ଆଠମଲ୍ଲିକ, ୮ା୩(ଡି.ଏନ.ଏ.) – ଦିନେ ଲୋକଙ୍କ ନିକଟରେ ସରକାରୀ ଯୋଜନା ପହଞ୍ଚାଇବା ସହ ସେମାନଙ୍କ ଅସୁବିଧାରେ ପାଖରେ ଛିଡା ହେଉଥିବା ଜଣେ ପୂର୍ବତନ ସରପଞ୍ଚ ଏବେ ଦି ଓଳି ଖାଇବାକୁ ସଂଘର୍ଷ କରୁଛନ୍ତି। ରହିବାକୁ ଘର ଖଣ୍ଡିଏ ନ ଥିବାରୁ ଭଙ୍ଗା ଚାଳିଆରେ ପଡିରହିଥିବାବେଳେ ପେଟ ପାଇଁ ଅନ୍ୟ ଘରେ ବାସନ ମାଜିବାକୁ ପଡୁଛି। ଅନୁଗୋଳ ଜିଲା ଆଠମଲ୍ଲିକ ବ୍ଲକ ଅଏଡା ପଞ୍ଚାୟତର ପୂର୍ବତନ ସରପଞ୍ଚ ଦୁଶିଳା ନାଏକ ଦୀର୍ଘ ୭ ବର୍ଷ ହେଲା ଏଭଳି ଦୁର୍ଦ୍ଦଶାରେ ବଞ୍ଚୁଥିଲେ ବି ପ୍ରଶାସନ ତରଫରୁ କୌଣସି ବ୍ୟବସ୍ଥା ତାଙ୍କ ପାଇଁ କରାଯାଇ ନ ଥିବା ଅଞ୍ଚଳବାସୀ ଅଭିଯୋଗ ଆଣିଛନ୍ତି।
ସ୍ଥାନୀୟ ଲୋକଙ୍କ କହିବା ମୁତାବକ, ଦୁଶିଳା ୧୯୯୭ରେ ଅଏଡା ସରପଞ୍ଚ ଭାବେ ନିର୍ବାଚିତ ହୋଇଥିଲେ। ୫ ବର୍ଷ ମଧ୍ୟରେ ସେ ପଞ୍ଚାୟତର ବହୁ ଉନ୍ନତିମୂଳକ କାର୍ଯ୍ୟ କରିବା ସହ ଅନେକ ହିତାଧିକାରୀଙ୍କୁ ଯୋଜନାରେ ସାମିଲ କରାଇଛନ୍ତି। ହେଲେ ଏବେ ନିଜେ ଦି ଓଳି ଖାଇବା ଓ ରହିବା ପାଇଁ ସଂଘର୍ଷ କରିବାକୁ ପଡୁଛି। ୨୦୧୨ରେ ଦୁଶିଳାଙ୍କ ସ୍ବାମୀ ନରେନ୍ଦ୍ରଙ୍କ ପରଲୋକ ଘଟିଥିଲା। ଏହାପରଠାରୁ ହିଁ ତାଙ୍କ ଜୀବନ ଦୁର୍ବିସହ ହୋଇପଡିଛି। ବିଭିନ୍ନ ସ୍ଥାନରେ ଶ୍ରମିକ ଭାବେ କାର୍ଯ୍ୟ କରିବା ସହ ଭୁବନେଶ୍ବର ଯାଇ ପର ଘରେ କଂସାବାସନ ମଧ୍ୟ ମାଜୁଛନ୍ତି। ଏ ବିଷୟରେ ଦୁଶିଳା କୁହନ୍ତି, ସରପଞ୍ଚ ଥିବା ବେଳେ ସରକାର ଅଳ୍ପ ସଂଖ୍ୟକ ଇନ୍ଦିରା ଆବାସ ପଞ୍ଚାୟତକୁ ଯୋଗାଉ ଥିଲେ। ଗରିବ ଲୋକଙ୍କୁ ସେହି ଘର ବାଣ୍ଟି ଦେଉଥିଲି। ଘରଟିଏ ପାଇଁ କେବେ ଆବେଦନ କରିନାହିଁ। ସରକାର ଏତେ ସର୍ଭେ କରି ମଧ୍ୟ ମୋ ଗାଁ ବାହାଳି ଟିକିରା ସାହିର ଅନେକ ଗରିବ ବିଧବାଙ୍କ ନାମ ସର୍ଭେ ଲିଷ୍ଟରେ ରଖିପାରିନାହାନ୍ତି। ଆଠମଲ୍ଲିକ ବିଡିଓ ସଞ୍ଜୟ କୁମାର ଆଚାର୍ଯ୍ୟ କୁହନ୍ତି, ୨୦୨୨ ସୁଦ୍ଧା ରାଜ୍ୟ ସରକାର ଚାଳ ଘର ଥିବା ଲୋକଙ୍କୁ ପକ୍କା ଘର ଯୋଗାଇଦେବେ। ଏ ନେଇ ସର୍ଭେ ସରିଛି। ଯଦି ଦୁଶିଳାଙ୍କ ନାମ ତାଲିକାରେ ଥିବା ତେବେ ତାଙ୍କୁ ଘର ଯୋଗାଇ ଦିଆଯିବ।