ପୁରୀ ଅଫିସ,୨୦।୩: ଓଡ଼ିଆ ଜନଜୀବନ ସହ ପଖାଳର ସମ୍ପର୍କ ବହୁ ପୁରୁଣା। ଏକଦା ଗାଁ ଓ ଗରିବ ଲୋକଙ୍କର ଖାଦ୍ୟ ପଖାଳ ବୋଲି କୁହାଯାଉଥିଲା। ହେଲେ ଏବେ ସହରବାସୀ ମଧ୍ୟ ପଖାଳ ମୋହରେ। ବିଶେଷକରି ୨୦୧୧ରୁ ପଖାଳ ଦିବସ ପାଳନ ହୋଇଆସୁଛି। ପ୍ରତିବର୍ଷ ମାର୍ଚ୍ଚ ୨୦ ତାରିଖକୁ ପଖାଳ ଦିବସ ଭାବେ ପାଳନ କରାଯାଉଛି। ତେବେ ଏହାକୁ ନେଇ ଶୁକ୍ରବାର ବାଲୁକାକଳା ପ୍ରଦର୍ଶନ କରିବା ସହ ବାର୍ତ୍ତା ଦେଇଛନ୍ତି ଶିଳ୍ପୀ ସୁଦର୍ଶନ ପଟ୍ଟନାୟକ।
ପୁରୀ ବେଳାଭୂମିରେ ପଖାଳ ଦିବସର ସ୍ବତନ୍ତ୍ରତାକୁ ମନେ ପକାଇଛନ୍ତି ସେ। ଟୁଇଟରରେ ମଧ୍ୟ ସେ ଏହାର ଫଟୋ ଶେୟାର କରିବା ସହ କହିଛନ୍ତି, ଆଜି ପଖାଳ ଦିବସ। ଓଡ଼ିଆଙ୍କ ପସନ୍ଦ ପଖାଳର ସ୍ବତନ୍ତ୍ରତାକୁ ଆଜିର ଦିନ ଉତ୍ସର୍ଗ। ଘରେ ରୁହନ୍ତୁ। ସୁସ୍ଥ ରୁହନ୍ତୁ। ପଖାଳ ଦିବସକୁ ଉପଭୋଗ କରନ୍ତୁ। ଭାରତ ଏବେ କରୋନା ସହ ଲଢ଼ୁଛି ବୋଲି ମଧ୍ୟ ସେ ବାର୍ତ୍ତା ଦେଇଛନ୍ତି।