିତ ଭାବେ ଜଣାଇଥିଲେ ମଧ୍ୟ ପଦକ୍ଷେପ ଶୂନ। ତେଣୁ ବାଲି ଫିଲିଂ କରିବା ପୂର୍ବରୁ ଶ୍ମଶାନ ପାଇଁ ବିକଳ୍ପ ବ୍ୟବସ୍ଥା କରିବାକୁ ଦାବି କରିଛି ‘ଐକ୍ରତା’ ସଙ୍ଗଠନ। ବୁଧବାର ଏନେଇ ତିନିକୋଣିଆ ବଗିଚାରେ ଏକ ଖବରଦାତା ସମ୍ମିଳନୀରେ ସଙ୍ଗଠନ ଉପଦେଷ୍ଟା ପ୍ରଦୀପ ପଟ୍ଟନାୟକ କହିଛନ୍ତି, ଦାବି ପୂରଣ ନ ହେଲେ ହାଇକୋର୍ଟଙ୍କ ଦ୍ୱାରସ୍ଥ ହେବୁ।
ଜିଲାପାଳଙ୍କୁ ଦାବିପତ୍ର ଦେଲେ ବିଧାୟକ
ମାତାମଠସ୍ଥିତ ଶ୍ମଶାନ ଘାଟରେ ବାଲି ପୋତେଇ ଦ୍ୱାରା ଶ୍ମଶାନ କ୍ଷତିଗ୍ରସ୍ତ ହେବା ଆଶଙ୍କା କରାଯାଉଛି। କିଛି ବର୍ଷ ଭିତରେ ପ୍ରାୟ ଦୁଇଶହ ତେଲୁଗୁ ସଂପ୍ରଦାୟର ବ୍ୟକ୍ତିଙ୍କ ଅନ୍ତିମ ସଂସ୍କାର ଓ କ୍ରିୟାକର୍ମ ଏଠାରେ ହୋଇଛି। ଶ୍ମଶାନ ଘାଟର ସୁରକ୍ଷା ସକାଶେ ପଦକ୍ଷେପ ନେବା ପାଇଁ ମଙ୍ଗଳବାର ଜିଲାପାଳ ଜିଲାପାଳ ଭବାନୀ ଶଙ୍କର ଚୟନୀଙ୍କୁ ଦାବିପତ୍ର ଦିଆଯାଇଛି। କଟକ-ବାରବାଟୀ ବିଧାୟକ ମହମ୍ମଦ ମୋକିମ୍ଙ୍କ ସମେତ ଅନ୍ୟ ବୁଦ୍ଧିଜୀବୀ ଏହି ଦାବିପତ୍ର ଦେଇଛନ୍ତି।