ବାଲେଶ୍ୱର ଅଫିସ,୨୬।୧୦-ବଙ୍ଗୋପସାଗରରେ ସୃଷ୍ଟ ଘୂର୍ଣ୍ଣିବଳୟ ଲଘୁଚାପରେ ପରିଣତ ହେବା ପରେ ଗତ ୩ଦିନ ଧରି ବର୍ଷା ଲାଗି ରହିବାରୁ ଶୁକ୍ରବାର ବାଲେଶ୍ୱର ସହରର ବିଭିନ୍ନ ସ୍ଥାନରେ କୃତ୍ରିମ ବନ୍ୟା ସୃଷ୍ଟି ହୋଇଛି। ରାସ୍ତାଘାଟ ବୁଡ଼ିଯିବା ସହ ଘର ଭିତରେ ପାଣି ପଶିଛି। ସହରର ବିଭିନ୍ନ ନାଳ ଏବଂ ମହାନାଳକୁ ସମୟ ଅନୁସାରେ ସଫେଇ କରାଯାଉ ନ ଥିବାରୁ ଏଭଳି ସମସ୍ୟା ସୃଷ୍ଟି ହୋଇଛି।
ଜିଲାର ସହର ଉପକଣ୍ଠ ନୂଆସାହି ସିଟି କ୍ଲିନିକ୍ ଛକରେ ରାସ୍ତା ଉପରେ ଆଣ୍ଠୁଏ ଉପରେ ପାଣି ଚାଲିଛି। ବାଲେଶ୍ୱର ଫକୀରମୋହନ ମେଡ଼ିକାଲ କଲେଜ ଓ ହସ୍ପିଟାଲ ପରିସରରେ ବର୍ଷାପାଣି ଜମି ରହିଛି। ମେଡ଼ିକାଲର ସର୍ଜରୀ ୱାର୍ଡ଼ରେ ଗୁରୁବାର ରାତିରେ ପାଣି ପଶିଯିବା ସହିତ ବାରଣ୍ଡାରେ ପାଣି ଜମିଯାଇଥିବାରୁ ରୋଗୀ ଓ ସମ୍ପର୍କୀୟମାନେ ନାହଁି ନ ଥିବା ହଇରାଣ ହୋଇଛନ୍ତି। ଜିଲାର ଗୁଡ଼ିପଦା, ସିଟି କ୍ଲିନିକ୍ ଛକ, ନୂଆସାହି, ପୋଷ୍ଟାଲ କଲୋନୀ, ଗୋପାଳଗାଁ, ରାଣୀପାଟଣା, ସିନେମାଛକ, ନୂଆବଜାର ଭଳି ବିଭିନ୍ନ ସ୍ଥାନରେ ଡ୍ରେନ୍ ପାଣି ଢ଼େଉ ଖେଳୁଛି। ତଳିଆ ଅଞ୍ଚଳର ଲୋକମାନଙ୍କ ଘରେ ପାଣି ପଶି ଯାଇଥିବାରୁ ସେମାନେ ଘରଦ୍ୱାର ଛାଡ଼ି ସମ୍ପର୍କୀୟଙ୍କ ଘରେ ଆଶ୍ରୟ ନେଇଛନ୍ତି। ଜିଲା ପ୍ରଶାସନ ପକ୍ଷରୁ କୌଣସି ସହାୟତା ଅଦ୍ୟାବଧି ପହଞ୍ଚତ୍ ନ ଥିବାର ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି। ଜିଲାରେ ହାରାହାରି ୧୨୭.୮୦ ମି.ମି. ବର୍ଷା ହୋଇଥିବା ବେଳେ ଭୋଗରାଇରେ ବ୍ଲକରେ ୧୫୬.୨ ମି.ମି., ଜଳେଶ୍ୱରରେ ୧୩୭ ମି.ମି., ବାଲିଆପାଳରେ ୧୪୮ ମି.ମି., ବସ୍ତାରେ ୮୬ ମି.ମି., ବାଲେଶ୍ୱରରେ ୧୪୫ ମି.ମି., ରେମୁଣାରେ ୧୭୫ ମି.ମି., ନୀଳଗିରିରେ ୧୩୪.୪ମି.ମି., ସୋରରେ ୧୨୫ମି.ମି., ବାହାନଗାରେ ୧୩୧ ମି.ମି., ସିମୁଳିଆରେ ୧୧୩ ମି.ମି., ଖଇରାରେ ୧୧୦ ମି.ମି., ଔପଦା ବ୍ଲକରେ ୭୩ ମି.ମି. ବର୍ଷା ହୋଇଥିବା ଜିଲା ଜରୁରୀ କାଳୀନ ଅଧିକାରୀ ଅଭୟ କୁମାର ନାୟକ ପ୍ରକାଶ କରିଛନ୍ତି। ଅନ୍ୟପକ୍ଷରେ କୌଣସି ଜାଗାରେ ବନ୍ୟା ପରିସ୍ଥିତି ଉପୁଜି ନ ଥିବାବେଳେ ଜଳକା ନଦୀର ଜଳସ୍ତର ବିପଦସଙ୍କେତ ଉପରେ ପ୍ରବାହିତ ହେଉଛି।