ଛତ୍ରପୁର,୨୨ା୧(ଡି.ଏନ୍.ଏ.) -ଗଞ୍ଜାମ ଜିଲା ସଦର ମହକୁମା ଛତ୍ରପୁର ଏନ୍ଏସିକୁ ମ୍ୟୁନିସିପାଲିଟି କରିବା ନିମନ୍ତେ ପ୍ରକ୍ରିୟା ଆରମ୍ଭ ହୋଇଛି। ଏନ୍ଏସିର ଆଖପାଖ ଅଞ୍ଚଳକୁ ସାମିଲ କରି ମ୍ୟୁନିସିପାଲିଟି କରିବା ପାଇଁ ସ୍ଥିର ହୋଇଛି। ଚିକଲଖଣ୍ଡି ପଞ୍ଚାୟତ ବାସନାପଲ୍ଲୀ, ଶାନ୍ତିନଗର, ଦାମିୟନ ନଗରର କେତେକ ଲୋକ ମଙ୍ଗଳବାର ଅତିରିକ୍ତ ଜିଲାପାଳଙ୍କୁ ଭେଟି ଛତ୍ରପୁର ଏନ୍ଏସିରେ ମିଶିବା ପାଇଁ ସ୍ମାରକପତ୍ର ପ୍ରଦାନ କରିଛନ୍ତି। ଏହାର ନକଲ ଡୁଡା ପିଡି ଏବଂ ଛତ୍ରପୁର ଏନ୍ଏସି ନିର୍ବାହୀ ଅଧିକାରୀଙ୍କୁ ମଧ୍ୟ ପ୍ରଦାନ କରାଯାଇଛି। ଗୋଟିଏ ଏନ୍ଏସିକୁ ମ୍ୟୁନିସିପାଲିଟି କରିବାକୁ ହେଲେ ଜନସଂଖ୍ୟା ୨୫ ହଜାରରୁ ଉର୍ଦ୍ଧ୍ୱ ହେବା ଆବଶ୍ୟକ। ୨୦୧୧ ଜଣଗଣନା ଅନୁସାରେ ଛତ୍ରପୁର ଏନ୍ଏସିର ଜନସଂଖ୍ୟା ୨୨,୦୨୭, ରାଜସ୍ବ ଗ୍ରାମ ଜି.ଏନ. ପାଲମର ଜନସଂଖ୍ୟା ୧୯୫୪ ଓ ପୁରୁଣା ଛତ୍ରପୁରର ଜନସଂଖ୍ୟା ୨୮୪୫ ଥିଲା। ଏହାକୁ ମିଶାଇଲେ ମୋଟ ଜନସଂଖ୍ୟା ୨୬,୮୨୬। ପୂର୍ବରୁ ଦୁଇଟି ରାଜସ୍ବ ଗ୍ରାମ ଛତ୍ରପୁର ଏନ୍ଏସିରେ ମିଶିବାକୁ ସହମତି ଦେଇସାରିଛନ୍ତି। ଛତ୍ରପୁର ସମେତ ଅନ୍ୟ କେତୋଟି ଏନଏସିକୁ ମ୍ୟୁନିସିପାଲିଟିର ମାନ୍ୟତା ଦେବାକୁ ଜଣେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ପରେ ଏହା ଉପରେ ପଦକ୍ଷେପ ନେବାକୁ ସରକାରଙ୍କୁ ହାଇକୋର୍ଟ ନିର୍ଦ୍ଦେଶ ଦେଇଥିଲେ। ଏହି ପରିପ୍ରେକ୍ଷୀରେ ଜିଲାପାଳଙ୍କ ନିର୍ଦ୍ଦେଶକ୍ରମେ ଛତ୍ରପୁର ଏନଏସି ପକ୍ଷରୁ ନିକଟସ୍ଥ ଚିକଲଖଣ୍ଡି, କଣମଣା, ଅଗସ୍ତିନୂଆଗାଁ ଓ ପୋଡାପଦର ପଞ୍ଚାୟତକୁ ଚିଠି କରି ନିଜ ଅଧୀନରେ ଥିବା ଗୋଟିଏ ଲେଖାଏ ରାଜସ୍ବ ଗାଁ କୁ ଏନଏସିରେ ମିଶ୍ରଣ ପାଇଁ ଅନୁମତି ଦେବାକୁ ଅନୁରୋଧ କରାଯାଇଥିଲାା ଛତ୍ରପୁର ଏନଏସିରେ କଣମଣା ପଞ୍ଚାୟତର ପୁରୁଣା ଛତ୍ରପୁର, ଅଗସ୍ତିନୂଆଗାଁର ଜି.ଏନ୍. ପାଲମ ରାଜସ୍ବ ଗାଁ ମିଶିବାକୁ ରାଜି ହୋଇଥିବା ନେଇ ପଞ୍ଚାୟତ ପକ୍ଷରୁ ଚିଠି ଆସିଥିଲା। ଅନ୍ୟପକ୍ଷରେ ଚିକଲଖଣ୍ଡି ପଞ୍ଚାୟତ ପକ୍ଷରୁ ତାର ରାଜସ୍ବ ଗ୍ରାମ ବାସନାପଲ୍ଲୀକୁ ଏନଏସିରେ ମିଶ୍ରଣ ପାଇଁ ମନା କରି ଦିଆଯାଇଥିଲା। ପୋଡାପଦର ପଞ୍ଚାୟତ ପକ୍ଷରୁ କୌଣସି ଉତ୍ତର ଆସି ନ ଥିଲା।