ଦିଗପହଣ୍ଡି,୨ା୩(ଡି.ଏନ୍.ଏ.) ଦିଗପହଣ୍ଡି ବ୍ଲକର ଏକ ଗାଁରେ ବାଲ୍ୟବିବାହ ପାଇଁ ପ୍ରସ୍ତୁତି ଚାଲିଥିବା ରାଜ୍ୟ ମହିଳା ଓ ଶିଶୁକଲ୍ୟାଣ ବିଭାଗ ନିକଟରେ ଅଭିଯୋଗ ହୋଇଥିଲା। ରବିବାର ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ ଓ ଜିଲା ସମାଜ ମଙ୍ଗଳ ଅଧିକାରୀ ମନୋରମା ରେଡ୍ଡୀ ଅଭିଯୋଗର ତୁରନ୍ତ ତଦନ୍ତ କରି କାର୍ଯ୍ୟାନୁଷ୍ଠାନ ପାଇଁ ଜିଲା ଶିଶୁ ସୁରକ୍ଷା ଅଧିକାରୀ ୟୁନିଟ କର୍ତ୍ତୃପକ୍ଷ ଓ ଦିଗପହଣ୍ଡି ସିଡିପିଓ ଯଶୋବନ୍ତି ସାହୁଙ୍କ ସମେତ ବ୍ରହ୍ମପୁର ଚାଇଲ୍ଡ ଲାଇନ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଥିଲେ। ସିଡିପିଓ ସାହୁଙ୍କ ନେତୃତ୍ୱରେ ଛତ୍ରପୁରସ୍ଥିତ ଜିଲା ଶିଶୁ ସୁରକ୍ଷା ୟୁନିଟ୍ର ସଂଯୋଜକ ଶିବ ପ୍ରସାଦ ରଥ, ବ୍ରହ୍ମପୁର ଚାଇଲ୍ଡ ଲାଇନ କର୍ମଚାରୀ ବଳରାମ ମଲ୍ଲିକ, ଦିଗପହଣ୍ଡି ଥାନା ଏସ୍ଆଇ ମଧୁସ୍ମିତା ପ୍ରଧାନ, ମାଧବ ଚନ୍ଦ୍ର ଟାକରୀ ପ୍ରମୁଖ ଉକ୍ତ ଗଁାରେ ପହଞ୍ଚତ୍ ସବିଶେଷ ତଦନ୍ତ କରିଥିଲେ। ଗ୍ରାମ ପ୍ରାଥମିକ ବିଦ୍ୟାଳୟ ପ୍ରଧାନ ଶିକ୍ଷକଙ୍କୁ ଡକାଯାଇ ଯୁବତୀଙ୍କ ପ୍ରବେଶିକା ରେକର୍ଡ ତନଖି କରାଯାଇଥିଲା। ଜନ୍ମ ପ୍ରମାଣ ପତ୍ର ଅନୁଯାୟୀ ତାଙ୍କୁ ୧୮ ବର୍ଷ ୨ ମାସ ହୋଇଥିବା ଜଣାପଡିଥିଲା। ସୋମବାର ଯୁବତୀଙ୍କ ବିବାହ ପ୍ରସ୍ତୁତି ସରିଥିବାବେଳେ ଏଭଳି ନିରାଧାର ଅଭିଯୋଗ ଓ ପୋଲିସ ଏବଂ ପ୍ରଶାସନିକ ଅଧିକାରୀଙ୍କୁ ଦେଖି ଯୁବତୀଙ୍କ ମା’ ଚେତାଶୂନ୍ୟ ହୋଇ ପଡ଼ିଥିଲେ। ପରେ ପୋଲିସ ଓ ପ୍ରଶାସନିକ ଅଧିକାରୀ ମାନେ ବାଲ୍ୟ ବିବାହ ଆଇନ ସମ୍ପର୍କରେ ପରିବାର ଲୋକଙ୍କୁ ବୁଝାଶୁଝା କରି ସନ୍ଧ୍ୟାରେ ଫେରିଥିଲେ।
